Македонија
Мицкоски од Ресен: Ковачевски го нема на митинзите на Пендаровски, сака да ја освои поддршката на ДУИ

„Ресен е град на промените. Пролет е, а бранот на промените е видлив и голем. И промените не се апстрактен поим, туку суштествена потреба на народот кој во нив гледа спас од оваа власт. Ако најдобро може да се опише ова фатално владеење со државата во една реченица, тоа е дека на народот му се одзема државата. Народот има чувство дека нема контрола над работите, дека е кираџија во сопствениот дом, а системот е урнисан. Во својата држава до пред скоро се чекаа редици за пасоши и лични документи. Контролата на народот врз државата е одземена и тоа се гледа во фактот што криминалот и корупцијата се широко распостранети“, истакна претседателот на ВМРО-ДПМНЕ, Христијан Мицкоски на вечерашниот митинг во Ресен.
Мицкоски посочи дека е изгубена е довербата во политичарите, бидејќи народната волја е многупати изигрувана. Според неги, ништо не функционира во државата. Македонија е одземена од рацете на граѓаните, а граѓаните со право се скептични дали може тоа да се промени тоа.
„Сетете се само за хаосот што секојдневно го доживувате околу вас: корупцијата која е толку очигледна, пациентите не се сигурни каква терапија добиваат, се заработува бескрупулозно на грбот на најранливите, непотизам насекаде, правда никаде, не само младите туку и сѐ повозрасни размислуваат да ја напуштат Македонија не гледајќи веќе ниту систем, ниту ред. СДСМ е сведена на измеќар и соучесник во сите скандали, се срамиме од нивните недостоинствени настапи низ светот, иднината и подобриот живот се далечен сон, прогласени сме за најсиромашна држава во Европа, додека државата е на врвот по сите ранг-листи на корупција, извештаите од ЕК се историски катастрофални, тие ветуваа Отворена Европа, но испорачаа затворена држава во која граѓаните немаат начин како да отпатуваат надвор од Македонија“, рече тој.
Мицкоски нагласи дека деновите кога неколкумина ја киднапираа државата мора, заедно со гордо крената глава, да се спротивставиме на тоа.
„На овие избори не одлучувате само за претседател, туку одлучувате за човек на кој можете да му доверите да ја води државата и да одлучува за вас и вашата иднина. Стево Пендаровски својот мандат го помина во озборување и коментирање на политика, наместо во водење и носење одлуки. Пендаровски би можел да коментира утакмица во фудбал, и верувам дека во тоа би бил солиден гест од негова страна, но не и да води држава. Човекот не покажа отпорност да се спротивстави на Али Ахмети, ниту на СДСМ. Се препелкаше околу францускиот предлог на крај се фалеше како тој активно придонел во неговото пишување и носење. Безличен политичар на кому му е важно да направи комбинации за да ја сочува фотелјата, но не и да се бори за иднината на државата. Причината зошто Ковачевски не ги посетува неговите митинзи освен слабиот рејтинг, е и желбата во која Пендаровски верува, а тоа е дека сака повеќе да ја има поддршката од ДУИ отколку од Ковачевски и СДСМ. Нему му е поважно ДУИ да го гласа, од тоа СДСМ да го поддржи. Тој трча по Ахмети, затоа што знае дека по поразот во првиот круг ниту ДУИ ќе го спаси во вториот. И затоа не се изјаснува што ќе прави и како ќе прави после дебаклот по првиот круг“, укажа претседателот на ВМРО-ДПМНЕ.
Мицкоски додаде дека народот на овие избори има јасен избор. Понудата на ВМРО-ДПМНЕ за претседател е личност со извонреден интелект и интегритет. Личност со верба во принципи и со свој став. Гордана Силјановска-Давкова ќе биде гаранција и брана над сите повреди и кршења на Уставот и законите. Затоа изборот е јасен. Македонија нема време и простор за губење. Ова се избори каде се одлучува дали ќе имаме конечно средена држава или ќе останеме и понатаму во заложништво на ДУИ и СДСМ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
„Срамно и безидејно е да се глуми после војна, генерали“, реагираат од „Идеа лаб“ на обвинувањата од СДСМ

