Македонија
Мицкоски: Полицајците на Спасовски и Заев кои злосторнички се здружиле и вршеле притисоци, извршиле тешко кривично дело

Претседателот на ВМРО-ДПМНЕ Христијан Мицкоски вечерва од Вевчани истакна дека на граѓаните им се случува инфлација, додавајќи дека покрај пораст на цените на горивата, маслото, шеќерот, брашното се очекува силна енергетска криза, а како што вели тој, владата покажала дека не умее да се справи со проблемите и токму поради тоа се потребни промени.
„ Тие се толку отсутни од реалноста што чекаат повторно да дојдеме до голем тресок за да потоа се растрчаат и започнат да обвинуваат други за кризата која што ним им се случува, а од кој жртва е народот. Ако дојде до такви големи шокови, ќе дојде до уште поголема сиромаштија од таа што е до сега. Владата покажа дека не умее да се справува со проблемите, и затоа потребни се сериозни промени, рече Мицкоски.
Мицкоски потенцираше и за скандалот кој што денеска ВМРО-ДПМНЕ го обелодени а тоа е дека полицијата на Оливер Спасовски преку злосторничко здружување вршеле притисоци и малтретирање на народот а со тоа извршиле тешко кривично дело, порачувајќи дека ако народот одлучи да излезе и да гласа и да даде доверба, тогаш полицијата на Спасовски, заканите и поткупот на Заев и обвинителството на Русковска не може да го спасат, бидејќи народот е газда на оваа земја.
Наместо да решаваат вистински проблеми, гледаме дека тие се занимаваат со притисоци, прогон и малтретирање на опозицијата. Тоа го покажува и случајот кој денес го објавивме каде се гледа комуникација помеѓу полицајци блиски до нив, кои направиле злосторничко здружување за да следат, пишуваат казни на народот, малтретираат и заплашуваат. Оној дел од полицијата на Спасовски и Заев кои решиле пред народот да ја стават партијата на власт извршиле тешко кривично дело, директно потврдувајќи зошто земјава е прогласена за хибриден режим. Случајот за кој ви го раскажувам се случи во Прилеп, и ете одговорот за ова го добија, во првиот круг од изборите. Победа на ВМРО-ДПМНЕ во Прилеп и народот над бандитизмот и злоупотребите со повеќе од 7 ипол илјади гласови разлика. Така беше и во останатите 22 општини во Македонија во првиот круг, кога народот гласаше и покрај притисоците, и покрај заканите, и покрај уцените, и покрај поткупот не можат против народот. Ако народот одлучи да гласа и да даде доверба не може полицијата на Спасовски, заканите и поткупот на Заев и обвинителството на Русковска да го спасат. Народот е газда на оваа земја, истакна тој.
Мицкоски ги повика граѓаните на обединување, нагласувајќи дека позади параванот се сами и сами одлучуваат, истакнувајќи дека овие избори се борба на народот против аздисана, корумпирана, арогантна и неспособна власт на СДСМ и Заев.
Немојте да заборавите дека позади параванот сте сами, вие и вашиот глас. Вие и вашата волја да ги промените работите. Промените започнаа, тогаш ајде да ги финишираме со голема победа во недела на народот на Македонија. Затоа и повикувам на обединување против оваа власт. Ова е наша заедничка борба. Ова е борба на народот против оваа аздисана, корумпирана, арогантна и неспособна власт, повика Мицкоски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Министерството за одбрана реагира на соопштението на СДСМ: Лицемерно, со манипулација на факти и со целосно извртување на вистината

