Македонија
Мицкоски: Светот се менува и ние мора да го фатиме чекорот

Претседателот на Владата Христијан Мицкоски на седницата на Собранието посветена на пратенички прашања ги коментираше своите посети на Вашингтон и Минхенската конференција. Тој истакна дека во периодот се остварени низа контакти и тие контакти ќе се продлабочуваат, а Македонија мора да го фати чекорот со промените кои се случуваат во светот. Тој посебно се осврна на Минхенската безбедносна конференција и говорот на американскиот потпретседател Венс, за кој оцени дека е историски.
„Според мене, говорот на потпретседателот Џеј Ди Венс беше инспиративен историски говор. Сакале ние да признаеме или не, тој говор, а и настаните кои следат, ќе го сменат светот. Дали на некој тоа му се допаѓа или не му се допаѓа, дали тие промени ќе бидат по теркот на очекувањата на поединци или не, не знам, но останува фактот дека светот се менува. Новата американска администрација е предводник на тие промени. Наеднаш немаме офанзивна реторика во светот, без разлика дали станува збор за Украина, Израел, Газа, Блискиот Исток, други конфликти, гледаме дека реториката која сите сега ја прифаќаат и која е предвесник на тие промени, е мир. Така не беше до пред неколку месеци“, рече Мицкоски и посочи дека предолго време светот е заложник на двојни стандарди и на правилото, големите прават што можат, а малите што мораат, бидејќи долго време поединци беа безгласни и молчеливи, чекајќи милост.
Мицкоски истакна дека потпретседателот Венс на Минхенската конференција на многу едноставен начин кажа дека не можеме да зборуваме за заеднички споделени вредности кога има двојни стандарди.
„Нас ни е потребно еднаш за секогаш да се соочиме за вистината и со реалноста, да најдеме решение и да одиме напред. Тоа беше главната порака која ја кажа и според мене, оваа година Минхенската конференција беше токму таква. Понатаму да зборуваме отворено, следниот ден присуствував на обраќањето на претседателот на Украина, Володимир Зеленски, кој многу точно и прецизно рече, “да формираме заеднички безбедносни воени сили кои што ќе ја штитат границата на источното крило на Европа“. Не слушнав некој од публиката да рече ние даваме 10 илјадни војници. Никој не рече, ниту пак тие што претходниот ден негодуваа на реториката на потпретседателот Венс. Ниту пак кога зборувавме за обединување на Европа, не слушнав некој да рече во ред, Европа ги отвора вратите. Не мора ние Македонија, еве ние имаме билатерални проблеми, еве на Украина да ѝ речеа повелете дојдете ве примаме сега во моментот“, рече Мицкоски и дополни: „светот се менува и ние мора да го фатиме чекорот со тоа како малку броен народ“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Пониква станува рехабилитациски центар за повредените од пожарот во Кочани

Повредените од пожарот во Кочани ќе бидат испратени на рехабилитација во Пониква. На денешната седница на Владата и официјално се усвои информација за потреба од обезбедување на рехабилитација во Пониква, за потребите на пациентите.
„Со оглед на природата на повредите, особено кај пациенти кои претрпеле сериозни изгореници, неопходна е долгорочна и специјализирана нега, физиотерапија, психолошка поддршка и континуиран медицински надзор. Туристичкиот центар во Пониква, со своите природни и технички услови, е соодветна локација за спроведување на овој тип рехабилитација“, соопшти Владата.
Потребите кои ќе бидат обезбедени се однесуваат на сместување и терапевтски капацитет за повредените пациенти, ангажман на медицински и физиотерапевтски тим со специјална обука во третман на изгореници, обезбедување психолошка поддршка за пациентите и нивните семејства како и континуирана комуникација со болниците и специјалистите кои ги третираат пациентите во акутната фаза.
Според Владата, оваа иницијатива ќе придонесе не само за физичко заздравување, туку и за психосоцијална стабилизација на повредените лица, со што ќе се забрза нивниот повраток во секојдневниот живот.
Планот, распоредот, начинот на спроведување на продолжената медицинска рехабилитација, како и обезбедувањето на соодветни медицински тимови, ќе биде изготвен од страна на ЈЗУ Општа болница со проширена дејност – Кочани, во соработка со: Министерството за здравство, Јавните здравствени установи вклучени во третманот и рехабилитацијата на повредените пациенти, како и во согласност со потребите и состојбата на самите пациенти и нивните семејства.
„Во таа насока, Владата ја усвои Информацијата за потреба од обезбедување на рехабилитација во Пониква и го задолжи Министерството за внатрешни работи да ги стави на располагање сместувачките капацитети во одморалиштето во Пониква за период од 10 јуни до 20 август. Владата го задолжи Министерството за здравство во соработка со ЈЗУ Општа болница со проширена дејност Кочани и Работната група формирана од Владата во соработка со пациентите да го донесе оперативниот план за рехабилитација. Исто така, трошоците за сместување и оброк на пациентите, како и оброк за медицинскиот кадар се на товар на Министерството за внатрешни работи“, соопштија од Владата.
Македонија
Забрана за возила од денеска на спојот на улиците „Димитар Илиевски Мурато“ и „Широк Сокак“

