Македонија
Мицкоски: СДСМ може да победи на изборите само доколку дојде со наполнети кутии на гласачките места
Претседателот на ВМРО-ДПМНЕ, Христијан Мицкоски, најави дека кандидати за градоначалници ќе бидат лица кои ќе донесат победа на локалните избори за неговата партија. Тој упати порака до граѓаните да излезат и да гласаат посочувајќи: „Добрите луѓе бираат добри политичари, а ако останат дома, добрите луѓе бираат лоши политичари“.
Мицкоски посочи дека се разговара со повеќе партии од другите националности, кои не се дел од коалицијата на ВМРО-ДПМНЕ за заеднички настап на изборите.
„Профилот на луѓето е дека тие се победници, чесни и честити луѓе, кои доаѓаат од општини каде што се познати на жителите на тие општини, луѓе кои се комплетно нови, луѓе коишто за првпат се кандидираат за политичка позиција во општините од каде што доаѓаат и луѓе кои се дијаметрално спротивни од актуелната реалност којашто ја застапува СДСМ во тие општини преку нивните градоначалници, кои очекуваме да бидат повторени и на овие локални избори. Очекуваме во сите овие 15 општини, кој ќе бидат презентирани, сериозна победа. За имињата и родовата застапеност, ќе почекате“, додаде Мицкоски.
Тој уверува дека ВМРО-ДПМНЕ има повеќе кандидати кои ќе донесат победа на локалните избори во Скопје, но дека ќе го кандидираат тој што ќе донесе најубедлива победа до сега.
„Има многу кандидати кои можат да бидат успешен кандидат и победник на дуелот со Петре Шилегов. Ние сакаме победата да биде најубедлива до сега што се случила и тоа да биде знак дека времето во политиката на политички измамници како профилот на актуелниот градоначалник на Скопје и актуелниот премиер во Владата е минато. Разговараме со албански, турски, српски, бошњачки, влашки, разговараме и со други политички партии кои не се дел од нашата коалиција. За многу бргу денеска ќе ја дознаете и структурата на политички партии кои ќе го поддржат кандидатот или кандидатката која ВМРО-ДПМНЕ ќе ја предложи за кандидат за Град Скопје“, рече Мицкоски.
Според Мицкоски, СДСМ може да победи на изборите само доколку дојде со наполнети кутии на гласачки места, но не и на фер и демократски избори.
„Човек којшто е уплашен на три-четири месеци пред избори дава предикции. Не сум убеден дека СДСМ во тие општини ќе биде победник, туку убедливо поразен. Во најголем дел од тие општини кои ги споменавте, доколку изборите бидат фер и демократски. Доколку дојдат со наполнети кутии, тоа е единствениот начин СДСМ да биде победник во тие општини“, рече тој.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Николовски: Системот на злоупотреби што го создаде Владата ја уништи довербата – земјоделците повторно ќе ја плататат цената
„Колку пати алармирав и предупредував дека во Агенцијата за финансиска поддршка на земјоделството и руралниот развој се создава систем на клиентелизам, влијанија и злоупотреби?“, порача поранешниот министер за земјоделство, Љупчо Николовски, реагирајќи по апсењето на директорот на Агенцијата при земање мито.
„Јавно укажував дека ИПАРД 3 ќе крахира, дека со вакви практики се загрозува кредибилитетот на државата пред Европската комисија и се става под ризик целата програма вредна околу 100 милиони евра – пари наменети за развој на македонското земјоделство“, изјави Николовски.
Според него, денешниот скандал е директна последица на политичко поставување на луѓе без интегритет и без компетенции.
„Ова не е изолиран инцидент, туку резултат на владеење кое ги заменува вредностите и професионалноста со партиска послушност“, нагласи тој.
Николовски потсети дека за време на неговиот мандат ИПАРД 2 програмата беше 100% искористена, со 2.369 договори и реализирани инвестиции.
„Срамно е целиот тој успех и довербата што ја изградивме со Европската унија да биде уништена за само една година поради корупција и лични интереси“, додаде тој.
Тој предупреди дека постои реална опасност Европската комисија да ја стопира ИПАРД 3 програмата за Македонија, што би значело блокада на сите исплати и нови повици.
„Ако се случи тоа, земјоделците повторно ќе бидат жртви на корупцијата и неспособноста на оваа власт“, порача Николовски.
Поранешниот министер побара итна одговорност и расчистување со злоупотребите:
„Време е за целосна одговорност. Македонија не смее да си дозволи да ја изгуби довербата во европските институции поради поединци кои го претворија земјоделството во извор на мито и политички влијанија.“
Македонија
Делови од Центар и Сарај в понеделник без вода
Од ЈП Водовод и Канализација, известуваат дека зафатот кој беше најавен за денеска поради одредени технички пречки се одложува за понеделник.
Поради изведување на водоводен приклучок ф-100мм на ул. Христо Смирненски 13, од 09:00 часот до завршување на интервенцијата, прекинато водоснабдување ќе имаат корисниците од дел од истата улица, поточно потегот од Зур – Маркет до бул. Партизански Одреди, во општина Центар.
Исто така во понеделник ќе се изврши редовно чистење на резервоарот за питка вода во село Рашче. За време на активностите во периодот од 09:00 – 13:00 часот, прекинато водоснабдување ќе имаат корисниците од населените места: Рашче Копаница и Бојане, општина Сарај.
Македонија
До понеделник променливо облачно време со локални врнежи од дожд
Променливо облачно време со локални врнежи од дожд кои повремено ќе бидат пообилни. Процесите ќе бидат поинтензивни во форма на невреме со пообилен пороен дожд (над 30 l/m² за 24 часа), засилен ветер и појава на грмежи. Ќе дува умерен до засилен ветер од јужен, а долж Повардарието од југоисточен правец. Минималната температура ќе биде во интервал од 6 до 12, а максималната ќе достигне од 12 до 17 степени.
Во Скопје, променливо облачно со повремени врнежи од дожд. Ќе дува умерен до засилен југоисточен ветер. Минималната температура ќе се спушти до 10, а максималната ќе достигне до 16 степени.
Времето во наредните денови
Под влијание на влажна и нестабилна воздушна маса до понеделник ќе преовладува променливо облачно време со локални врнежи од дожд кои повремено ќе бидат пообилни. Процесите ќе бидат поинтензивни во форма на невреме со пообилен пороен дожд (над 30 l/m² за 24 часа), засилен ветер и појава на грмежи. Од вторник се очекува стабилизирање на времето.

