Заклучоците на УНИЦЕФ од последната анализа на постојниот систем за детски додатоци се целосно во согласност со социјалната реформа што ја предложи Министерството за труд и социјална политика, информираат оттаму.

Од Министерството посочуваат дека во однос на родителскиот додаток за трето дете УНИЦЕФ потенцира дека мерката повлекува огромни трошоци, а истовремено голем број сиромашни домаќинства со деца не добиваат помош. „Имено, во сценарио каде што сите домаќинства со трето дете помало од 10 години добиваат додаток, само една четвртина од тие трансфери би завршиле кај најсиромашните 10 отсто од населението“, стои во соопштението на Министерството.

„УНИЦЕФ препорачува трансформација на оваа мерка со оглед на малата веројатност дека родителскиот додаток ќе има влијание на одлуката кај релативно имотните семејства да имаат повеќе деца, како и недоследностите на политиката кога ќе се спореди со лимитот за детскиот додаток и неговиот мал опфат. Целта на овој чекор е ограничените буџетски ресурси што се на располагање да се користат ефективно за да се одговори на потребите на најсиромашните семејства. Според анализата, актулениот систем за социјална парична помош не ги дава посакуваните резутати“, велат од Министерството за труд и социјална политика.

Министерството, се додава во соопштението, сите овие прашања ги опфаќа во реформата за социјалната и детската заштита. „Се воведува гарантиран минимален приход, но и се проширува правото на користење детски и образовен додаток. Со реформирање на системот на права за детска заштита правото на детскиот додаток првпат ќе биде достапно и за домаќинствата со ниски примања. Ова значи дека бројот на деца што ќе примаат детски додаток од 3.200 корисници ќе порасне на 73.500. Дополнително, воведуваме нов право-образовен додаток. Овој додаток, место досегашните 3.800, ќе може да го користат 64.316 деца“, стои во соопштението на МТСП.