Македонија
МНР: Македонскиот јазик е неоспорен и не е условен во предлог преговарачката рамка

Министерството за надворешни работи соопшти дека најостро ги демантира наводите што се споменуваат во јавноста дека македонскиот јазик не е чист во француската предлог преговарачка рамка за почнување на преговорите на Северна Македонија со Европската Унија.
Ваквите наводи, велат од МНР, се неточни, опасни, ја доведуваат во заблуда јавноста и им штетат на интересите на државата.
Во продолжение целото објаснување од Министерството.
„Ја информираме јавноста дека македонскиот јазик е неоспорен и не е условен во предлог преговарачката рамка, која, меѓу другото, е преведена (и објавена) на македонски јазик од страна на преведувачките служби на Советот на ЕУ.
Став 22 од предлогот недвосмислено кажува дека правото на ЕУ ќе се преведе на македонски јазик: „Северна Македонија ќе треба навремено да направи преводи на правото на ЕУ (acquis) на македонски јазик пред пристапувањето и ќе треба да обучи доволен број преведувачи и толкувачи потребни за правилно функционирање на институциите на ЕУ по нејзиното пристапување“.
Во согласност со позициите консензуално утврдени од страна на нашето Собрание во декларацијата за спорот со Република Бугарија наша цел беше позицијата на Република Бугарија во однос на македонскиот јазик да не стане и позиција на ЕУ, а во оваа предлог-рамка тоа е целосно исполнето.
Практичната потврда за ваква неоспорна употреба на македонскиот јазик ќе биде потпишувањето на договорот за Фронтекс, со стандардна клаузула, каде што е наведен македонскиот јазик (без фусноти или дообјаснувања). Потпишувањето на договорот за Фронтекс е предвидено да се случи веднаш по одржувањето на првата меѓувладина конференција помеѓу Република Северна Македонија и ЕУ и државите членки. Оттука, овој меѓународен договор меѓу Република Северна Македонија и ЕУ, односно државите членки, и на македонски јазик, ќе стане дел од законодавството на ЕУ.
Со овој договор и нему сличните во иднина, како и со преводот на правото на ЕУ на македонски јазик во текот на преговорите за членство, македонскиот јазик ќе биде вклучен на исто рамниште во групата официјални јазици на ЕУ по нашиот прием во ЕУ.
Тврдењето дека Република Северна Македонија требало да бара цврсти гаранции преку внесување на Поглавјето 34 во преговарачката рамка е погрешно и манипулативно. Поглавјето 34 се дискутира на крајот на преговарачкиот процес кога е извесно дека земјата кандидат ќе стане земја членка на ЕУ. Ова поглавје не е ексклузивно посветено на внесување на јазикот на земјата кандидат за членство во семејството на официјални јазици на ЕУ и уште помалку има амбиција да признава јазици.
Во Поглавјето 34 се разработуваат институционалните и процедуралните правила на ЕУ и видовите адаптации кои се неопходни да се направат во постојното ЕУ-право за да ја внесе во прием новата земја членка (на пр., соодветната застапеност на новата земја членка во телата на ЕУ итн.). Земја кандидат нема процедурална можност да го отвора ова поглавје, ниту да го дискутира пред отворањето на преговорите.
Министерството за надворешни работи заедно со Владата на Република Северна Македонија и сите релевантни фактори ќе работи напорно во претстојниот период да ги надмине сите недоразбирања со Република Бугарија во согласност со договорот за добрососедски односи и со цел обезбедување непречени преговори и брза интеграција на Република Северна Македонија во ЕУ. Предлог-рамката со недвосмислен македонски јазик и идентитет претставува основа за почнување на процесот на преговори“, велат од МНР.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Детето што загина со мотор немало ниту возачка, ниту кацига, а возело со брзина над дозволената

