Инвестираме во капитални проекти за граѓаните, фокусот го ставаме на зелен и хуман развој на општината, истакнува градоначалникот на општина Аеродром, Тимчо Муцунски.

„Транспаретност, ефикасност и оптимизација на трошоците. Во изминатата година покажавме дека инвестираме и се грижиме за граѓаните, но и со оптимизација на трошоците и домаќинско работење заштедуваме средства и вложуваме во нови капитални проекти и инвестиции. Овој начин на работа продолжува и во наредниот период. Општина Аеродром во моментот го проектира буџетот за 2023 година, во кој планираме инвестиции во неколку важни и капитални проекти. Проектирање и почеток на изградбата на две детски градинки и изградба на нов плоштад зад ‘Капитол’, доградба и надградба на две училишта и нови паркови во Аеродром, се само дел од капиталните проекти што ги најавуваме за в година“, напиша Муцунски на социјалните мрежи.

Според него, важно е да споменеме дека фокусот ставен на зелен и хуман развој на општината продолжува и во следниот период со многу поголем интензитет и динамика. Тоа подразбира, како што појаснува, дека сите нови објекти што Општина Аеродром ќе ги изгради во следниот период, ќе имаат систем за енергетска обновливост и енергетска ефикасност.

„Ги намалуваме непродуктивните трошоци и вложуваме во капитални проекти. Првпат Општина Аеродром в година ќе издаде зелена обврзница, која ќе биде поддршка во реализација на капиталните инвестиции во време на економска и енергетска криза.
2023 година ќе биде година на интензивни капитални инвестиции“, додава Муцунски.

Граѓаните на Аеродром, како што вели, заслужуваат модерна и развиена општина. Општина во која се гради и се инвестира. Општина во која се реализираат голем број капитални проекти и каде што европските стандарди интензивно се реализираат и имплементираат за што, како што додава, говори и последното признание што Аеродром го доби од страна на Советот на Европа.