Повлекувањето на амбасадорот од Прага претставува долг процес кој беше воден од Комисиијата во рамките на Министерството за надворешни работи, кои констатираа бројни прекршувања на процедурите и дипломатските практики, кои беа поткрепени и со материјални докази и прецизни констатации, велат од Министерството за надворешни работи преку допис до медиумите за амбасадорот Сашо Тодоровски.

Во соопштението се наведува дека прекршоци биле правени во рамките на материјалното финансиско работење, при активностите за санирање на објектот на амбасадата, не се испочитувани внатрешните процедури и склучени се договори без согласност на Министерството; по истите Договори подоцна исплатени се финансиски средства без материјално покритие за истите.

„Без согласност од МНР амбасадорот ангажирал локален персонал и склучил договори за ангажман на локален персонал, што е спротивно на интерните акти на МНР, поточно член 9 и член 10 од Правилникот за ангажирање локален персонал и спроведување практична работа на студенти во дипломатски и конзуларни претставништва. Без претходна соодветна одлука на Министерството, ја претставувал сопругата за „Аташе за наука“ на Република Северна Македонија, иако таа го немала добиено тоа дипломатско звање; прекршувајќи ги сите правила и надминувајќи ги ингеренциите кои ги има, ги довел во заблуда претставниците на научните и образовни институции во земјата на покривање“, велат од МНР.

Како што се додава, тој ги прекршил и правилата на добрата дипломатска практика, односно без да најави, не присуствувал на испраќањето на претседателот на Владата сосе неговата придружна делегација за време на посетата на земјата на покривање, оставајќи непријатен впечаток пред дипломатските претставници на земјата – домаќин.

Во рамките на мандатот амбасадорот бил повикан на консултации во Скопје за да објасни дел од прекршувањата и направените неправилности, но иако ја напуштил земјата на покривање, без дозвола ја напуштил и земјава и подоцна пријавил дека отишол на одмор, за што е потребна посебна дозвола.

Сите овие дејствија, велат од МНР, поткрепи со материјални докази и прецизни констатации, се дел од извештајот изготвен од Комисијата во рамките на Министерството за надворешни работи кој подоцна е усвоен од Владата.

„Констатирајќи ги сите овие неправилност кои се дел од извештајот на Комисијата, Владата донесе одлука за повлекување на Амбасадорот. По веќе донесената одлука на Владата, Амбасадорот поднесе барање за предвремено повлекување“, велат од Министерството.

Претходно, професорката Најчевска во статус на социјални мрежи рече дека Toдоровски самиот поднел оставка и оти станува збор за хајка поради нејзините критички ставови во јавноста, како и заради несогласување на нејзиниот сопруг како амбасадор во Прага со начинот на функционирање на министерството.

За нејзиниот ангажман, наведе дека сопругите и сопрузите на амбасадорите добиваат средства во висина од 10 проценти од платата на амбасадорот не за да се шетаат и да се проводат, туку за извршување на дипломатски задачи кои им ги доделува амбасадорот.