Македонија
МНР: Безбедносните органи да донесат одлука за ограничување на пристапот на Џамбаски

Министерството за надворешни работи реагираше со осуда за изјавите на европратеникот Џамбаски за што по дипломатски пат го известува и Министерството за надворешни работи на Бугарија.
„Во овој случај, Министерството ќе препорача и на Претседателот да реагира соодветно до својот колега, претседателот Радев, а за ова однесување известување и барање за оградување ќе биде побарано и од Претседателот на Европскиот парламент“, велат од МНР.
Се додава дека заканите, изјавите за закани, најавите се прашање со кое се занимаваат безбедносните органи, па оттука се очекува тие сериозно да ги земат предвид последните изјави на Џамбаски и да донесат соодветна одлука за негов ограничен пристап во земјава, се наведува во соопшението на македонското МНР.
Бугарскиот европратеник Џамбаски претходно денес потврди дека на 4 февруари ќе дојде во Скопје за да му се поклони на Гоце Делчев. Тој индиректно му се закани со атентат на претседателот Стево Пендаровски, кога на повиците да му се забрани влез во државата, одговори со споменување на некогашниот југословенски крал Александар Караѓорѓевиќ.
„Што претставува за нас една таква забрана? Да му порачам на Стево Пендаровски, наречен Стево Коминтерната и дека во минатото и други се обидувале да им забранат влез на лидери на ВМРО во Македонија, а последниот таков пример е со југословенскиот, со српскиот крал Александар Караѓорѓевиќ. Ако се обидат да ми забранат влез во Македонија нека погледнат во историјата и нека учат од неа“, рече Џамбаски.
Премиерот Ковачевски, пак денес изјави дека се што е во надлежност на Владата ќе биде направено со цел да се гарантира мирно и достоинствено одбележување на 4 февруари, денот на раѓањето на Гоце Делчев.
„Тие активности (прогласување за персона нон грата) се на МВР и се спроведуваат врз основа на Законот за странците и одредбите што регулираат кое лице не може да влезе во државата, а поради активности што ги нарушуваат односите меѓу државите. Без разлика ако е политичар или друго лице, ако МВР го идентификува таквото лице, тоа не може да влезе во државата. Достоинството на нашата држава е врвен приоритет“, рече Ковачевски.
Министерот за внатрешни работи Оливер Спасовски прашан дали ќе го вратат европратеникот Ангел Џамбаски на граница на 4-ти февруари одговори: Ќе одлучиме на четврти февруари.
Претседателот Стево Пендаровски, пред два дена, по седницата на Советот на безбедност, предложи на институциите односно Владата и МНР, да го прогласат бугарскиот пратеник Ангел Џамбаски за персона „нон-грата“, а тоа би значело да му се забрани влез во Македонија. Освен за него, забрана, шефот на државата предложи и за други бугарски државјани, а поради понижување и негирање на македонскиот народ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Мицкоски за интерпелацијата на Коцевски: Јас не ги менувам ставовите преку ноќ

На еден ден пред расправата за интерпелацијата на државниот јавен обвинител Љупчо Коцевски, поднесена од партијата Левица, премиерот Христијан Мицкоски вели дека не го менува ставот ниту тој како човек ниту, пак, го менува ставот партијата ВМРО-ДПМНЕ. Мицкоски уште во март, по пожарот во Кочани, рече дека ќе им даде шанса и на Коцевски и на другите обвинители да работат и да сработат имајќи ја предвид чувствителноста на ситуацијата.
„Јавноста ќе види утре. Ние како политичка партија и јас како човек не ги менувам ставовите преку ноќ“, рече премиерот Мицкоски одговарајќи новинарски прашања по свеченото отворање базен во ООУ „Невена Георгиева-Дуња“ во Кисела Вода.
Интерпелацијата за Коцевски ја поднесе партијата Левица во јуни поради селективност во истрагата за пожарот во Кочани, политичко влијание во работата на Обвинителството, функционален хаос во Вишото јавно обвинителство Скопје и непостапување по службена должност за дивоградбите во Скопје.
Пратениците утре ќе расправаат за интерпелацијата на Коцевски во рамките ја 64. пленарна седница на Собранието.
Обвинителот Коцевски ги отфрли сите наводи во интерпелацијата и рече дека функцијата ја врши чесно и одговорно.
Македонија
(Видео) Јанковиќ: ВМРО-ДПМНЕ катастрофлано потфрла во справувањето со пожарите, лани изгореле 95.000 хектари