Дежурен јавен обвинител од Основното јавно обвинителство Скопје извршил увид на местото на тешката сообраќајната несреќа во која загина 16-годишен возач на мотоцикл, која ноќеска се случила во близина на трговскиот центар „Чаирчанка”.
Како што соопшти државното Јавно обвинителство, според првичните сознанија по увидот, 16-годишникот управувал без возачка дозвола и заштитна кацига, како и со брзина поголема од дозволената.
-На критичната локација не успеал да избегне електричен тротинет со кој по коловозот управувал 14-годишник. Во сообраќајната несреќа, возачот на моторот се здобил со тешки телесни повреди од кои починал на лице место, додека малолетникот кој управувал со тротинетот е повреден и задржан на лекување, соопшти ЈОРСМ.
Со цел точно утврдување на причините за несреќата, јавниот обвинител издал повеќе наредби и насоки.
-Се обезбедуваат и се прегледуваат снимки од видеонадзорот на конкретната локација. Издадена е наредба за обдукција на телото на починатиот, а и кај малолетникот кој управувал со тротинетот ќе бидат извршени анализи за евентуално присуство на алкохол или други недозволени супстанции, наведува Обвинителството.
Министерството за внатрешни работи претходно информираше дека во СВР Скопје денеска во 02.28 часот било пријавено дека на ул.„Цветан Димов“ во скопски Чаир се случила сообраќајна несреќа помеѓу мотоцикл пиаџо беверли со скопски регистарски ознаки, управуван од 16-годишник од Скопје, и електричен тротинет управуван од 14-годишник од Скопје.
Од здобиените повреди на местото на несреќата починал 16-годишниот мотоциклист, а смрт констатирал лекар од Итна медицинска помош. Четиринаесетгодишник кој управувал електричен тротинет, пак, се здобил со телесни повреди констатирани во Ургентниот центар при Комплекс клиники „Мајка Тереза“.
Македонија
Пијани возеле автомобили, полицијата ги фати и ги приведе

Полициски службеници од полициската станица за безбедност на патниот сообраќај Куманово и полициски службеници од полициското одделение за безбедност на патниот сообраќај Кратово денеска ги лишиле од слобода А.М.(38) од Куманово, А.Р.(49) од село Ваксинце, општина Липково и З.Л.(60) од село Страцин, кратовско.
МВР соопшти дека при контрола на патниот сообраќај во Куманово, полициските службеници констатирале дека кај А.М., кој управувал патничко моторно возило цитроен, биле измерени 1,56 промили алкохол во крвта, а кај А.Р., кој управувал патничко моторно возило опел, биле измерени 1.55 промили алкохол. При контрола на патниот сообраќај во Кратово, З.Л. не застанал на знак за запирање и се обидел да побегне, но набргу бил запрен и полициските службеници кај него измериле 2,28 промили алкохол во крвта.
По целосно документирање на настаните, против лицата ќе бидат поднесени пријави по член 297-А од Кривичниот законик „безобѕирно управување со моторно возило”.
Македонија
Власта молчи пред дивеењето на Сашо Мијалков на Охридското езеро, обвини Левица

Периодов интензивно се одвиваат градежни активности на самото крајбрежје на Охридското езеро, во локалитетот познат како Горица 3, додека инвеститор е поранешниот директор на УБК, Сашо Мијалков со неговата компанија Дивелоп Груп. Историјата на овој луксузен хотел е контроверзна, а за неговите потреби беше уништена и опожарена шума стара 70 години, додека виновниците за пожарот никогаш не беа лоцирани, велат од Левица.
„Скандалозно е што овој хотел се гради во критична зона, за која и во Планот за управување со Охридскиот регион е нотирано дека треба да се сопре било каква урбанизација, се додека не се усвојат сите плански документи за заштита на природните реткости, кои постојано се под напад од спрегата урбанистичка мафија-власт. Информациите кои пристигнаа до Левица се дека за овој хотел никогаш не било изготвено Решение по елаборат за животна средина – документ без кој не е возможно воопшто да се издаде одобрение за градба. Но, за луксузниот хотел на Мијалкови молчи градоначалникот на Охрид, Кирил Пецаков, чиј цел мандат го одработи единствено за интересите на неколку локални моќници во бизнисот со градежништвото. Молчи инспекторатот за животната средина, молчи Управата за заштита на културно наследство, додека секојдневно премиерот Мицкоски најавува дека одговорност мора да има за сите“, додаваат од партијата.
„Јавно го прашуваме претседателот на Владата дали ќе има одговорност и за нивниот поранешен сопартиец, Сашо Мијалков, кој своето богаство го наталожи за време на владеењето на ДПМНЕ, а амнестијата ја доби под закрила на СДС?! Се работи за флагрантно дивеење и кршење на законите, каде Мијалков се стекна со 15.000 квадрати државно земјиште на една од најатрактивните локации во Охрид, додека пак скандалозно донесен урбанистички план воопшто не е ревидиран од аспект на неговата усогласеност со Планот за управување со природното и културното наследство на Охридскиот Регион. Градоначалникот Пецаков, очигледно за да ги задоволи бизнис-интересите на поранешните функционери на ДПМНЕ, не ја реализира својата законска обврска за изменување на урбанистичкиот план на Горица 3, со што де факто ќе го спречеше беззаконието кое во континуитет го деградира Охридското крајбрежје. Наместо празните флоскули на власта дека и сопствениот брат ќе одговора“, Левица апелира да почнат од својот поранешен висок функционер, кој како што велат очигледно е амнестиран од здружените интереси на ДПМНЕ и СДС.