Македонија
Мицкоски: Ќе почнеме со ветинг од политичарите зошто не се сите исти, има и чесни

Лидерот на ВМРО-ДПМНЕ, Христијан Мицкоски вечерва од скопски Карпош порача дека на 15 јули се одлучува каква држава сакаме, држава со корупција, криминал или обновена со чесни луѓе.
„ На помалку од две недели од сега на 15 јули граѓаните ќе треба да одлучат во каква држава сакаат да живеат, држава со криминал, корупција или она што го велиме политичко мочуриште или држава со напредни прогресивни сили со чесни луѓе. Тие имаат истрошени политичари, но некако на грбот на народот се уште опстојуваат и немаат што да понудат, ние имаме амбициозни и мотивирани да се справат со предизвиците. Ја чувствувам енергијата на народот кој е за промени, кој сака да си ја врати државата која му беше киднапирана. За тоа да се случи треба масовно, рано наутро да излеземе и да гласаме да заокружиме број 14, да заокружиме за победничката листа. Почетокот на патот е на 15 јули и секој од нас ќе има прилика позади параванот гласно да зборува“, рече Мицкоски.
На граѓаните, Мицкоски им посочи, дека политичкиот противник веројатно ќе дојде и ќе се колне во жицата, во семето, и ќе ве убедуваат дека сега можеле повеќе. Можеа, да можеа, ама не е логично додаде тој, да велат дека им требаат сега уште четири години.
„ Можеа реформи, можеа повисоки плати, пензии. Можеа подобра реформа во судството, а не да бидеме хибриден режим. На дното на Европа сме, можеа наместо да распродаваат достоинство и чест, можеа да напарават подобри договори. И да наместо правда донесоа по некоја Луј Вутон чанта и по некоја трас-трас одлука во судството. Само неправда, срам, понижувања и омаловажувања донесоа. Тоа е таа е суровата реалност, а јас ја одбивам и правам се да ја променам. Треба масовно да се спротивставиме на оваа корупмирана власт, која не пљачкосува и срами, и убеден сум дека тоа ќе смени“, рече Мицкоски.
Претседателот на ВМРО-ДПМНЕ се осврна и на неколку економски показатели со кои укажа како се однесуваа оваа власт.
„ Неколку бројки кои ја отсликуваат економијата се следниве, индустриското производство во мај годинава е за 27 проценти помало од истиот период во 2019 година. Потоа, бројката на работници во индустријата е за 5 проценти помала во април, мај од истиот период минатата година. Дефицитот е 26 милијарди денари пари потрошени во обид за поткуп, повеќе од 420 милиони евра заклучно со 30 јуни се потрошени, толку тежи обидот на Зоран Заев да тргува на овие избори“, кажа Мицкоски.
Ова народот го гледа, рече Мицкоски и додаде, „затоа народот ќе им го заврти грбот“. Мицкоски укажа дека ВМРО – ДПМНЕ реформата ќе ја започне од самите политичари.
„ Ние нема да почнеме од судството, туку од политичарите. Тој што се огрешил ќе одговара, ние ќе почнеме од политичарите, ветинг за нив, да видиме кој, како ќе се богател додека работел, како преку ноќ стануваат велепоседници во оваа држава, како цути семејниот бизнис. Еве јас се пријавувам прв да има податоци за мене и за моето семејство, но ќе треба сите по ред. Не можеме да правиме држава ако не знаеме кој се богател на маката на народот, зошто не се сите политичари исти, има и чесни луѓе кои ја љубат татковината, кои сакаат да испишат историја. Ние сме многу различни од нив и тоа заедно ќе им го покажеме на 15 јули. И следниот пат ќе зборуваме за отчетот што сме направиле од читанката Проект – Обнова во кој има и 25 проценти повисока плата, но со јасна методологија и план и 20 проценти раст на пензии, и инвестиции …“, рече Мицкоски укажувајќи дека ВМРО-ДПМНЕ и во вакво тешко време може да направи реформи.
На крајот тој ги повика сите граѓани на 15 јули рано наутро, да излезат и да гласаат да се стави крај на обезличувањето, корупцијата криминалот, а тоа како што потенцираше ќе се направи со заокружување на број 14.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Сите ученици ќе имаат учебници на почетокот на новата учебна година и тоа по сите предмети, велат од МОН

