Македонија
Мицкоски: Aпелирам на вонредна состојба веднаш, ситуацијата е алармантна

„Загрижен сум за алармантноста на состојбата со ширењето на заразната пандемија, особено што отсуствува брза и одлучна реакција на надлежните институции во делот на примена на помасовни мерки, кои ќе придонесат за намалување на последиците. Неопходно е итно дејство на Владата и носење одлуки, кои подразбираат и посериозни фискални импликации и поголема мобилност на институциите во справување со состојбата на терен. Токму затоа пред 6 дена побарав прогласување кризна состојба“, изјави лидерот на ВМРО-ДПМНЕ, Христијан Мицкоски.
Од вчера, пак, се наметна нова дилема и таа е присутна во јавноста за прогласување кризна или вонредна состојба.
„Јас побарав воспоставување кризна состојба затоа што тоа е степен повисоко во сериозноста на пристапот, квалитетот и мобилноста на справување со последиците од коронавирусот за разлика од воведувањето вонредна состојба, во која целата власт се сосредоточува во рацете на еден човек, што, ќе се согласите, и не е толку демократски. Но, ова и во овој случај е секундарно затоа што примарни се здравјето на граѓаните и итното дејствување.
Ова ќе отвори можност за носење акти со законска сила, кои би можеле да се злоупотребат и е состојба за која, иако е уставна материја, не е прецизно дефинирана со законот. Сè што не е прецизно дефинирано може и да биде злоупотребено. А воедно, вчера со директно признание на претседателот Пендаровски дознавме една поразителна информација – дека постои дилема за воведување кризна состојба бидејќи има недостиг на државни ресурси квалитетно и ефикасно да се покрие државата, што е огромен скандал, особено ако кризата се продлабочи, за што упатуваат сите сериозни фактори, но во овие моменти од посочување на показалецот нема фајде и ова е посебна тема за која ќе зборуваме и ќе се навратиме кога ќе заврши цела оваа состојба со пандемијата на коронавирусот“, вели тој.
Во овој момент постои и дилема кај правните експерти за што е поделотворно да се примени. „Она што денес сакам да го соопштам е фактот дека иако јас и понатаму сметам дека многу бргу ќе дојдеме во фаза да прогласиме кризна состојба на одделни делови од територијата на Македонија, сепак сметам дека Владата доцни со мерките, а кризата ќе се зголемува.
Поради итноста и алармантноста на состојбите на терен, но и неопходноста да се помогне на граѓаните, апелирам денес до претседателот Пендаровски да прогласи, според Уставот, вонредна состојба во Македонија што побргу. Да не се губи драгоцено време, а поважно од тоа дали е вонредна или кризна состојба е мерките и помошта да стигнат до граѓаните. Да не навлегуваме во правните дилеми, туку да навлеземе во решавање на проблемите на граѓаните. Повторувам, да не навлегуваме во правните дилеми, туку да навлеземе во решавање на проблемите на граѓаните и заштита на нивното здравје и веднаш претседателот Пендаровски да прогласи вонредна состојба. Да не се фокусира владата само на ПР, туку на работа на терен и итно дејствување“, вели Мицкоски.
Според него, претстои сериозна здравствена, санитарна и економска криза.
„Мора Владата да обезбеди бесплатни маски за граѓаните. Мора да ги казни компаниите што се обидуваат енормно да спечалат преку продажба на медицински препарати и средства. Да заштити од бран покачувања на цените на основните производи. Мора да се погрижи за соодветни услови за одвивање на здравствената нега, но и воедно добивам загрижувачки податоци дека има ограничени количини крв од само неколку дена, што мора да се надмине што побргу. Владата мора да ги награди и медицинскиот персонал, докторите и сите други служби што се на првата линија на борба со пандемијата. Тие мора да добијат почит за својата храброст и посветеност. Исто така, економијата бара мерки со кои веќе сериозно се доцни.
Ќе се осврнам на оваа тема подетаљно. Средствата за придонеси и плати во директно погодените дејности што треба да се исплатат за еден месец изнесуваат 80-ина милиони евра. А тие компании во моментот, во март, имаат заработка од нула денари. Истите овие фирми треба да платат 15-ина милиони евра ДДВ, а во март, ќе повторам, имаат приход од нула денари. Почнаа првите отпуштања вработени и клуч на врата за компаниите. Да напоменам, 70-ина проценти од овие компании се мали претпријатија од еден до десет вработени. Во клучните два месеца очекуваме негативното влијание во економијата да изнесува цели 220 милиони евра. Или месечно се губат по 110 милиони евра само по овој основ.
И ова е најважното, денес Владата излезе со пакет мерки од некоја си кредитна линија во вредност од 5 милиони евра за компаниите, а тие губат по 110 милиони евра месечно. Помошта од кредитната линија од 5 милиони евра на Владата во услови кога се губат 110 милиони евра, каде што нема за плати и придонеси, се затвораат фирми, не само што не е доволна туку е и смешна и навредлива. Ако не помогнат државата и Владата, нема од каде. Секој ден без помош значи банкрот за многу компании. Црвениот аларм е вклучен. Од информациите што стигаат до нас една компанија, која беше корисник на средства од Агенцијата за финансиска помош и поддршка, а беше поврзувана со името на еден поранешен функционер во Владата на Зоран Заев, од петокот е затворена и 150 вработени од таа компанија се на улица. Веднаш по прогласувањето вонредна состојба, да се донесат владини одлуки со законско дејство. Потребно е замрзнување на обврските на компаниите кон државата, чија работа е погодена со настанатата ситуација со коронавирусот.
Замрзнување на обврските на компаниите кон банките и заемодаваталите за март, чија работа е погодена од состојбата на коронавирусот. Така и на банките ќе им се помогне.
Државата да ги ослободи компаниите од трошоците за придонеси за вработените во компаниите погодени од состојбата со коронавирусот. Тоа се секторите што се најмногу погодени, како што се туризмот, угостителството, текстилната, кожарска и сите оние други сектори.
И порака до Владата, освен за пиарот, грижете се за граѓаните. Немојте да се натпреварувате кој повеќе прес-конференции ќе одржи, туку натпреварувајте се кој повеќе протоколи ќе усвои и како да се справиме со пандемијата. Да дејствуваме одговорно, да работиме за граѓаните и да работиме на здравјето на граѓаните и економијата“, вели Мицкоски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Ледено невреме доаѓа кон Македонија: се очекува силен ветер, дожд, снег и минусни температури