Од вечерва почнува забраната на моторниот сообраќај од 19:00 до 00:00 часот на спојот на улицата „Димитар Илиевски Мурато“ и улица „Широк Сокак“ во Битола.
„Поради отпочнување на спроведување на одлуката за означување на условите и утврдување на режимот на сообраќај во централното градско подрачје, Ве известуваме дека во периодот 10.06.2025 (вторник) до 10.09.2025 во терминот од 19:00 до 00:00 часот, се забранува моторниот сообраќај со поставување на физички препреки на спојот на улицата „Димитар Илиевски Мурато“ и улица „Широк Сокак“, со што се овозможува безбеден пешачки сообраќај“, соопшти Општина Битола.
Македонија
Стојкоски: Најодговорно изјавувам дека во Ѓорче Петров нема да се градат „хемиски фабрики“

Во последниот период, сведоци сме на сериозни и крајно неосновани тврдења изнесени од страна на градоначалничката на Град Скопје, г-ѓа Данела Арсовска, со кои се обидува да предизвика паника, несигурност и сомнеж кај јавноста околу урбанистките процеси и планови на територијата на Општина Ѓорче Петров, вели градоначалникот Александар Стојкоски, на обвинувањата од градоначалничката на Град Скопје, Данела Арсовска, дека ќе се градат хемиски фабрики.
„Најодговорно, пред целата македонска јавност, изјавувам дека на територијата на нашата општина не постои ниту една локација на која е предвидена, ниту ќе се дозволи, изградба на објекти од тешка индустрија, а уште помалку – таканаречени „хемиски фабрики“, како што таа тенденциозно наведува. Нејзината реторика е обид за свесно извртување на фактите со цел да се наметне лажна слика и политичка конфузија. Ги повикувам сите институции, граѓани и медиуми да ја погледнат реалната слика: На локацијата за која се прават шпекулации, постои постоечки објект со намена Г2 – лесна и незагадувачка индустрија, согласно важечкиот Генерален урбанистички план на Град Скопје, кој и самата градоначалничка има обврска да го почитува“, вели Стојкоски.
Тој вели дека објектот поседува сопствена пречистителна станица, под постојан надзор на Министерството за животна средина и сите релевантни државни органи. До денес, додава Стојкоски, нема ниту една еколошка забелешка или проблем, напротив, тој ги надминува и најстрогите еколошки нормативи пропишани со нашите закони.
„Дополнително, со новиот детален урбанистички план што го усвоивме, три и пол пати е намалена површината со намена за индустрија, во споредба со претходниот план. Тоа е податок што граѓаните мора да го знаат, бидејќи вистината е дека токму нашите одлуки одат во насока на заштита на животната средина и балансиран урбан развој. Очигледна е немоќта и неуспехот во работата на градската власт, што резултира со оваа низа на напади, манипулации и неосновани обвинувања. Од поставување над министерства и инспекторати, сега гледаме обид за наметнување и над одлуките на Уставниот суд, кој веќе донесе јасна одлука дека општина Ѓорче Петров не донела ниту еден противзаконски акт – иницијативата на г-ѓа Арсовска беше целосно отфрлена. Јавноста заслужува одговорно водење, а не евтин политички театар. Ѓорче Петров ќе продолжи да се развива транспарентно, без притисоци, со посветеност на граѓаните и во рамки на законот“, вели градоначалникот на Општина Ѓорче Петров.