Македонија
Во Брисел продолжува билатералниот скрининг за „Конкуренција”

Денеска во Брисел продолжува билатералниот скрининг за Поглавјето 8, „Политика на конкуренција“, кое е последно поглавје во агендата на билатералниот скрининг од Кластерот 2 „Внатрешен пазар“, информираат од Секретаријатот за Европски прашања.
Денеска, како што додаваат, презентации пред експертите на Европската комисија имаа претставници од Комисијата за заштита на конкуренцијата на темите како што се правната рамка за соединувања на компании и компании (mergers), како и правилата и законите за државната помош.
Северна Македонија, се истакнува во соопштението, го спроведува Договорот за стабилизација и асоцијација повеќе од 20 години, а во многу случаи сме сведоци, како што велат, дека Европската комисија посветува посебно внимание на политиката на конкуренција како едно од најважните и најтешките поглавја што го регулира внатрешниот пазар на ЕУ.
„Конкурентната политика на ЕУ има за цел да создаде внатрешен пазар, каде што економските оператори слободно се натпреваруваат меѓу себе. Европското право во оваа област ги вклучува и конкуренцијата и правилата што важат за компаниите, како и политиките за контрола на државната помош. Во ова поглавје, исто така, се вклучуваат и правилата и процедурите за борба против антиконкурентното однесување од страна на компаниите, како што се рестриктивните договори меѓу компаниите и злоупотребата на доминантна или монополска позиција на пазарот. Правилата на конкуренција важат подеднакво, и на ист начин за сите учесници на пазарот и нивна задача е да овозможат подобро функционирање на пазарот со што ќе се обезбеди поголема понуда на стоки и услуги по најповолни цени“, се потенцира во напишаното.
Делегацијата на Северна Македонија ја предводи заменичката на главниот преговарач на Северна Македонија со ЕУ и државна секретарка во Секретаријатот за европски прашања, Дрита Абдиу-Халили. Билатералниот скрининг состанок за ова поглавје започна во петок, 10 март и ќе продолжи и утре.
Од среда, 15 ти март започнува објаснувачкиот скрининг за Поглавјата 14 – Транспортна политика, 15 – Енергетика, 21 – Транс-европски мрежи и 27 – Животна средина и климатски промени кои се дел од Кластер 5, ,,Зелена агенда и одржлива поврзаност”.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Македонецот кој спречи терористички напад во авион: „Реагирав инстинктивно“

На летот од Лондон до Глазгов се случи инцидент, откако еден од патниците извика дека има бомба, со слогани „Смрт за Америка, смрт за Трамп“ и „Алах акбар“. Патникот кој се закани дека ќе постави бомба беше совладан од Зоран Настески, по потекло од Македонија и Србија, кој живее во Велика Британија.
Настески го собори човекот на подот за време на летот и го држеше до слетувањето, кога го презеде шкотската полиција. Во меѓувреме, во Велика Британија е започната истрага за терористичкиот напад. Индискиот „Јутуб“ канал „НДТВ“ објави видео од инцидентот, на кое се гледа моментот кога Настески совладува патник кој извикува дека има бомба и го навредува американскиот претседател Доналд Трамп.
View this post on Instagram
„Вчера наутро тргнав на одмор во Глазгов. Десет минути пред слетувањето, еден човек помина покрај мене држејќи кафе и телефон во рацете. На почетокот се плашев дека ќе ми истури топло кафе, па се засолнив. Потоа почна да вика дека има бомба и дека ќе го собори авионот, за да докаже дека политиката на Трамп е погрешна“, вели Настески, пренесува „Телеграф.рс“.
Патниците паничеа, додаде Настески, децата врескаа, а екипажот беше видливо вознемирен.
„Само реагирав инстинктивно, сакав да ги заштитам другите. Станав, го соборив, му го зедов телефонот и го држев за раце додека не слетавме. Набрзо ми помогна друг патник, не сум сигурен дали беше Англичанец или Шкотланѓанец“, рече Настески.
По слетувањето на аеродромот, пожарникарите и полицијата дојдоа на пистата и уапсија 41-годишен маж. Целиот настан го снимила патничка. Видеото набрзо станало вирално на социјалните мрежи.
По десет години работа во Велика Британија, Настески планира да се пресели со својата партнерка во Србија, каде што има семејни корени. Неговиот татко е Македонец, роден во Скопје, а неговата мајка е Србинка.
„Се селам во Белград затоа што ја запознав најпрекрасната жена на светот, Сандра“, рече Настески.
Авиокомпанијата „Изи џет“ објави дека човекот што го предизвикал инцидентот бил уапсен веднаш по слетувањето во Глазгов и дека персоналот на авионот бил обучен да се справува со вакви ситуации, за да не биде доведена во прашање безбедноста на сите во авионот.
Македонија
Започна изградбата на пречистителната станица за отпадни води во Битола

Во општина Битола, денес беше одржан состанок, со кој се означи почетокот на реализацијата на проектот за изградба на пречистителната станица за отпадни води.
Во присуство на претставници на Министерството за животна средина, Министерството за финансии, изведувачот на пречистителната станица конзорциумот Лантаниа-Стентон градба-Карканиас, избраниот надзор- фирмата Ептиса, претставници на КЈП „Нискоградба“ и претставници на општинската администрација, градоначалникот на општина Битола Тони Коњановски, посочи дека овој стратешки еколошки проект е многу значаен чекор кон заштитата на животната средина.
Основната цел на проектот е да се подобри инфраструктурата за собирање и третман на комунални отпадни води, во согласност со директивата за третман на отпадни води и националниот закон. Според договорот, времетраењето на градба е 2 години и една година гарантен период. Со помош на ЕУ, се гради одржлив систем за отпадни води за идните генерации, преку инвестирање во чиста вода и зелени решенија што ќе обликуваат поздрава и поодржлива иднина.
Македонија
Дожд и грмежи вечерва и во раните утрински часови, јавува УХМР

Времето до крајот на денот ќе биде сончево со мала до умерена локална облачност. Ќе дува слаб до умерен, во западните делови западен, а долж Повардарието северен ветер, кој наместа повремено ќе засилува. Кон крајот на денот во северозападните делови облачноста ќе се зголеми и во текот на ноќта и во раните утрински часови ќе има локален дожд, повремено пороен со појава на грмежи и услови за краткотрајно невреме.
Времето утре ќе биде променливо облачно и посвежо, претпладне со повремено пороен локален дожд, грмежи и услови за појава на краткотрајно невреме. Ќе дува слаб до умерен, а наместа долж Повардарието повремено засилен ветер од северозападен правец. Минималната температура ќе биде во интервал од 13 до 22, а максималната ќе достигне од 27 до 35 степеним јавува УХМР.
Во Скопје, променливо облачно, во раните утрински и претпладневни часови со повремен пороен дожд и услови за појава на ретки грмежи. Ќе дува слаб до умерен, попладне во делови од котлината повремено засилен северен ветер. Минималната температура ќе се спушти до 19, а максималната ќе достигне до 33 степени.