Состојбата со пожарите во државата е алармантна. За само едно деноноќие се регистрирани над 50 пожари, а веќе со денови горат планини, шуми и пасишта на повеќе локации низ државата. Гори во Берово, Прилеп, Катланово, Петровец, Кичево, Кратово, Крива Паланка, Желино, Старо Нагоричане, Македонски Брод, вели Јовица Јанковиќ од СДСМ.
Владата на ВМРО-ДПМНЕ, додава тој, потфрли целосно во справување со пожарите и оваа година исто како и лани.
„Статистичките податоци покажуваат драматични, аларманти податоци. Минатата година, изгореле 95,181 хектари во Македонија. Дури 8 пати повеќе отколку од просекот во последните 17 години.
Најстрашно од се е што бројката на изгорена површина на Македонија во 2024 година – 95.181 е далеку поголема од бројките во една Шпанија, Италија, Франција, кои по површина се поголеми од нашата татковина.
По она што се случува оваа година, трендот за жал оди во нагорна линија.
Изгорени се повеќе од 20% од вкупната површина на шуми и пасишта. Тоа значи уништена природа, загрозени животи, имоти и здравје на граѓаните.
Наместо брза и координирана реакција, гледаме катастрофална неспособност на власта во справувањето со пожарите.
Се доцни со интервенции, нема доволно лица на теренот, нема нова опрема, нема нови противпожарни возила, нема доволен број пожарникари“.
Според него, иако ВМРО-ДПМНЕ ветуваше дека ќе бидеме најподготвени досега, гледаме, како што рече, дека тоа било уште една голема лага.
Оценува дека наместо нови возила, Владата на ВМРО-ДПМНЕ потрошила 7 милиони евра за службени мобилни телефони.
„Колку противпожарни возила ќе се купеа со тие 7 милиони евра?
Нема ниту нова опрема, нема нови системи за гасење, ниту нови авиони. Наместо тоа, гледавме расфрлање со парите на граѓаните – за скапи приватни летови, луксузна морска храна, папаја и манго.
Нема нови вработувања на пожарникари, нема ниту зголемување на платите за хероите што се борат со огнот, затоа што приоритет на ВМРО-ДПМНЕ се партиските вработувања и вдомување на партиски кадар.
Дополнително, ВМРО-ДПМНЕ ги одбива сите конкретни предлози на СДСМ. Последен пример е ребалансот на Буџетот – не прифатија да се обезбедат 500 милиони денари за зголемување на бројот на пожарникари, за нивни плати и за нова опрема.
Тоа е страшно, жално и крајно неодговорно“, истакнува Јанковиќ.
Ги повика институциите да се разбудат и да почнат да работат.
Како што нагласи, ова не е време за ПР. Ова е време за итно мобилизирање ресурси, време да се заштитат животите и имотите на граѓаните.
Македонија
(Видео) Лефков: Доколку Бугарија е искрена, нема зошто да ескивира од заедничка резолуција пред ЕП за заштита на македонскиот идентитет и на јазикот

Се уште очекуваме став од Бугарија за предлогот на претседателот Мицкоски, за заедничка Резолуција за заштита на македонскиот идентитет и јазик пред ЕП, мистакна на прес-конференција Миле Лефков, пратеник и член на ИК на ВМРО-ДПМНЕ.
„Ние го изнесовме овој предлог од две причини: Доколку Бугарија е искрена, и не го оспорува нашиот идентитет и јазик, тогаш ќе прифатат и заедно ќе ја поднесеме Резолуцијата.
Доколку Бугарија не е искрена, тогаш ќе ескивира по секоја цена“.
Во моментот сме сведоци, додава Лефков, дека Бугарија бега од идејата, а со тоа покажува став кон Македонија, кој не е демократски, не е добрососедски, ниту пак е човечки.
„Гласините кои ги слушаме од некои кругови во Бугарија, го отсликуваат наративот кој Русија го има кон Украина, со целосна негација на нашата самобитност.
Ние знаеме кои сме и целиот свет знае кои сме. Но, фактот што Бугарија го негира тоа, и сака во темел да ги поткопа основните човекови права, дава јасен знак дека сите треба да се запрашаме зошто е тоа така и ќе остави ли ЕУ да бидеме жртва на политики од 19 век, политики на негација на самобитноста исти по размер како тие Русија што ги применува врз Украина“.
Македонија, нагласува Лефков, е пред се добар сосед, држава членка на НАТО, држава која дала и дава свој придонес кон европската безбедност и единствено нешто кое го сакаме, како што рече, како народ, е да бидеме почитувани и да имаме третман како сите останати.