Сопственикот на фирмата „Инвока груп“, Даниел Станчев, која за Владата ги набави спорните софтвери за мерење брзина на возилата, тврди дека е невин. Нему не му е јасно ниту зошто бил држен во притвор. Упати и неколку прашања до Обвинителството, на кои бараше одговор, а меѓу нив и зошто бил во притвор, како и зошто му било нудено да биде сведок наместо обвинет. Додека тој зборуваше и упатуваше барања, Русковска се сврте кон него и го следеше во излагањето.

„Договорот е завршен и испорачан според сите процедури за јавни набавки. Како заклучок за тоа имаме аплицирано и како најевтин понудувач сме добиле договор. Обвинителството да одговори на прашањата зошто по две недели мое приведување во Шуто Оризари е дадена понуда за да сведочам против Рашковски, без притоа да ми биде сменет статусот од обвинет во сведок. Во досегашната постапка јасно се гледа дека од второосомничен веќе сум четвртоосомничен според Обвинителството. Исто така, јас речиси една година сум во домашен притвор. Дали јас сум обвинет поради неисполнување договор или поради мојата семејна положба, ќе се утврди со доказите во постапката. Со оглед на тоа, барам од Обвинителството да го повлече обвинението против мене бидејќи сметам дека сум невин од првиот ден кога е почната истрага“, рече Станчев.

Тој испорачуваше барања до Русковска, а со цел, како што рече, јавноста да знае повеќе детали за случајот.

„Јавноста е должна да ги има сите информации зошто сум јас држен до денешен ден во куќен притвор, зошто и дали под притисок бев држен во затворот во Шуто Оризари, дали од Обвинителството цело време ми беа нудени спогодби да не бидат опфатени лица блиски до мене. Јавноста треба да знае. Исто така, барам од судот да биде транспарентен и сите одлуки досега што се објавувани од Кривичниот суд за моите притвори јавно да бидат достапни на интернет-страницата на судот, како и другите одлуки. Сѐ друго што е наведено во обвинението, а кое не се однесува на мене, не сакам да го коментирам“, додаде Станчев.

Адвокатот на Даниел Станчев, сопственик на „Инвока груп“, тврди дека неговиот клиент имал право да се јави на тендер и да даде понуда во согласност со распишаниот тендер, па, така, не сторил ништо незаконски. Според него, сите ќе докажат дека не биле во состојба да му помогнат на Рашковски да стори или да не строи некакво дејство затоа што генералниот секретар има овластувања и ингеренции: „Дали некое дејство ќе преземе или нема, може да зависи само од неговата волја, а не од волјата или дејството на трето лице“.

„Бидејќи понудил најниска цена на софтверот, Комисијата за јавни набавки ја одбрала понудата на ‘Инвока груп’ како најповолна и му предложила на генералниот секретар да склучи договор. Во обвинението сака да се поентира со фактот што обвинетиот Даниел Станчев во согласност со склучениот договор доставил фактура до Генералниот секратаријат на Владата, а таа била платена без да биде имплементиран софтверот за определување просечна брзина на возилата и изрекување казна. Одбраната е сигурна дека се погрешни заклучоците на обвинението и затоа побаравме судот да нареди да се направи тестирање или испитување и презентација за функционалноста на софтверот за определување просечна брзина на возилата и изрекување казна во присуство на обвинетите, одбраната, судот и вештаците. Сигурни сме дека при презентацијата ќе се покаже и утврди дека софтверот е функционален, комплетен и применлив, а дека вештакот на Обвинителството, веруваме поради недоволно искуство, не успеал да утврди дека софтверот е комплетен. Одбраната е сигурна дека и од доказите на Јавното обвинителство ќе се утврди дека обвинението по однос на Даниел Станчев, всушност, претпоставува дека тој му помогнал на првообвинетиот во сторување на кривичното дело“, рече адвокатот на Станчев.

Обвинетите Ивица Димитровски и Игор Христов тврдат дека не му помагале на Драги Рашковски во незаконски дејства. Ивица Димитровски се приклучи кон барањето на Рашковски да се направи јавна демонстрација на софтверот, дека постои и дека работи, иако тој се гони дека системот во пракса не функционира и дека не е имплементиран, како и за начинот на неговата набавка. Неговата адвокатка посочи дека се надева на ослободителна пресуда иако процентот на вакви судски пресуди е мал.