Македонија
Мицкоски од Свети Николе: По 7 години пустош, конечно Македонија се гради

Премиерот Христијан Мицкоски денеска од Свети Николе порача дека Македонија влегува во фаза на обновување и развој, нагласувајќи дека по години на, како што рече, „пустош и понижување“, сега државата се гради.
„Денеска е посебен ден овде во Свети Николе. Освен што го предвидовме како ден за дружење со граѓаните, сакавме да поминеме и низ неколку значајни проекти што заеднички ги финансираат и локалната самоуправа и Владата“, истакна Мицкоски.
Тој најави дека вториот инвестициски повик ќе обезбеди нешто повеќе од два милиони евра за развојни проекти во општината, што, според него, ќе значи решавање на долгорочни проблеми на граѓаните.
„Македонија се гради! После 7 години пустош, понижување и организирана пљачка, конечно сме во состојба кога можеме да кажеме дека државата оди напред“, потенцираше премиерот.
Освен инфраструктурните теми, Мицкоски им го честиташе Меѓународниот ден на жената – 8 Март, како и празникот Тодорица, упатувајќи искрени желби за здравје, среќа и успех на сите граѓани.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Генералка викенд – над 20.000 волонтери ќе чистат на повеќе од 500 локации во Македонија

На 9, 10 и 11 мај, по петти пат ќе се случи најголемата годишна национална акција за собирање отпад – ГЕНЕРАЛКА ВИКЕНД (волонтерска акција од граѓаните за граѓаните), создадена од Мен енд Маунтен.
Акцијата е поддржана и од ЗЕЛС, Црвен крст и Министерство за животна средина. Над 20.000 волонтери ќе ја чистат нашата татковина на повеќе од 500 локации во сите општини низ земјава, вклучувајќи над 600 организации, институции и компании, еколошки, граѓански, спортски здруженија, пензионерски организации, јавни институции, локални и урбани заедници, градинки, училишта, факултети, волонтери и национални паркови.
Официјалното отворање на тридневна национална акција за чистење отпад – ГЕНЕРАЛКА ВИКЕНД ќе се случи на 9 мај на Скопскиот Аквадукт со почеток во 9 часот. Повеќе од 200 волонтери ќе ја исчистат околината на овој исклучително важен историски споменик.
Во пресрет на еко акцијата со видео порака се огласи и претседателката, Гордана Силјановска Давкова, која апелира до граѓаните да се вклучат: „Го раскинавме пријателството со планетата, ги игнорираме нервозните предупредувања на природата и не сакаме да се соочиме со тешката еколошка криза. Постојано зборуваме за зелени политики, а живееме во сиво црна реалност на убиствен воздух, загадени езера и реки, опустошени шуми и контаминирана почва. Природата не може да биде жртва на профитната агресија. Крајно време е да трчаме маратон кон поздрава животна средина и да склучиме примирје со природата. Доколку сакаме здрава иднина треба сите на 9, 10 и 11 мај да се обединиме во најголемата еколошка акција ГЕНЕРАЛКА ВИКЕНД, како доказ за национална одговорност и еколошка будност. Грижата ветува цврсти промени и верувам дека годинава ќе покажеме уште поголема еколошка зрелост доколку се вклучат повеќе волонтери за чиста и здрава животна средина“, вели Силјановска Давкова.
Со поддршка на Министерството за образование и наука и УНИЦЕФ, за првпат, ГЕНЕРАЛКА ВИКЕНД ќе биде вклучена и во едукативниот проект „Еко час“.
Учениците од сите училишта ширум земјава ќе добијат за домашна задача на 9 мај заедно со наставниците и професорите да ги исчистат училиштата, на 10 мај учениците заедно со нивните семејства ќе ги чистат домовите и просторот околу нивните живеалишта, а на 11 мај учениците заедно со семејствата ќе ги чистат парковите и пикник местата во нивното опкружување. Нивна задача е да го фото-документираат чистењето и на првиот школски час да ги презентираат резултатите.
Врз основа на меморандумот во траење од 10 години, кој Министерство за земјоделство, шумарство и водостопанство и Национални шуми го склучија со Мен енд Маунтен, секоја година по завршувањето на еко акција ГЕНЕРАЛКА ВИКЕНД, во ноември се случува вториот дел од акцијата наречена СОНЧЕВА ГОРА, што подразбира пошумување на државно земјиште.
На секои 10 килограми собран отпад се посветува по едно дрво од годишните планови за пошумување. Во рамките на овие пошумувања во изминативе години беа засадени над 120.000 садници на различни локации: околу езерото Младост во Велес, селото Ќојлија во општина Петровец, во близина на мегалитската опсерваторија Кокино и во општина Старо Нагоричане.
Во изминативе четири години беа собрани 1 милион килограми отпад за време на ГЕНЕРАЛКА ВИКЕНД, досега земаа учество над 44.000 волонтери, исчистени беа повеќе од 1000 локации и беа засадени над 120.000 дрвја.
Овој единствен масовен еколошки настан, не само во земјава, туку и на целиот Западен Балкан, испраќа моќна и алармантна порака дека загадувањето стана најголемиот непријател за граѓаните. Идејата на ГЕНЕРАЛКА ВИКЕНД е да се покрене еко свеста помеѓу граѓаните и со здружени сили да се степенува важноста за позитивни промени кон почиста животна средина.
Македонија
ВЛЕН: Северна Македонија ја презема водечката улога во стратегијата EUSAIR за поповрзан регион

Министерот за европски прашања од ВЛЕН, Орхан Муртезани, учествуваше на Панелот на министри за европски фондови во рамките на EUSAIR форумот, каде што се дискутираше за иднината на Јадранско-јонската регионална стратегија.
„На овој значаен настан, Северна Македонија беше претставена како земја која наскоро ќе го преземе водството во стратегијата EUSAIR, која веќе една деценија игра важна улога во градењето регионални врски и поддршката на процесите на европска интеграција.
Министерот Муртезани ја презентираше визијата на Северна Македонија за посилен, подинамичен и поповрзан макрорегион, преку развој на инфраструктурата, дигитална инклузија, зголемено учество на младите и отворена соработка со граѓанскиот и приватниот сектор.
Понатаму, Северна Македонија ќе преземе одговорност и за координирање на тематскиот столб “Поврзување на регионот“, кој има за цел да промовира конкретни проекти за зајакнување на економските, институционалните и човечките врски меѓу земјите од регионот.
ВЛЕН ја смета оваа нова улога како можност за понатамошно зајакнување на позицијата на Северна Македонија во регионот и за демонстрирање на посветеност кон активна и одржлива соработка кон целосна европска интеграција“, се наведува во соопштението на ВЛЕН.
Македонија
Сообраќајот на регионалниот пат Прилеп-Крушево пуштен во двата правци

Во 09:30 часот сообраќајот на регионалниот пат Прилеп-Крушево е пуштен во двата правци, извести АМСМ.
Денеска, како што претходно информираше АМСМ, во 08.50 часот започна ненајавен јавен собир на регионалниот пат Прилеп-Крушево кај село Врбјани.
Граѓани протестираа поради изведување на градежни работи на патот со кои треба да се руши мост поради што во овој период ќе им се отежни работата на земјоделците, а сообраќајот беше блокиран во двата правци.