Македонија
Муцунски во Шпанија: ЕУ да испрати јасна порака за да поттикне поголема доверба и кредибилитет во процесот на интеграциите
Министерот за надворешни работи и надворешна трговија, Тимчо Муцунски, вчера оствари работна посета на Кралството Шпанија.
Освен работната средба со својот шпански колега, тој се сретна и со членовите на Комисијата за надворешна политика на Сенатот на Шпанија и со потпретседателот на Шпанската конфедерација на бизнисите (CEOE), Ињиго Фернандез де Меса, а имаше и свое обраќање на Кралскиот институт „Елкано“.
Во рамките на посетата на Шпанската конфедерација на бизнисите (CEOE) фокусот на разговорите беше ставен на економските перспективи, начинот на продлабочување на економските односи, можноста за зголемување на трговската размена, која има нагорен тренд, поголемо поврзување на македонските и шпанските компании во областа на енергетиката, транспортот и инфраструктурните проекти.
Двајцата соговорници се согласија дека е неопходна поблиска соработка помеѓу шпанската деловна асоцијација и надлежните институции во државата, а воедно најавија одржување економски настани, со цел да се зближат шпанските и македонските компании и продлабочување на соработката помеѓу стопанските комори од двете земји.
На средбата со членовите на комисијата за надворешна политика на Сенатот на Шпанија беа нагласени улогата на парламентарната дипломатија и придобивките од неа нагласувајќи ја потребата од интензивирање на парламентарната соработка во претстојниот период.
Говорејќи за евроинтегративниот процес, Муцунски пред членовите на комисијата истакна дека и покрај предизвиците со кои државата се соочува во интегративниот процес, Владата макотрпно работи на спроведување на неопходните реформи и посветена е на имплементацијата на европските реформи на домашен план.
Во рамките на посетата Муцунски имаше и свое обраќање на Кралскиот институт „Елкано“ на тема „ЕУ-интеграциите како императив за безбедност, стабилност и развој на регионот на земјите од Западен Балкан“. Во настапот пред дипломатите и преставниците на тинк-тенк институтите министерот нагласи дека имајќи ги предвид турбулентните геополитички процеси во светот, регионот кој историски, географски и културолошки ѝ припаѓа на ЕУ, треба што побргу да се интегрира во европското семејство. Притоа нагласи дека сè поголема е потребата да се промени наративот и да се испрати порака од ЕУ, која би дала надеж за продолжување на процесот, додавајќи дека овој пристап ќе поттикне поголема доверба и кредибилитет во процесот на интеграцијата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Без струја денеска делови од Центар, Сопиште и Бутел
Од ЕВН Македонија АД известуваат дека денеска без електрична енергија ќе останат:
· во периодот од 07:30 до 15:00 часот, корисниците на блокот на згради од булеварот Партизански Одреди бр.17 кон улица Максим Горки, општина Центар.
· во периодот од 07:45 до 15:30 часот, корисниците на селата Јаболци, Ново Брезница, Патишка Река, Држилово, Малчиште, Црн Врв, Елово, Осинчани, Карст с.Јаболци Викендици Држилово, Сателитски Центар, Ново Брезница, Рудпроект, Јаболци, Патишка Река, општина Сопиште.
· во периодот од 08:30 до 10:30 часот, корисниците на улицата Тале Христов, Поликлиника ВФВ и Објектите околу ВРВ Поликлиник, општина Бутел.
· во периодот од 09:00 до 12:00 часот, дел од корисниците на улицата Елисие Поповски – Марко бр.21,47 и други корисници во непосредна близина, општина Центар.
Македонија
Делови од Центар и Аеродром денеска без вода
Од ЈП Водовод и Канализација известуваат дека денеска:
– поради изведување на водоводен приклучок ф-80 мм на улицата Франклин Рузвелт бб, прекинато водоснабдување ќе имаат корисниците на дел од истата улица, односно потегот од Орце Николов до Благој Давков, општина Центар.
Водоснабдувањето ќе биде прекинато од 10:00 часот до завршување со работните активности.
– поради промена на вентил во шахта ф-2“ на улицата Венијамин Мачуковски бб, прекинато водоснабдување ќе имаат корисниците од истата улица, општина Аеродром.
Водоснабдувањето ќе биде прекинато од 09:00 часот до завршување со работните активности.
Македонија
Утрото претежно ведро и студено, преку денот сончево со мала до умерена облачност
Утрото претежно ведро и студено, преку денот сончево со мала до умерена облачност. Ќе дува слаб ветер од јужен правец.
Минималната температура ќе биде во интервал од -4 до 4, а максималната ќе достигне од 15 до 20 степени.
Во Скопје, сончево со мала до умерена облачност. Ќе дува слаб ветер од југоисточен правец. Минималната температура ќе се спушти до 2, а максималната ќе достигне до 16 степени.
Времето во наредните денови
Следува период на стабилно и суво време. Претпладне по одделни котлини ќе има услови за појава на магла или ниска облачност. Поради разведрувањето утринската температура наместа ќе се спушти под нулата, а дневната ќе бележи тенденција на благ пораст.