„Лицемерно, со манипулација на факти и со целосно извртување на вистината – така се карактеризира соопштението од политичката партија СДСМ која се обидува редовна и навремена набавка која се спроведува години наназад и се однесува на потребите на Армијата и СИТЕ угостителски објекти на Министерството и Армијата, вклучувајќи го и Домот на Армијата, авто камповите во Дојран и Охрид, како и Хотелот „Шар“ на Попова Шапка, да ја претстави во сосема поинакво светло. Првенствено, треба да се има предвид дека набавеното кафе и пијалоци во угостителските објекти кои се од отворен карактер за граѓаните, се во слободна продажба, а приходот од продажбата повторно влегува во македонскиот буџет“, реагира Министерството за одбрана на соопштението од политичката партија СДСМ.
„Впрочем, имајќи предвид дека последните седум години со Министерството раководеа кадри на оваа политичка партија, кои ги правеле ИСТИТЕ набавки, се поставува прашањето – дали тие не знаеле што прават, дали се „луксузирале“ со народните пари или сега се обидуваат да стават сомнеж на функционирањето и побарувањата од не било која, туку најценетата и најпочитуваната институција во државата – македонската Армија?
Фактите се следни:
Набавката на кафе и алкохолни пијалоци е спроведена во јавна и транспарентна постапка. Целата документација, вклучително и тендерската документација, договорите и одлуките се јавно достапни на Порталот за јавни набавки и секој граѓанин, новинар или институција може слободно да направи увид, анализа и споредба со набавките од претходните години.
Набавката се однесува на угостителски објекти од отворен тип, кои се користат во рамките на протоколарни, воени и меѓународни активности, а не за „удобност“ на министри, како што лажно се тврди.
Години наназад е спроведена ИСТА ТАКВА НАБАВКА, која оваа година (во споредба со 2023 година) е со многу помали количини, на пример: ставката за алкохолни пијалоци е намалена од 50 до 88 проценти, а жестоките алкохолни пијалоци кои претходно биле набавувани се целосно отстранети.
Сумата на договорот во 2025 година е намалена за 15 проценти во споредба со 2024 година и за речиси 40 проценти во споредба со 2023 година.
Прашањата кои се поставуваат се логични: Или раководството од СДСМ кое го предводело Министерството не знаело што работи и што набавува или политичката партија влегува во едно црно сценарио во кое се обидува да ја вметне и македонската Армија.
Ги повикуваме сите медиуми да не ги земаат предвид ваквите дезинформации кои се пласираат во јавноста особено од страна на политички партии. Борбата со дезинформациите и манипулацијата со фактите е нешто против кое треба сите заедно да се бориме вклучувајќи ги и политичките партии, а не тие да потекнуваат токму од овие кујни.
Се работи за македонските граѓани и за Македонија и токму затоа не смееме да дозволиме граѓаните да бидат излажани“, се наведува во реакцијата од Министерството за одбрана на соопштението од политичката партија СДСМ.
Македонија
Од утре се нормализира сообраќајот на регионалниот пат Нова Брезница – Македонски Брод преку националниот парк Јасен

Утре од 05.00 часот регионалниот пат Р 1106 Нова Брезница – Македонски Брод преку националниот парк Јасен ќе биде пуштен за сообраќај во термините од Министерство за внатрешни работи, извести АМСМ.
Македонија
(Видео) СДСМ Прилеп: Заради протест на вработените, прилепчани останаа без градски превоз

„Систематски, како по книга, ВМРО-ДПМНЕ го уништува Прилеп! Неисплатената плата на вработените во Јавното претпријатие за просторни и урбанистички планови, е причина за тридневниот прекин на градскиот превоз во Прилеп. Како главни виновници за настанатата ситуација, вработените и директорот на јавното претпријатие ги посочија Општината, односно училиштата, кои на претпријатието му должат фантастични 7 милиони денари“, вели Саша Лепиткова, претседателка на Форум на жени на ОО СДСМ-Прилеп.
„Така, неспособноста на градоначалникот Борче Јовчески и аматерското водење на институциите од страна на директорите на ДПМНЕ, ги принуди прилепчани сами да се снаоѓаат и да го решаваат проблемот кој им го сервираше локалната власт.
Со тоа, после само два дена на виделина излегоа лагите за „успешното“ функционирање на локалните институции, кои преку таканаречениот „Отчет“ Јовчески и ДПМНЕ ги презентираа на партискиот „Саем на срамот“ во Скопје.
Лага е дека Општината набавила 5 нови минибуси за градскиот превоз, а уште поголема лага тезата за „огромните“ инвестиции во основните и средните општински училишта.
Да биде трагикомедијата поголема, токму лошото менаџирање на овие институции и нивната меѓусебна спрега, ги доведе во ќорсокак вработените во јавното претпријатие за просторни и урбанистички планови.
Граѓаните на Прилеп немаат никаква дилема дека актуелната владејачка гарнитура на ДПМНЕ, е најлошата од постоењето на градот.
После обврските од 6 милиони евра кои Јовчески и ДПМНЕ му ги оставаат на новиот градоначалник, после испустените јавни претпријатија, прашањето кое се наметнува е – ќе имаат ли време до крајот на мандатот да уништат уште нешто?“, изјави Саша Лепиткова, претседателка на Форум на жени на ОО СДСМ-Прилеп.