Сите ученици ќе имаат учебници на почетокот на новата учебна година и тоа по сите предмети согласно наставните планови во соодветните одделенија. Втора година по ред печатењето и испораката на учебниците се реализира навремено, а секое училиште ќе го добие тиражот кој го има побарано преку посебната електронска апликација на Министерството за образование и наука.
Обезбедени се и учебници по странските јазици, за прв пат после седум години во кои недостигаа, а наставниците и учениците самостојно се снаоѓаа со литература. Нови учебници со унапредена содржина има и за седмо одделение во основното образование и за прва година во гимназиско образование, каде започнува примената на нови наставни програми. Над 100 нови наслови ќе бидат достапни и за учениците од средните стручни училишта, велат од МОН.
Изработката, печатењето и испораката на учебниците беше голем предизвик во минатото. Прашањето е системски решено, со новиот Закон за учебници во чија изработка учествуваа сите засегнати чинители, вклучително и автори, рецензенти, но и сите издавачки куќи во државата.
Сите надлежни институции, органи и тела кои учествуваат во постапката за обезбедување на учебници, доследно и навремено ги исполнија своите должности, за што Министерството за образование и наука изразува благодарност и повикува заедничкото делување за обезбедување на подобро образование да продолжи и понатаму. Учебниците се основен услов за квалитетен воспитно – образовен процес, се додава во соопштението на МОН.
Македонија
(Видео) „Додека граѓаните тонат во сиромаштија, власта ги држи платите ниски“, вели Филипче

Претседателот на Социјалдемократскиот сојуз на Македонија, д-р Венко Филипче, на денешната прес-конфренција за економските политики на Владата, предупреди дека граѓаните сè повеќе тонат во сиромаштија, додека власта свесно одбива да интервенира со мерки за справување со инфлацијата и растот на цените.
„Она што станува сè појасно е дека оваа власт свесно ја разгорува инфлацијата, бидејќи им го полни буџетот и им ги зголемува профитите на блиските фирми. Граѓаните плаќаат, олигарсите заработуваат. Македонија се претвора во земја на сиромаштија и неизвесност. Што друго може да го објасни фактот дека власта ништо не презема за инфлацијата и растот на цените“, изјави Филипче.
Тој посочи дека додека соседните држави, вклучително и Србија, редовно носат мерки за контрола на цените и заштита на стандардот, македонската Влада останува целосно пасивна.
„Сите земји во околината, вклучително и Србија, имаат редовни и навремени мерки за цените и инфлацијата. Кај нас тоа веќе не е тема – власта нема намера да регулира буквално ништо за да ги заштити граѓаните“, рече Филипче.
Во однос на изјавата на премиерот Мицкоски дека платите „не смееле да растат затоа што имало инфлација“, Филипче изјави дека тоа е економска неукост.
„Продуктивноста расте само ако платите растат – тоа е елементарна економска логика. Или, ако сака премиерот со конкретни бројки – нашата продуктивност е 55% од европскиот просек, а платите само 35%. Значи проблемот не е во работниците – проблемот е во владата што ги држи платите ниски за да им одговара на бизнис-елитите“, рече Филипче.
При тоа, тој посочи дека цените во Македонија достигнуваат 60% од европскиот просек, додека платите остануваат далеку под нивото – само 35% од европскиот просек.
„Сите економски експерти на власта постојано повторуваат дека кај нас се живеело добро ако биле ниски платите, а куповната моќ била висока. Но фактите повторно зборуваат друго. Македонската просечна плата е само 35% од просечната плата во ЕУ, а цените достигнуваат 60% од европскиот просек на цени. Поразително е тоа што го покажуваат последните податоци на Евростат“, нагласи претседателот на СДСМ, Венко Филипче.
Македонија
Кандидатурата на Амар Мециновиќ ја втурна ДПМНЕ во паника, велат од партијата Левица

„Само неколку дена по кандидатурата на Амар Мециновиќ за градоначалник на Скопје, ВМРО-ДПМНЕ сфати дека освојувањето на главниот град нема да биде така лесно. Наместо со идеи и програма, побрзаа со обвинувања дека Левица наводно влегла во политички договор со СДСМ и ДУИ за да се обезбеди втор круг“, велат од партијата Левица.
„Ваквите конструкции се ништо друго освен израз на паника и признавање на сопствената слабост. Левица пред избори ниту се договара, ниту коалицира со било која партија, тоа е јасна и недвосмислена позиција. Но, очигледно е дека ВМРО-ДПМНЕ стои на стаклени нозе и бара начин да се оправда пред сопствените гласачи, особено што деновиве излегоа и податоци дека имаат губитоко од околу 150.000 гласа.
Патетично претставуваниот „лав“ излезе дека е само мало маче, немоќно да се соочи со вистински политички предизвик. А на избори, токму Амар ќе им покаже колку е тенка нивната лага и колку лесно нивниот „лав“ се претвора во маче пред граѓаните на Скопје. Амар ќе биде обединувачката сила која ќе ги сплоти сите чесни и слободоумни луѓе на кои им е преку глава од 30-годишните деструктивни и ограбувачки политики на ДПМНЕ, СДС, ДУИ и ВРЕДИ“, се наведува во соопштението на партијата Левица.