Македонија
Наместо багаж, спакувал филери за лице и усни: Косовец се обидел тајно да внесе 300 парчиња во Македонија, цариниците го открија
На граничниот премин Деве Баир царинските службеници спречија обид за криумчарење на 300 парчиња филери „Револакс“, во вредност од 9.000 евра, извести Царинската управа.
– Лицето, инаку косовски државјанин со иницијали А.Г., се обидело да влезе во државата без да ја пријави стоката. На прашањето од царинскиот службеник дали има нешто да пријави истиот одговорил дека нема што да пријави освен личен багаж. При рутинската контрола извршена од страна на царинските службеници во патничкиот куфер и позади задните седишта беа откриени 300 парчиња филери за лице, во најголем дел за усни, чија вредност согласно фактурата која е пронајдена во возилото изнесува 9.000 евра, соопштува Царинската управа.
Стоката и возилото се привремено задржани, а против лицето е поднесена соодветна кривична пријава за криумчарење.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Ахмети: Неприфатливо е коалицијата која освоила помал број мандати, да стане дел од владата
Остра критика од лидерот на ДУИ, Али Ахмети кој во име на Европскиот фронт, ги обвини албанските политички субјекти кои се очекува да бидат дел од идната влада, дека го нарушиле легитимитетот на слободното гласање и на Охридскиот договор.
Според Ахмети, за Европскиот фронт, неприфатливо е коалицијата која освоила помал број мандати да стане дел од владата.
„Охридскиот договор не се чита исто од сите политички или јавни кадри, ние не дозволуваме овој договор да биде прекршен“, кажа тој.
Додаде дека таквите чекори не враќаат како што рече, две децении наназад.
„Луѓето нѐ прашуваат зошто гласаме кога некој друг одлучува за нашата волја и нашите определби, граѓаните нѐ прашуваат која е смислата на демократијата кога не се почитува легитимитетот, кога одлучува најголемата македонска партија. Ова нѐ враќа две децении наназад кога не се почитуваше слободната волја на заедниците. Легитимноста е столбот на демократијата, затоа ја започнуваме битката за почитување на Охридскиот договор. Кога се почитува духот на Охридскиот договор, општеството напредува, но кога не се почитува, се враќаме во други времиња кои колективно сме ги напуштиле“, потенцира лидерот на ДУИ.
Ахмети не сака да ги открие следните чекори на Европскиот фронт, но кусо изјави дека јавноста ќе биде на време информирана за тоа.
Македонија
Успеавме да го надминеме секој тест на издржливост, рече Кацарска на крајот од мандатот
Со непоколеблива посветеност и истрајност го зачувавме достоинството на Уставниот суд. Успеавме да го надминеме секој тест на изджливост и непристрасност на судот и не потклекнавме под еден од најспецифичничните предизвици што ги памети историјата на Уставниот суд, а тоа е 17 месеци функционирање на работ на кворумот со само пет судии, а потоа и без една третина од судиите. Ова го истакна претседателката на Уставниот суд во заминување, Добрила Кацарска.
До идниот претседател и граѓаните порача дека треба да бидат комотни бидејќи нема натрупани или заостанати предмети.
„Очекувам судот и натаму да биде ажурен, да се постапува по сите предмети, да продолжи таму каде што застанав јас“, одговори Кацарска на прашања за очекувањата од нејзиниот наследник.
Во отчетот за сработеното Кацарска рече дека судот по 32 години, донел современ акт, кој ја регулира нивната работа.
Во таа насока Уставниот суд ќе им овозможи на правните лица и на странските државјани да поднесат барање за заштита на нивните слободи и права – право што досега го имале само поединци. Понатаму, народниот правобранител ќе може да поднесува барања за заштита на слободите и правата во име на оние граѓани што не може тоа да го сторат. Овој нов акт, вели Кацарска, предвидува и т.н. контролни механизми за судиите и претседателите да не може да чуваат предмети во фиока со години, што, за жал, беше случај во минатото. Се предвидува рок од 6 медсеци за судиите да го завршат предметот. Уставниот суд, кога ќе ги добие готовите предмети, не смее да ги чува подолго од еден месец и во тој период мора да ги стави на дневен ред, појасни Кацарска.
Додаде и дека е намален бројот на стари предмети од кои некои се чувале и десетина години. Има раст на укинати или поништени акти, што во минатото ретко се случувало.
„Има 78 одлуки со кои се укинуваат закони и други акти и прописи што се донесени од разни собраниски состави, што говори за непристасноста“, рече Кацарска.
Нагласи и дека во моментот Уставниот суд работи со полн капацитет со 9 судии.
Македонија
Тошковски во посета на Секторот за меѓународна полициска соработка: во иднина да се продолжи со инвестирање во градење квалитетен кадар
Министерот за внатрешни работи Панче Тошковски денеска го посети Секторот за меѓународна полициска соработка при Бирото за јавна безбедност, каде што непосредно се запозна со работата на оваа организациска единица и одржа работен состанок со раководството.
„Во рамките на овој сектор функционираат Одделението за потраги, Одделението за НЦБ – Интерпол Скопје и Одделението за Европол. Во согласност со надлежноста што ја имаат во делот на меѓународната полициска соработка може да се каже дека овој сектор е лицето на Министерството за внатрешни работи и државата во странство и од тие причини потребно е во иднина да се продолжи со инвестирање во градење квалитетен кадар, кој ќе ги поседува сите неопходни квалификации потребни за квалитетно и професионално работење“, истакна министерот Тошковски.
Во делот на потражната дејност овој сектор има сериозна улога и во иднина треба да се направи реструктуирање во организациската структура во Бирото за јавна безбедност со цел да се изгради поефикасен и поквалитетен систем за потраги.
„Што се однесува до одделенијата за НЦБ – Интерпол Скопје и Европол, се забележуваат добри резултати, особено во делот на размена на информации со други држави и учество во меѓународни проекти. Во тој контекст е и одржувањето на 50. европска регионална конференција на Интерпол, која минатата година се одржа во Охрид. Исто така, во континуитет се надградува и унапредува пристапот до сервисите, базите и алатките на Интерпол и Европол, со што се придонесува кон зајакнување на капацитетите на МВР за борба против оние облици на криминал што имаат меѓународен карактер“, нагласи Тошковски.