По екстремно успешно организираниот Европски младински олимписки фестивал, за кого добивме потврда лично од претседателот на Европскиот олимписки комитет, политичките превирања не престануваат да ја дезинформираат јавноста со небулози, велат од ПР-агенцијата „Идеа лаб“, по прес – конференцијата на Јовица Јанковиќ од СДСМ кој кажа дека владата немала пари за младите на олимпијада ама имала за ПР агенции на власта.
„Имено, денеска на прес-конференција политичката партија СДСМ излезе со податок дека нашата агенција е ангажирана за промоција на фестивалот со финансиски надомест од Министерството за спорт, што е апсолутна невистина. Имено, точно е дека бевме ангажирани во делот на промоција на фестивалот, но ангажманот го добивме од Македонскиот олимписки комитет и тоа во делот на: промоција на настанот на социјални мрежи, изработка и координација на фан зоните, координација и организација на церемонија на отворање, затворање и церемонии на доделување медали“, се наведува во реакцијата.
Од „Идеа лаб“ велат дека за истиот ангажман на месечно ниво, доставува фактури до МОК за испорачаните услуги.
„Срамно и безидејно е да се глуми после војна, генерали. За фестивалот споменат на денешната прес-конференција добивме лично признание од Спирос Капралос, за најдобра одржана церемонија на отворање од 1991 година до денеска. Наместо да се зборува тоа, во медиумите, се шират лаги и невистини. Кога веќе некој решил да ни прави бесплатна реклама, можеше да спомене дека и во 2023 година, работевме на „Преспа Форум Дијалог“, кога партијата која денеска нѐ прозива, а тогаш беше на власт, нѐ ангажираше преку Министерството за надворешни работи. Во 2021 година Идеа Лаб работеше на проекти за Општина Аеродром кога локалната власт беше во рацете на партијата која денеска одржа небулозна прес-конференција. Искрено, Ве замолувам да не нè вмешувате во вашите политички превирања. Ние сме комерцијален субјект и за нашиот ангажман е неважна политичката определба, туку резултатите кои ќе ги испорачаме пред клиентот“, изјави Димитар Атанасовски, управител на ПР и маркетинг агенцијата „Идеа Лаб“.
Македонија
Муртезани – Брн: Проширувањето мора да остане кредибилен процес заснован на заслуги

Министерот за европски прашања на Северна Македонија, Орхан Муртезани, денеска оствари билатерална средба со министерот за европски прашања на Ирска, Томас Брн, кој престојува во работна посета на Скопје.
Средбата беше проследена со заедничка прес-конференција на која министрите упатија силна заедничка порака во поддршка на процесот на проширување на Европската Унија и европската перспектива на Северна Македонија.
Министерот Муртезани истакна дека проширувањето на Унијата е прашање на заедничка безбедност, стабилност и визија, и дека Северна Македонија останува доследно посветена на спроведување на реформите и на воспоставување на европски стандарди.
Притоа подвлече дека процесот мора да биде заснован на заслуги и ослободен од билатерални условувања, како предуслов за зачувување на кредибилитетот на европската интеграција.
„За нас, европската интеграција не е само надворешно-политичка цел, туку длабоко внатрешна трансформација. Нашиот фокус останува на реформи, резултати и јасна посветеност кон европските вредности,“ изјави Муртезани.
Од своја страна, министерот Брн го поздрави напредокот на Северна Македонија и изрази силна поддршка за нејзиниот пат кон полноправно членство во ЕУ. Тој нагласи дека Ирска има позитивно искуство од членството, кое ја зајакнало нејзината култура, јазик и меѓународна позиција.
„За Ирска, тоа што седиме на масата на ЕУ и што сме дел од одлуките е од големо значење. Верувам дека и Северна Македонија, но и сите граѓани и ваши и наши, како и сите граѓани на Унијата, ќе имаат придобивки од овој процес,“ истакна Брн.
Министерот Брн информираше дека Ирска ќе го преземе претседавањето со Советот на Европската Унија во средината на 2026 година, при што го посочи проширувањето како еден од приоритетите во рамки на нивното претседателство.
Министрите се согласија дека е од клучна важност граѓаните да ги препознаат придобивките и конкретните резултати од европскиот процес, и дека тоа бара заедничка посветеност, искрен дијалог и фер услови.
Македонија
Хуманитарен музички настан на Споменикот на слободата во Кочани

На први и втори август ќе се одржи хуманитарен музички настан Расплет фестивал, на Споменикот на слободата во Кочани, организиран од млади луѓе меѓу кои и бендот Корка од Кочани.
Главна цел на настанот е да се подигне свеста дека донациите не треба да се намалат и дека се потребни исто како уште првите денови на формирањето на Support Kocani.
„Донациите стивнуваат. Ние сме овде да ве потсетеме дека донациите не смеат да запрат, бидејќи им се најпотребни на повредените кои чекаат за нив, од кои некои директно се вклучени во фестивалот за нивна повторна социјализација. Причината за дводневното времетраење е за да може да се привлече поголемо внимание кон Кочани и сите засегнати од трагедијата и да се собере што можно поголем број на донации. Вториот дел од настанот (сабота 02/08/2025) ќе започне покасно, да се остави простор на мировниот марш, кои ние со сè срце го подржуваме, учествуваме и повикуваме луѓе да земаат учество и надвор од Кочани“, велат организаторите.
Тие наведуваат дека целиот настан е посветен нa Сара Јорданова, нивна драга пријателка и соученичка која го загуби својот живот во пожарот, но и кон сите други засегнати.
На сцената ќе настапат артисти како Хајка, Taxi Consillium, Корка, Алембик, Јаблан, Don Playa, Луфтанза, Соба Глувих, Големата Вода, Mallard и DJ Gianni.