Лидерот на ВМРО-ДПМНЕ, Христијан Мицкоски, преку својот фејсбук-профил упати отворено писмо до премиерот на Владата, Зоран Заев.

Во писмото, Мицкоски наведува дека паднале маските и се покажало вистинското лице на власта. Тој вели дека СДСМ, преку неприфаќањето на предлогот за независно обвинителство, се ставил во улога на заштитник и промотор на криминалот.

„Преку неприфаќањето на предлогот и неговото молчење за формирање независно обвинителство што ќе се бори против криминалот одбра да се стави во улога на заштитник и промотор на криминалот, неправдата и беззаконието во оваа држава. Дополнително со тоа покажа дека борбата против криминалот е само фарса за оваа власт и дека токму таа кумува со сите криминални процеси во државата“, нагласува Мицкоски во отвореното писмо.

Понатаму, додава дека Заев не се откажува од штетниот договор и не ја почитува волјата на граѓаните кои го отфрлија договорот на референдум.

Договорот преку кој Заев сака да ги прекрсти на сила државата и народот, вели Мицкоски, е последната сламка за спас на неговата кариера и неуспешен обид да избега од одговорност за сите афери и скандали.

„Нема друга држава во светот каде што премиерот отворено си кажува дека нема да ја почитува волјата на мнозинството граѓани и јавно кажува дека поисплатливи му се јаловите обиди за условување и уцена на пратеници. Тоа нема да помине“, порача Мицкоски.

Лидерот на ВМРО-ДПМНЕ зборува и за изборите, критикувајќи ја власта дека се плаши од слободни, фер и демократски избори.

„Со отфрлањето на предлогот што го дадов, Заев и власта покажаа дека се плашат од слободни, фер и демократски избори, затоа што знаат дека на тие избори народот ќе си дојде по своето и ќе бидат жестоко поразени, како што беа и на референдумот што помина. Затоа би порачал уште еднаш да размисли власта и премиерот, затоа што не е сеедно кој на чија страна бил. Јас веќе одбрав, со народот, на страна на правдата и нашата Македонија“, нагласува Мицкоски во отвореното писмо.