Македонија
МОН: Учебници ќе има и до 1 септември ќе бидат испорачани до училиштата, не се потребни невистини за политички поени
Наместо неосновани критики и ширење дезинформации, Министерството за образование и наука ги повикува политичките субјекти, кои сакаат да дадат придонес кон унапредувањето на квалитетот на националниот образовен систем, да го сторат тоа преку конструктивни сугестии. Како институција, велат од таму, отворени сме за соработка со секој добронамерен општествен фактор, кој мисли добро на државата и нејзината иднина.
„Во време кога се спроведува најкрупната образовна реформа во државата, преку концепција, која е резултат на инклузивен пристап со учество и согласност на сите засегнати страни, не е потребно креирање невистини, само за да се создадат непотребни грижи кај учениците и семејствата на учениците, за тоа дали институциите и образовните установи се подготвени за успешен почеток и тек на учебната година.
Веднаш да информираме дека учебници за учениците ќе има. За време на летниот период годинава, Министерството за образование и наука успеа сите одобрени учебници да ги испечати и до 1 септември иститетие ќе бидат испорачани до училиштата и на располагање на учениците. Еден мал дел учебници, кои не се испечатени, всушност сè уште се во постапка, односно за нивно одобрување одлучува Националната комисија за учебници по што и тие ќе бидат испечатени и испорачани. Во меѓувреме, на располагање ќе бидат помошни материјали за ученици и прирачници за наставници, кои ќе ја збогатат наставата. Тие се изработени од страна на Бирото за развој на образованието и ќе бидат достапни само во електронска форма на веб-страницата на Бирото. Секако, постои можност секое училиште на своја иницијатива индивидуално да одлучи да ги испечати“, истакнуваат од МОН.
Во однос на интегрирањето предмети, појаснуваат од таму, јавноста знае дека овој процес не е нов, се спроведува десетина години и како резултат на него е произлезен предметот природни науки за кој досега никогаш немало реакции.
Интегрирањето предмети , според надлежните во ова Министерство, не предвидува укинување содржини. Историја, географија, биологија, хемија, физика и натаму ќе бидат дел од науките што ќе бидат соодветно застапени во наставниот план за основно образование, а ќе ги предаваат наставниците што и досега ги предаваа овие предмети. Секој наставен предмет ќе има повеќе модули, што ќе овозможат ученикот да ја изучува наставната содржина од повеќе аспекти, односно да добие поцелосна слика за одредена случка, процес, состојба и слично.
„Транспарентно, во многу наврати досега, информиравме на кој начин ќе се предаваат овие интегрирани содржини. Важно е да се истакне дека ниту еден наставник нема да остане без работа, без часови поради воведување на новите интегрирани наставни програми. Бројот на часови е идентичен како и порано, а она што го воведуваме со новите програми е новиот пристап, базиран на искуствено учење, на поврзување на она што се учи со реалноста, на учење преку експерименти, развивање на критичко мислење.
Големо олеснување за наставниците ќе биде воведувањето на новиот електронски дневник, кој треба да ги надмине предизвиците на кои тие укажуваа досега. Софтверското решение е веќе изготвено, со поддршка од ИПА-фондовите на ЕУ и е во фаза на тестирање, по што ќе пилотира во одреден број училишта до конечно имплементирање во сите училишта во државата“.
МОН, како што информираат, ќе продолжи да ја имплементира концепцијата за основно образование и покрај обидите на одредени политички фактори да го поткопаат процесот на реформирање.
„Две фази се веќе успешно спроведени, следува третата, која ги опфаќа трето и шесто одделение, а в година и другите погорни одделенија – седмо, осмо и деветто.
