Македонија
Мицкоски: Побарав поддршка за европските интеграции, Туск е подготвен да помогне

Претседателот на ВМРО-ДПМНЕ, Христијан Мицкоски, во рамки на самитот на Европската народна партија во Загреб оствари повеќе билатерални средби. Тој оствари средби со претседателот на Европската комисија и иден претседател на Европската народна партија, Доналд Туск, потпретседателот на Европската комисија за работни места, Јирки Катајнен, хрватскиот премиер Андреј Пленковиќ и лидерот на албанската опозиција, Љуљзим Баша.
Мицкоски на средбата со идниот претседател на ЕПП, Доналд Туск, изрази загриженост за состојбите во Република Македонија, потенцирајќи дека има недостигот на правда, зависен и корумпиран правосуден систем, како и растечката сиромаштија.
„Побарав поддршка за Република Македонија на планот на европските интеграции. Туск како пријател на нашата земја изрази подготвеност да помогне на патот кон Европската Унија и градење на продлабочено партнерство и соработка со ВМРО-ДПМНЕ како членка на Европската народна партија. Идната влада предводена од ВМРО-ДПМНЕ ќе ги искористи сите потенцијали и пријателства да се одблокира европскиот пат и да се спроведат реформи кои ќе донесат стандарди, подобар живот и обнова која им е потребна на граѓаните“, потенцираше Мицкоски.
Претседателот на ВМРО-ДПМНЕ на средбата со Јирки Катајнен, досегашен еврокомесар, потпретседател на Европската комисија за работни места, раст, инвестиции и компетитивност и поранешен премиер на Финска, дискутираше за новите технологии и инвестиции на ЕУ и можностите и перспективите за развој на Република Македонија во оваа сфера.
Мицкоски и Пленковиќ ги констатираа одличните односи на двете сестрински партии, при што претседателот на ВМРО-ДПМНЕ ја побара хрватската поддршка за европските интеграции на Македонија.
„Очекувам одлична соработка на идната македонска Влада со Владата на Република Хрватска и реформи кои ќе нè стават на брза патека кон ЕУ“, истакна Мицкоски.
Пред почетокот на самитот Мицкоски оствари средба и со лидерот на албанската опозиција, Љуљзим Баша, на која двајцата соговорници разменија искуства, размислувања и погледи за иднината на нашите земји и регионот.
„Пред нас имаме тешка задача за надминување на предизвиците и обнова која треба да донесе поубав живот на сите граѓани“, заклучи Мицкоски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Наскоро зонско паркирање во Автокоманда

Во скопската населба Автокоманда наскоро ќе биде воведено зонско паркирање, најави кандидатот за градоначалник на Општина Гази Баба, Бобан Стефковски.
„ Со особено задоволство ги информирам жителите на Автокоманда дека е донесено Решение за утврдување на режим на сообраќај во Автокоманда. Со ова официјално се одобрува воведувањето на зонско паркирање – решение кое жителите на Автокоманда го очекуваат повеќе од една деценија“, рече Стефковски.
Тој додава дека во моментов интензивно се работи на изработка на проектот за обележување на улиците и поставување на потребната сигнализација, а активностите на терен ќе започнат во најкус можен рок.
Стефковски најави дека секое домаќинство ќе добие две бесплатни картички за паркирање.
Македонија
Уапсена сопругата на докторот кој беше застрелан во Куманово, била вмешана во обидот за неговото убиство

Полицијата ја уапси сопругата на докторот кој беше застрелан вчера во Куманово. Тој со повреди беше пренесен во болница, но се наоѓа во стабилна состојба. Според информациите на МВР, сопругата е осомничена дека е вмешана во обидот за неговото убиство.
„Вчера полициски службеници од СВР Куманово ја лишија од слобода А.А. (43) од Тетово, поради основи на сомнение дека е поврзана со обидот за убиство на нејзиниот сопруг З.Ш. (43) од село Слупчане, липковско“, велат од МВР.
Исто така, во врска со настанот на службен разговор во СВР Куманово се повикани шест лица, а во домот на Б.С. (50) од Куманово по судска наредба, е извршен претрес.
По целосно документирање на случајот, против сопругата ќе следува соодветна пријава, додека против Љ.Ф. (36) од Гостивар, кој се сомничи за обид за убиство и се уште е во бегство, по консултација со Основното јавно обвинителство, исто така ќе биде поднесена кривична пријава.
Од Министерството за здравство вчера соопштија дека во вооружениот напад во Куманово е повреден докторот Зекирија Шаини. Од таму известија дека повредите не се животно-загрозувачки и дека докторот е во стабилна состојба и се опоравува.
Од ДУИ, пак, информираа дека станува збор за нивен кандидат и носител на листата во Општина Липково.
Македонија
Евакуации во објектите околу плоштадот „ВМРО“ поради куфер оставен на плочникот, полицијата утврди дека е празен

Обезбедувањето на Јавното претпријатие за државни патишта пријавило во полиција дека две лица денес оставиле куфер на плочникот пред нивниот објект сместен на плоштадот „ВМРО“ веднаш до седиштето на владејачката партија ВМРО-ДПМНЕ. Полицијата веднаш излегла на терен, почнала евакуација на вработените од објектите околу плоштадот, а проверките покажале дека куферот е празен.
„Денеска (08.10.2025) во 12.55 часот лице од обезбедувањето на ЈП ‘Државни патишта’ пријавило дека на видеонадзор пред канцелариите на ЈП ‘Државни патишта’ на плоштадот ‘ВМРО’ во Скопје биле забележани две лица како го разгледуваат местото, а едно од лицата оставило куфер. Веднаш по добиената пријава, преземени се соодветни мерки и активности, извршени се потребните проверки и утврдено е дека куферот е празен“, соопшти МВР.