Македонија
Мицкоски – Ѓорѓиевски на генералното собрание на ЗЕЛС: Поголема поддршка за општините за подобро утре на сите граѓани

Денес, се одржа шестото генерално собрание на единиците на локалната самоуправа, на кое присуствуваше и претседателот на ВМРО-ДПМНЕ и мандатар за состав на новата влада, Христијан Мицкоски.
Како што рече во изјавата за медиумите, во периодот што следува општините ќе имаат големо значење затоа што голем дел од капиталните проекти за потребите на граѓаните ќе бидат реализирани преку општините.
„Нашите граѓани имаат основни егзистенционални проблеми, во центрите на поголемите урбани средини се гази во кал, ниту 20 % од територијата не е покриена со организирани канализациски системи, а да не зборувам за нивно прочистување. Имаме средини во кои немаме ниту пивка вода за пиење, имаме руинирани детски игралишта, гледате каква е состојбата со демографијата во Македонија – за неколку години за 30 % е намалена бројката на дечиња што се раѓаат. Имаме руинирани училишта, долги листи на чекање во градинките и сето тоа треба да претставува приоритет и ќе претставува приоритет на идната влада. Она што јас можам да го кажам е да бидат подготвени сите градоначалници, без разлика од која политичка партија да доаѓаат, да работат на проекти. Наесен, во првата половина од септември, а можеби, ако сè биде како што треба со ребалансот, уште во август ќе биде објавен повикот за оваа година. Минимум 6 милијарди денари, минимум 100 милиони евра, иако јас се обидувам да обезбедиме и денар повеќе, но веќе в година повикот ќе биде објавен на почетокот на годината и 250 милиони евра од централниот буџет ќе бидат за општините. Нашата цел е да во првите четири години од нашиот мандат да допреме до 400.000 домаќинства, да ги решиме основните егзистенционални суштински проблеми. Преку општините да ја донесеме работата на владата до домот на секој граѓанин. Сигурен сум дека ќе успееме, знам дека станува за амбициозна група на градоначалници, кои ќе дадат сè од себе да направат проекти бидејќи сите тие се избрани од народот и треба да бидат слуги на народот и пред народот да одговораат“, рече мандатарот Христијан Мицкоски.
Претседателот на ЗЕЛС и градоначалник на општина Кисела Вода, Орце Ѓорѓиевски, најпрвин го поздрави идниот премиер Христијан Мицкоски, кој од самиот почеток се одѕвал на поканата да присуствува на генералното собрание, што е од голема суштинска важност земајќи предвид дека во изминатите две и пол години градоначалниците имале блокада од централната власт.
„Како ЗЕЛС не наидувавме на разбирање од страна на веќе поранешната власт за ниедно прашање, дури и за оној основен дел, меморандумот за соработка помеѓу ЗЕЛС и Владата, кој внатре ги содржи проблемите, кои заеднички треба да ги решаваме, беше одбиван да се потпише. Ако по утрото денот се познава, тоа значи дека со новата власт ќе имаме беспрекорно добра соработка. Верувам дека ќе имаме голема реализација на проекти во сите општини во Македонија и секако надминување на сите оние долготрајни проблеми со кои се соочуваме, а се поврзани со децентрализацијата, проблемите за пожарникарите, проблемите со кучињата скитници итн. На ова генерално собрание ќе разговараме, покрај проблемите, и за некои законски регулативи и предлог-закони што допрва треба да бидат донесени, а се во полза на општините и граѓаните, како закон за комунална полиција итн. Се надевам дека ќе имаме плодна и исцрпна дебата, премиерот на новата влада ќе има и свое обраќање на ова собрание. Претседателе, уште еднаш благодарам за вашето присуство и се надевам дека сè денес ќе помине во најдобар ред“, истакна Ѓорѓиевски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Не е вистина дека има цијанид стотици пати над дозволеното во Крива Река, рече директорката на инспекторатот, Гиновска

Директорката на Државниот инспекторат за животна средина, Ивана Гиновска, ги отфрла тврдењата кои ги презентираше градоначалникот, Сашко Митовски, повикувајќи се на анализи на акредитирани лаборатории, дека во Крива Река има цијанид стотици пати над дозволеното, по хаваријата во „Тораница“.