Квалитетно образование не се достигнува преку ноќ, тоа е процес во кој со свој придонес се вградуваат сите добронамерни фактори“, истакнуваат од ова Министерство.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Шанса за Центар со критика за Герасимовски: Одлучен е во изборната кампања до последна трошка да ги исцеди општинските ресурси
Граѓанската иницијатива „Шанса за Центар“ го искритикува актуелниот градоначалник на Општина Центар и кандидат за втор мандат од СДСМ, Горан Герасимовски по повикот до центарци денес да присуствуваат на првиот буџетски форум за 2026 година.
„Овој градоначалник е одлучен во изборната кампања до последна трошка да ги исцеди и општинските ресурси и самата општина како јавна институција во своја лична корист.
Откако изнареди прескапи игралишта, ископа дупки од илјадници евра како да се за ископ на дијаманти, изнареди клупи и канти наместо да ги поправи претходните, сега на неколку дена од гласањето си организира и нешто што само тој си го нарекува општински буџетски форум. А тоа во суштина е светлосни години далеку од тоа што треба да биде буџетски форум.
За ‘Форумите во заедницата’ и со тоа и за ‘Буџетските форуми’ има јасни правила како се одржуваат утврдени од ЗЕЛС за што повеќе пати му е укажано, а не сака да го прифати. Процесот со форумите треба да почне месеци претходно, да има стручни независни модератори, одвоен општински буџет, работни групи…
Но ете падна толку ниско што сака и нив да ги злоупореби за кампања. Буџетски форум најавен од вчера за денес. Форум ли е, митинг ли е во просториите на училиште?“, стои во објавата на „Шанса за Центар“ на „Фејсбук“.
Герасимовски вечерва со почеток во 19.30 часот во основното училиште „Киро Глигоров“ ги повика центарци да присуствуваат на првиот буџетски форум за 2026 година и заедно да го креираат буџетот, да дадат предлози и иницијативи што ќе придонесат за подобар и поквалитетен живот во општината.
„Шанса за Центар“ во првиот круг ја поддржа независната кандидатка за градоначалничка на Општината, Билјана Ивановска, предложена од група избирачи. Таа освои 4.465 гласови и не влезе во вториот круг во кој центарци ќе избираат меѓу Горан Герасимовски од СДСМ кој во првиот круг освои 8.535 гласа и Мирослав Лабудовиќ од Движењето ЗНАМ – За наша Македонија кој имаше 5.707 гласа.
Македонија
Амар Мециновиќ: Сега сме веќе движење – вие кои ги знаете пораките и целите, пренесете им на вашите најблиски за заедно да славиме победа
„Сите вие кои ја следите и ја поддржувате оваа кампања, да почнете да агитирате помеѓу вашите најблиски. Многу луѓе не ја знаат уште приказната за ова нашe движење. Затоа, вие кои ги знаете пораките и целите на сè ова, разговарајте со вашите најблиски, со Вашите пријатели, родители, баби и дедовци, за да ја прошириме пораката и заедно да славиме победа“, ваков апел преку видео – порака упатува кандидатот за градоначалник од Левица за Град Скопје, Амар Мециновиќ.
„Имаме идеја како сите да ве инволвираме во кампањата. Ова е повик за колективна акција. Следниот петок пред предизборниот молк, го пешачиме Скопје, затоа што сега сме веќе движење и во овој дел од кампањата ќе бидете инволвирани сите вие“, повикува Мециновиќ.
Тој додава дека заедно со неговиот тим и со сите луѓе кои се приклучија кон ова движење, ги пренесуваат пораките, буквално, до секој скопјанец. Веруваат дека, конечно, под водство на Амар, ќе се случат промени за поквалитетен живот на сите генерации – скопјани со достоинствени услови за живот на секој жител на Град Скопје.
Македонија
Без струја делови од Гази Баба и Ѓорче Петров
Од ЕВН Македонија АД известуваат дека денеска без електрична енергија ќе останат:
· во периодот од 08.00 до 14.30 часот, корисниците на обејкт на Меркур Македонија. (општина Гази Баба)
· во периодот од 09.00 до 14.30 часот, корисниците на дел од улицата Радушка (општина Ѓорче Петров)