Денешниот ден донесе вистинска пролет во Македонија и сончево време во најголемиот дел од земјата, но во наредните часови следува бурна промена на времето.
Моќен циклон во овој момент носи обилен снег и силен ветер во источна и североисточна Европа.
Снегот и бурните ветрови како дел од студениот фронт стигнаа до северот на Романија и Словачка.
Во исто време, во Македонија се уште е топло, температурата во Скопје е 14 степени, а за само неколку часа студениот фронт ќе ја намали температурата за повеќе од 10 степени за многу краток временски интервал.
Според информациите од Управата за хидрометеоролошки работи (УХМР) ќе има продор на студена воздушна маса од север, кој ќе предизвика значителна промена на времето.
Ќе преовладува претежно облачно време со врнежи од дожд, а на повисоките места од дожд и снег.
На планините врнежите ќе бидат од снег и ќе се формира снежна покривка од 10 до 15 сантиметри.
Ќе дува засилен северен ветер со брзина од над 70 километри на час и температурите значително ќе опаднат.
Во понеделник со засилен северен ветер наместа повремено ќе провејува слаб снег.
Потоа времето ќе биде стабилно и ветровито со утринските температури кои насекаде ќе бидат негативни и ќе се спуштат до минус 7 степени.
Кон крајот на следната недела се очекува постепен пораст на температурите.
Македонија
(Видео) Директорката на клиниката за пластична хирургија низ солзи им се заблагодари на странските доктори за помошта по трагедијата во Кочани

Д-р Јасмина Ѓоргиевска Павловска, директорката на Универзитетска клиника за пластична и реконструктивна хирургија низ солзи се заблагодари на докторите од Израел, Чешка и Србија кои дојдоа во земјава за да им помогнат на нашите доктори по големата трагедија во Кочани.
„Сакам да ви се заблагодарам на сите што сте тука и ни помагате во оваа ситуација. Завршивте одлична работа. Ни го дадовте патот по кој треба да одиме, за да го направиме најдоброто за овие млади души и да им дадеме шанса да го видат светот“, вели Ѓоргиевска Павловска.
Емотивното видео го објави Sheba Medical Center Global Impact, еден од водечките светски медицински центри, со седиште во Израел. Нивниот тим изведе 35 процедури на пациенти во четири различни болници во Македонија.
Македонија
(Видео) Гинов: Во ниту еден момент не е доведено во прашање водоснабдувањето на Битола

Изнесени се опасни лаги и манипулации од партиска говорница на една политичка партија, дека „ќе секнат чешмите во Битола“ и сакам јавно да побарам од советничката од СДСМ Мирјана Захариевска Ралевска да им се извини на битолчани и одговорно тврдам дека во ниту еден момент водоснабдувањето на Битола не е и нема да биде доведено во прашање, кажа денеска на прес-конференција Андреј Гинов, директор на ЈКП Водовод Битола.
„Околу „загубата“ на ЈКП Водовод Битола ќе кажам само неколку работи: -вкупните приходи за 2024 година се околу 284 милиони денари, вкупните расходи се околу 346 милиони денари, што продуцира загуба од околу 61 милион денари. Ако се земат предвид само неколку ставки на расходи и приходи ќе се види јасно зошто е тоа така. Вкупен приход од наплата на вода од правни и физички лица е околу 262 милиони денари, а од останатата реализација е околу 22 милиони денари, а додека расходите по само три основи и тоа : електрична енергија околу 43 милиони денари, сирова вода- кон „Стрежево“(заради сушата минатото лето) околу 50 милиони денари и трошоци за плати за вработените 148 милиони денари – што дава вкупен расход кога се додава и ДДВ по само три ставки е повеќе од 280 милиони денари“, рече Гинов.
Ова, според него, покажува дека целокупниот приход при висока наплата на сметки од околу 95% е близу вкупниот расход за само овие три ставки.
„Само за илустрација би кажал уште две споредби и тоа: во 2021 година во ЈКП Водовод имаше вкупно 227 вработени и трошокот за плата изнесуваше околу 107 милиони денари, а сега во 2024 год. има вкупно 205 вработени (22 вработени помалку) а трошокот за плати изнесува околу 148 милиони денари што е за 41 милион денари повеќе при значително помал број на вработени.
Во текот на 2021 година „Водовод“ влезе во непотребна инвестиција за „нова управна зграда“ за која што се потрошени повеќе од 60 милиони денари колку што изнесува сегашната загуба на ЈКП Водовод Битола“, истакна Гинов.