„Ги демантирам шпекулациите дека тој ден инспектори од Државниот инспекторат не излегле на терен. Ги отфрлам сите обвинувања дека јас имам изјавено оти се излеала само вода. Таква изјава не постои. Ги демантирам шпекулациите дека има помор на риби во Крива Река. Од 14.03 до денес не е забележан помор. Одговорно тврдам дека цијанид неколку стотици пати над дозволеното во Крива Река, нема, како што твдеше грдоначалникот на 28 март“, рече таа и додаде дека за ширење паника на населението кривично се одговара.
Сепак, директорката потврди дека инспекторите дента кога се случила хаваријата не зеле мостри. Инспекторите се самостојни во своите одлучувања, самите прават проценка, рече таа одговарајќи на новинарско прашање. На нејзино барање, потоа биле земени примероци од шест точки, меѓу кои и онаа на која градоначалникот утредента зел мостра. Резултатите, вели, не се такви какви што ги презентирал градоначалникот.
Прашана дали тоа значи дека се спорни резултатите на акредитираните лаборатории, Гиновска рече: „Не тврдам и не навлегувам во тоа дали се спорни, но резултатите кои беа прочитани од страна на градоначалникот не беа веројатно точно прочитани. Тој направи паника и рече дека неколку стотици пати над дозволеното има цијанид“.
Според анализите на акредитираните лаборатории кои ги има таа, цијаниди во Крива Река има помалку од два.
„Како директор ги побарав сите досегашни испитувања и ми се доставени на увид. Ќе ги достави сите анализи до кумановското јавно обвинителство кое веќе отвори случај – и нивните, и на риболовното друштво „Мрена“ и на компанијата „Булмак“, и на градоначалникот“, додаде.
Директорката рече и дека „екоцид“ не се докажува со земање на еден литар вода, од едно место, само еден примерок, туку со сеопфатна анализа.
Таа заклучи дека предметот со Крива Река е сензитивен и не смее да се користи за дневно политички препукувања.
На компанијата „Булмак“ 2016, додаде таа, изречена им е казна од 180.000-200.000 евра за правниот субјект и 10.000 евра за одговорното лице, која е најголема казна во законот за животна средина. Компанијата потпиша спогодба и предметот е предаден на Комисијата за спогодување, при Министерството за животна средина и просторно планирање.
Директорката на ДИЖС рече дека ќе ги превземе сите соодветни мерки во согласност со законот и ќе ја информира јавноста за следните чекори.
Митовски претходно откри дека во водата има десет пати поголема концентрација на олово и стотици пати повеќе цијанид, азот и фосфор по инцидентот на 14 март.
Македонија
90 отсто од дишните органи на 29-годишниот Карадакоски биле изгорени од пламенот што го вдишал, утврдиле лекарите во Литванија

Директна причина за смртта на 29-годишниот Александар Карадакоски, кој утрово почина во Литванија, се изгореници на дишното стебло, извести попладнево Небојша Настов, директор на Клиниката за хируршки болести „Св. Наум Охридски“, каде што Карадакоски бил згрижен пред за отпатува во Литванија. Во болницата бил примен околу 6 часот на 16 март. Во текот на денот му се влошила состојбата, па во попладневните часови бил ставен на вештачко дишење, а истовремено му ги лекувале и изгорениците.
