Македонија
Мицкоски по најавите за протести од ДУИ: Доколку од мирни и демократски, преминат во насилство, ние мораме да ги одбраниме институциите

Премиерот Христијан Мицкоски смета дека омекнала реториката на ДУИ, која сега најавува протести откога првичните обиди за дестабилизација ѝ биле очигледно осуетени. Мирни протести, според Мицкоски, се демократска алатка и никој не е против, но доколку станат насилни, Владата мора да ги брани институциите.
„Сè додека овие протести се мирни и демократски, ние немаме против. Тоа е убавината на демкратијата, да имаме мислења што се разликуваат. Ние не можеме да имаме исти мислења за сè. Но, доколку тие протести од мирни и демократски, преминат во насилство, тогаш ние мораме да ги одбраниме институциите. Тоа е нормално и очекувано од една Влада, не треба да бидеме изненадени. Ајде да видиме во периодот што следува како ќе се одвиваат работите, па ќе ги коментираме“, рече денес премиерот Мицкоски одговарајќи на нивнарски прашања по промоцијата на апаратот за магнетна резонанција во Поликлиниката „Идадија“.
Лидерот на ДУИ, Али Ахмети, како дел од коалицијата „Европски фронт“, организира посебна прес-конференција со наслов „100 дена скандали, потфрлања, омаловажувања“, на која главен акцент стави на непочитувањето на основните права на Албанците и најави дека како коалиција нема да ја дестабилизираат земјата, туку дека ќе организираат протести, кои се демократско право.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
„Јаневска ги остави без превоз средношколците од Ресен – државата штеди на младите“, велат од партијата Левица

„Целосната неспособност и игнорантски однос на министерката за образование Весна Јаневска ги остави без превоз средношколците од Ресен на самиот почеток од учебната година! Средношколците се извисени поради негрижа на МОН и за нив нема организиран ученички превоз до Битола и Охрид, а единствената „алтернатива“ што државата ја нуди е сместување во интернат со нехумани услови, кои се под секое достоинство“, велат од партијата Левица.
„Учениците биле принудени да аплицираат за прием во интернатот, според строги критериуми за оценки и месечни приходи. Според небулозните правила на МОН, само доколку се одбиени, имаат право на надоместок за превоз, иако автобуски линии нема. Средношколците се присилно обврзани да живеат во интернат, дел од нив одбиле поради ужасните и несоодветни услови, како што е недостиг на вода.
Со оваа политика, власта на ДПМНЕ практично ги казнува учениците што сакаат да се образуваат, ги става родителите под финансиски притисок и испраќа јасна порака дека образованието е привилегија за малкумина, а не право за сите. Наместо безбедни и достапни услови за образование, и оние млади кои се’ уште не се иселиле – се принудени да патуваат со свој трошок или да живеат во средина опасна по нивното здравје и достоинство.
Градоначалникот на Ресен, Јован Тозиевски наместо да молчи пред срамот на неговата партија, должен е во најбрз рок да обезбеди превоз. Со оваа политика, каде владејачката елита штеди на образованието на младите, додека расипнички троши за нејзини привилегии – власта на ДПМНЕ им праќа порака на младите што побрзо да се иселат од држава која не се грижи за нивната иднина“, се додава во соопштението на партијата Левица.
Македонија
Без вода денеска корисниците од улиците на потегот од Владата до градскиот Стадион

Регионалниот центар за управување со кризи на Град Скопје, по добиеното известување од ЈП Водовод и канализација, информира дека, денеска поради изведување на водоводен приклучок ф-80 мм на ул. Наум Наумовски Борче бр. 90, општина Центар, прекинато водоснабдување ќе имаат корисниците од улиците на потегот од Влада на РСМ до градскиот Стадион.
Водоснабдување ќе биде прекинато од 09:00 часот до завршување со работните активности
Македонија
Делови од Кисела Вода и Чучер Сандево денеска без струја

Регионалниот центар за управување со кризи на Град Скопје, по добиеното известување од ЕВН Македонија АД, информира дека: поради технички зафати во електродистрибутивната мрежа, денеска, без електрична енергија ќе останат:
· од 09:00 до 15:00 часот, корисниците од дел од село Бањани и викендиците кон манастирот Св. Илија, општина Чучер Сандево;
· од 10:00 до 11:30 часот, корисниците од дел од улицата Студеничанска, општина Кисела Вода;
· од 10:30 до 12:30 часот, корисниците од дел од улицата Малешевска, општина Кисела Вода.