Македонија
(Видео) Мицкоски ја напушти лидерската средба

Претседателот на ВМРО-ДПМНЕ, Христијан Мицкоски, по еден час, ја напушти лидерската средба. Тој изрази револт за предлогот на Владата за измени на Изборниот законик, со кој се предлага новиот состав на ДИК, наместо со двотретинско мнозинство, да се избира со помалку гласови од пратениците. Тоа, според Мицкоски, е недемократски.
„Ние бевме дел од таканаречената лидерска средба. Навистина не беше јасен концептот зошто сите парламентарни партии не се поканети и изразивме револт и ја напуштивме средбата. Му го кажавме барањето на Заев пред понеделик да свика лидерска средба со партиската четворка за сите сегменти што треба да се утврдат пред да се формира новиот состав на ДИК“, рече Мицкоски по напуштањето на средбата со неговата придружба, професорката Тања Каракамишева.
Тој побара премиерот Заев да свика нова лидерска средба, на која би присуствувале лидерите на најголемите четири политички партии од власта и опозицијата.
Го повтори ставот на партијата дека за нив не е единствен приоритет изборот на ДИК, туку во пакет треба да се донесат сите реформски закони како што било договорено меѓу партиите.
Другите претставници на политичките партии сè уште се внатре на лидерската средба по што се очекуава, по завршувањето, и тие да ги кажат своите ставови.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Од денес пуштен во употреба магистралниот пат Охрид-Св.Наум, најави Владата

Македонија се гради. Денес официјално ќе биде пуштен во употреба магистралниот пат Охрид-Св.Наум во должина од 24,3 километри, најавуваат од Владата.
Вредноста на проектот за реконструкција на овој патен правец, како што е појаснето во официјалното соопштение изнесуваше 11,7 милиони евра.
„Ова значи дека по речиси 4 децении, не само охриѓани, туку голем број на граѓани ширум државата, но и туристи ќе можат да патуваат од Охрид до манастирскиот комплекс Св. Наум, но и до соседна Република Албанија, по нов патен правец.
Овие капитални проекти го подобруваат не само туристичкиот, туку и економскиот напредок и развој во Македонија.
Владата работи и создава дела за просперитет на Македонија“.
Македонија
Без вода дел од Кисела Вода

Регионалниот центар за управување со кризи на Град Скопје, по добиеното известување од ЈП Водовод и канализација, информира дека денеска поради изведување на водоводен приклучок на водоводна мрежа со пречник од Ф-150 мм на улицата Христо Татарчев бр. 47, прекинато водоснабдување ќе имаат корисниците од истата улица и кулите – Расдник, oпштина Кисела Вода.
Водоснабдувањето ќе биде прекинато од 09:00 часот до завршување на работните активности.
Македонија
Сончево и топло, максималната температура ќе достигне до 34 степени

Времето денеска ќе биде сончево и топло со мала локална облачност. Ќе дува слаб до умерен, а наместа долж Повардарието повремено засилен ветер од северен правец. Минималната температура ќе биде во интервал од 9 до 19, а максималната ќе достигне од 27 до 34 степени.
Во Скопје, сончево и топло. Ќе дува умерен, во делови од котлината повремено засилен ветер од северен правец. Минималната температура ќе се спушти до 17, а максималната ќе достигне до 34 степени.
Времето во наредните денови
Во следните денови времето ќе биде стабилно, претежно сончево и топло. Ќе дува умерен, во сабота наместа долж Повардарието повремено засилен северен ветер.