„Вкупната површина на изгорениците е некаде околу 36 %, кои претежно се наоѓаа во пределот на главата, вратот и горните екстремитети со длабочина од втор и трет степен, што само за себе кажува за интензитетот на пламенот што го има зафатено. Поради делот од пламенот и чадот што ги вдишал, доаѓа до оштетување на внатрешните дишни органи, што е потврдено и од страна на колегите од Литванија во разговор со нашите анестезиолози при брифирањето за здравствената состојба на пациентите, што морам да кажам дека се одвиваше редовно, секој ден или на секои два дена. Утврдено е со бронхоскопско испитување дека е оштетен голем дел од дишното стебло и како последица на тоа доаѓа до влошување на состојбата, која на крајот резултирала со подлегнување на повредите на 29-годишниот Александар Карадакоски“, рече директорот Настов.
Карадакоски останал во „Св. Наум Охридски“ речиси 24 часа пред да биде транспортиран во Литванија со медицински санитетски авион.
Министерот за здравство Арбен Таравари рече дека Карадакоски бил во најкритична состојба од сите 193 лица повредени во пожарот во дискотеката.
„Тој беше најтешкиот пациент. Му откажа функцијата на бубрезите на 1 април, беше ставен на дијализа, практично имаше рани на 36 % од телото од втор и трет степен, што отвора простор за инфекции и тоа е таа компликација плус дишните патишта, изгореници на дишните патишта околу 90 %“, рече министерот Таравари.
Министерството за надворешни работи веќе го организира враќањето на телото на Карадакоски. Министерот Таравари рече дека обдукцијата ќе ја направи Судска медицина во Скопје, а сите трошоци ќе бидат покриени.
Карадакоски е еден од 116 пациенти испратени на лекување во странство по пожарот во дискотеката во Кочани. Денес, од лекување во странство треба да пристигнат уште шестмина пациенти, по двајца од Бугарија, Шпанија и Унгарија, па во странските болници ќе останат 69 пациенти. Од нив тројца се во критична состојба.
Во болниците во Скопје во овој момент се лекуваат 14 пациенти, а за петмина веќе е договорен испис.
Македонија
Филипче: Велеа дека лидерска е губење време, па обвинуваат за моноетничност, ги повикувам повторно

Јас повикав на средба со сите претседатели на политичките партии и, да ве потсетам, претседател на една албанска партија рече дека тоа би било губење време (се мисли на Таравари), а сега нè обвинуваат за некаква моноетничка средба. Ова го истакна претседателот на СДСМ, Венко Филипче, во одговор на новинарско прашање поврзано со обвинувањата од албанскиот блок на политичките партии дека вчерашната средба во Владата со премиерот Христијан Мицкоски е план за моноетничка соработка.
„Јас на тој состанок го претставував СДСМ, а премиерот Христијан Мицкоски ВМРО-ДПМНЕ, и ние се состанавме како лидери на двете најголеми партии во македонскиот блок. Притоа премиерот Мицкоски беше првиот што без забелешка и единствен што ја прифати поканата за средба“, истакна денеска Филипче од Струмица.
Тој уште еднаш упати јавен повик до сите политички партии за организирање лидерска средба.
„Апсолутно, сметам дека треба да продолжиме во следниот период во насока на организација на средба на лидерите на сите поголеми политички партии. Ова нека биде уште еден мој повик до сите партии бидејќи јас тука не гледам никаква потреба да се делиме на македонски или албански блок кога станува збор за интересите на државата“, потенцира претседателот на СДСМ.
Филипче истакна дека никој нема право да го обвинува Социјалдемократскиот сојуз на Македонија за етнички или националистички политики или пристап имајќи предвид дека во извршниот одбор на СДСМ има Албанец, Македонка муслиманка, а во следниот период ќе има и Ромка.
Претседателот на СДСМ повтори дека вчерашната средба со премиерот била конструктивна и на неа било договорено формирање заеднички тела или групи што ќе работат на подготовката на законите од реформската агенда, со фокус на правосудството, енергетиката и стратешките проекти во здравството, а кои треба да стигнат во Собранието.