Македонија
Муртезани – Кос: Следниот период е клучен за процесот на пристапување кон ЕУ

Министерот за европски прашања, Орхан Муртезани, утрово во пресрет на официјалниот почеток на Самитот на лидерите од Западен Балкан, оствари билатерална средба со европската комесарка за проширување, Марта Кос. Ова, како што информираат од неговиот кабинет, е прва официјална посета на Кос во ова својство, а средбата со Муртезани претставува потврда за континуираната ангажираност и поддршка на Европската комисија за процесот на интеграција на Северна Македонија во Европската Унија.
Во рамки на средбата беа истакнати резултатите кои Северна Македонија досега ги постигна во спроведувањето на Планот за раст, кој е носечка тема на Самитот, како и Реформската агенда 2024-2027. Еврокомесарката Кос ги поздрави посветеноста и реформските напори на Владата, посебно во делот на успешно реализираните реформи, новоусвоените закони и динамиката на спроведување на приоритетните мерки во повеќе клучни сектори како што се: управување, енергетика, зелена транзиција, дигитализација, развој на човечкиот капитал, бизнис климата и владеење на правото. Комесарката ја охрабри Владата да продолжи со оваа динамика на реформи, истовремено укажувајќи на важноста од искористување на актуелниот момент за натамошен напредок и надминување на преостанатите предизвици.
Муртезани, во разговорите со Кос, изрази уверување дека оваа Влада останува цврсто определена за европската интеграција како апсолутен стратешки приоритет, осврнувајќи се на финализирањето на Патоказот за владеење на правото и Патоказот за реформа на јавната администрација, кои се одредници за отворање на првиот преговарачки кластер „Фундаментални вредности“ и ја реафирмираше подготвеноста на Северна Македонија за продолжување на тесната соработка со ЕК во контекст на целосна реализација на овие документи. Муртезани исто така ја нагласи и отвореноста на земјата активно да се вклучи во новите иницијативи што ќе бидат разгледани на Самитот, меѓу кои се подобрување на заштитата на потрошувачите, развојот на квалитетниот туризам и продлабочување на економската интеграција со Единствениот европски пазар.
На билатералната средба, беше заеднички констатирано дека Самитот во Скопје се одржува во период кога Северна Македонија ја потврдува својата водечка улога во регионот, како прва земја што ги заврши сите правни процедури за стапување во сила на финансиските договори од Планот за раст, овозможувајќи исплата на предфинансирање од ЕУ средства во износ од 52,4 милиони евра. Соговорниците се осврнаа и на неодамнешната апликација на Северна Македонија до Инвестициската рамка за Западен Балкан (WBIF) со четири нови проекти во областите кибер-безбедност, дигитализација и унапредување на образовната инфраструктура, како и на тековното спроведување на законите и мерките од Реформската агенда.
Муртезани и Кос се согласија дека следниот период е клучен за процесот на пристапување, нагласувајќи ја потребата од јасна политичка волја, динамична реализација на реформските обврски и искористување на сите нови иницијативи кои ќе произлезат од Самитот во Скопје. Воедно, беше реафирмирана заложбата на Владата да остане конструктивен и доверлив партнер на ЕУ, со фокус на конкретни резултати во интерес на граѓаните и стабилноста на целиот регион.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
ЦУК: Спасувачка акција на повредено лице при превртување на теренско возило на планинскиот пат над село Јеловце

Центарот за управување со кризи денеска попладне добил пријава за едно повредено лице при превртување на теренско возило на планинскиот пат над село Јеловце, општина Врапчиште.
Веднаш за настанот биле известени полициските станици Гостивар и Галате.
„Пријавата е добиена преку Едиствениот број за итни повици. Бидејќи теренот е тешко пристапен за возило на Итна медицинска помош, по барање на директорот на ЦУК, Мухамед Али, ДОЦ достави барање до Министерството за внатрешни работи за ангажирање на хеликоптер и специјални единици (алпинисти) за спасување на повреденото лице“, информираат од ЦУК.
Оттаму додаваат дека лицето ќе биде транспортирaно до Клинички центар за укажување на понатамошна медицинска помош.
Македонија
Андоновски: Македонија прва од регионот ќе ги исполни условите за „роаминг како дома“

Земјите од Западен балкан на претстојниот Дигитален самит кој ќе се одржи на 1 и 2 октомври во Скопје ќе усвојат заедничка изјава со повик кон Европската Унија да се забрза процесот „роаминг како дома“ и нула трошоци за интернет за нашите граѓани во ЕУ.
Унијата пред еден месец излезе со патоказ што треба да го исполниме како држави за да пристапиме кон оваа зона, но потребна е активност и од нејзина страна.
Министерот за дигитална трансформација, Стефан Андоновски, вели дека Македонија ќе ги заврши своите обврски до декември годинава и очекува наредната година први да го потпишеме договорот за роаминг со нула трошоци за македонските граѓани.
„Главна беше измената на Законот за електронски комуникации за исполнување на клучните регулативи и директиви на ЕУ што ние веќе го направивме летово. Остануваат уште неколу подзаконски акти што треба да ги завршиме до крајот на годинава и со тоа ќе ги исполниме условите. Во напредна фаза сме, го изработивме нашиот Акциски план и мислам дека ќе бидеме први од регионот“, кажа Андоновски.
Македонија
Дигиталниот Самит на Западен Балкан 2025 повторно во Скопје – 1 и 2 октомври во Музејот на современата уметност

Министерот за дигитална трансформација, на прес конференција, ја најави организацијата на Дигиталниот Самит на Западен Балкан 2025, кој повторно ќе се одржи во Скопје, на 1 и 2 октомври 2025 година, во Музејот на современата уметност.
Ова регионална платформа ги поврзува владите од регионот, деловната заедница, академијата и меѓународните партнери со цел забрзување на дигиталната трансформација во регионот.
Самитот ќе биде организиран на две сцени – главна и технолошка, со три носечки приоритети:
• Дигитален паричник – сигурен и препознатлив пристап до јавни и приватни услуги.
• Интероперабилност – поврзување на системи и регистри за прекугранични електронски услуги.
• Сајбер-безбедност – заштита на личните податоци и критичната инфраструктура.
На технолошката сцена ќе бидат отворени теми за вештачка интелигенција, 5G и оптичка инфраструктура, дигитални вештини и пристапот на регионалните компании до единствениот европски дигитален пазар.
Министерот подвлече дека се очекуваат повеќе од 800 учесници и говорници, меѓу кои: претседателот на Владата Христијан Мицкоски, министри од Црна Гора, Албанија, високи претставнци од Србија, Косово, Босна и Херцеговина, високи претставници на Европската комисија, Регионалниот совет за соработка (RCC), ITU, бизнис секторот од регионот и други меѓународни организации. Меѓу најважните гости и говорници ги очекуваме и Ренате Николаи (DG CONNECT), генералниот секретар на RCC Амер Капетановиќ, заменик-генералниот секретар на Меѓународната телекомуникациска унија (ITU) Томас Ламанускас, видео-обраќање од Томас Јарзомбек (Парламентарен Државен секретар на СР Германија), како и од приватниот сектор Свјатослав Сењута од VISA, Марк Васич од Дојче Телеком и Кејт Марш од British Council.
Министерот Андоновски, подвлече дека самитот има исклучително значење затоа што ќе го продолжи „Нашите напори за понатамошно намалување на роаминг трошоците WB6–ЕУ со патека кон „роаминг како дома“, за 0 трошоци за интернет за македонските и граѓаните од Западниот Балкан кога патуваат во ЕУ.“