Правото на штрајк и правото на образование се две уставно загарантирани права, но во ситуација при судир на овие две права, според сите меѓународни документи и според Конвенцијата за правата на детето, предност се дава на правата на децата, што значи дека воспитно-образовниот процес не треба да трпи последици, изјави народниот правобранител Насер Зибер одговарајќи на прашање во однос на мислење за штрајкот на СОНК по денешниот заеднички настан со Министерството за образование и наука посветен на инклузијата на образовниот систем.

Народниот правобранител вели треба да се внимава на дигнитетот на наставниците и на сите вработени во образованието, што подразбира и подобрување на нивната материјално-финансиска состојба и затоа, како што рече, упатил апел до Владата да продолжат преговорите со Синдикатот и што побргу да се најде решение за да нема последици врз воспитно-образовниот процес. Информира дека до институцијата не се доставени претставки за попречување на правото на штрајк, туку само за попречување на правото на образование.

Министерот за образование Јетон Шаќири рече дека МОН и Владата се подготвени во секој момент да ги продолжат преговорите со СОНК и да се најде излез од ситуацијата која не оди во прилог на учениците.

„Се обидовме и пред неколку дена понудивме зголемување на платите на наставниците за 10 % или во износ од 2.500 денари, но, за жал, советот на СОНК одлучи тој предлог да не го прифати затоа што, како што соопштија, 90 % од нивното членство преку ‘Вибер’ потврдило дека не го прифаќа ова најголемо покачување на платите во образованието во последните неколку години, кое Владата го понуди, иако се наоѓаме во услови на голема економска и здравствена криза.

Шаќири реагира дека одредени членови на СОНК шират дезинформации во јавноста, со кои го поткопуваат процесот на преговарање и упати апел ваквите постапки да престанат за да се изнајде решение што побргу.

„Не сакам да имаме различни информации со СОНК, со наставниците и со јавноста. Прочитав вест дека претставник на Синдикатот од Струшко-дебарскиот Регион вели дека не е вистина оти Владата понудила 10 % зголемување на платите, а всушност на состанокот бевме присутни премиерот и четворица владини министри заедно со 20-ина членови на советот на СОНК, така што со ширење невистини не се дава придонес кон изнаоѓање решение“, рече Шаќири.

Министерот рече дека оваа Влада ветува и исполнува. Потсети дека во 2018, 2019 и во 2020 имало покачување на платите во износ над 21 %, како и дека со новиот Закон за минималната плата, кој предвидува 6 месеци усогласување, ќе има ново зголемување за оние што земаат плата под новиот договорен износ.

Апелира до СОНК и членовите да се вратат на настава бидејќи овој тип на штрајк, без организирање настава, не беше најавен и тоа создаде револт кај најголем дел од семејствата на учениците.