Македонија
Напади врз Бугари и клубови, етикетирање на Бугарите како фашисти – Европската комисија против расизам со извештај за Македонија

Европската комисија против расизам и нетолеранција (ЕКРИ) при Советот на Европа го објави својот извештај за Македонија, притоа во делот говор на омраза се осврна на етничките Бугари.
ЕКРИ во извештајот наведува дека бугарските соговорници се жалат на антибугарскиот говор во Македонија, а како типичен стереотип го навеле етикетирањето на сите Бугари како фашисти, но и прикажувањето на Бугарките како евтини проститутки.
ЕКРИ понатаму, како загрижувачки елемент ги оценува, како што се наведува, неколкуте напади врз лица што себеси се идентификуваат како Бугари и врз бугарски културни центри, со оглед на чекорите на властите за укинување на регистрацијата или распуштање некои постојни бугарски културни здруженија.
Се наведува дека бил предизвикан инцидент во клубот „Иван Михајлов“ во Битола од страна на пејач, кој потоа бил ангажиран да настапи на локална прослава. Во извештајот влезе и клубот „Цар Борис Трети“ во Охрид, односно инцидентот со употреба на огнено оружје.
Извештајот говори дека во ЕКРИ се свесни дека имињата на Иван Михајлв и Цар Борис Трети се контроверзни и провокативни, но со загриженост забележува дека во март 2023 година Централниот регистар на Северна Македонија го одби барањето на бугарскиот културен клуб „Цар Борис Трети“ во Охрид да го задржи своето име и дека го избриша од регистарот бугарскиот културен центар „Иван Михајлов“ во Битола.
Во делот говор на омраза, покрај Бугарите, забелешки има и за односот кон ЛГБТИ-заедницата и Ромите. Се наведува дека недостига сеопфатна студија за дискриминација против ЛГБТИ-лицата или законска рамка за признавање истополови врски или адресирање промена на полот. Документот посочува дека многу Роми сè уште се соочуваат со тешка состојба со домувањето, како и дека стапката на опфатеност на ромските деца во образовниот систем и натаму е пониска во однос на онаа на припадниците на другите етнички заедници, особено кога станува збор за средното образование. Говор на омраза се регистрира и во секојдневната интеракција меѓу Македонците и Албанците.
Меѓу позитивните работи во извештајот посочено е формирањето на Комисијата за спречување и заштита од дискриминација (КСЗД). Извештајот наведува и дека новиот Закон за спречување и заштита од дискриминацијата ги вклучува и сексуалната ориентација и родовиот идентитет како основи за заштита, како и дека Министерството за труд и социјална политика обезбедило финансиска поддршка за националната СОС-линија за помош на припадниците на ЛГБТИ-заедницата. Постигнување е и достигнувањето и подготовката и усвојувањето на новата стратегија за вклучување на Ромите 2022-2030 од страна на Владата.
ЕКРИ претходно објави извештај за Македонија во јуни 2016 година.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
„Водовод“: Поради прекини на струја дојде до два дефекти истовремено на главната водоводна линија

ЈП Водовод и канализација – Скопје известува дека поради повеќе краткотрајни прекини на снабдување со електричната енергија во регионот кај бунарите на Лепенец, предизвикана е варијација на притисокот на пумпниот систем од бунарите кон градскиот цевковод од каде се дополнува водоснабдителниот систем.
Како резултат на прекините на мрежата на електрична енергија, настанати се 2 дефекти истовремено на главната водоводна линија Ф-600, како и дефект во шахта на Ф-400 на еден од бунарите.
„Поради овие дефекти, во неколку населени места од градот дојде до прекин на водоснабдувањето, но по брзата рескција на нашите екипи водоснабдувањето постепено се стабилизира со цел да се избегнат нови појави на дефекти и дополнителни оптоварувања на системот. Екипите на ЈП Водовод и канализација веднаш излегоа на терен и работат интензивно на санација на дефектите, со цел во најкраток можен рок да се обезбеди целосна нормализација на водоснабдувањето“, се наведува во соопштението на ЈП Водовод и канализација – Скопје.
Македонија
„Венко Филипче, кој е еден од ретките што комуницира со Груби, 45 илјади евра троши за само 5 дена пловење со јахтата“, велат од ВМРО-ДПМНЕ

„СДС и Венко Филипче заглавени во безидејност и очај, исплашени од историски најдлабокиот изборен пораз кој им претстои, изборната кампања, наместо натпревар на идеи, ја претворија во арена за напад. Филипче и СДС немаат што да им понудат на македонските граѓани, немаат никаква програма, идеи или проекти, ниту пак имаат со што да се пофалат за времето на нивно владеење, па уште од прв ден преминаа на црна кампања“, велат од ВМРО-ДПМНЕ.
„Па така, немајќи што да најдат против актуелната владина гарнитура, СДС и Венко Филипче се фатиле за еден договор во Железници, но не кажуваат колкава е договорената сума.
И има за што не ја кажуваат, затоа што 45 илјади евра, колку што е договорот за кој зборуваат, Филипче за јахтата ги троши само за бензин за пет дена. А, ако пак, оди на поголема дестинација или побрзо плови по морските води, тие 45 илјади евра ќе ги потроши за бензин, за приближно три дена.
Филипче, кој е поранешен министер за здравство е дел од криминалната банда на СДС, кои целосно го уништија македонското здравството.
За време на најголемата криза во корона периодот, додека луѓе умираа секој ден, Филипче го злоупотреби здравствениот систем за да врши набавка на вакцини по три пати поскапи цени преку компанија за јужно овошје, наречена Стабри од Хонг Конг.
И додека народот чекаше донации од соседните држави, СДС и Филипче купуваа заштитна опрема по 10 пати повисока цена од реалната.
Истиот тој Филипче, сега случајно или не, се фали дека е голем пријател на Зоран Заев и еден од ретките којшто комуницира со Артан Груби, едниот невиден криминалец, а другиот плус и бегалец.
Филипче можеби не знае, но помагањето на Груби за бегство од правдата, претставува кривично дело.
ЈО барем нека провери како Филипче е во комуникација со бегалец од правдата, кога веќе не го истражуваат за начинот на којшто работеле во минатото СДС и Филипче.
А, народот со масовна излезност на изборите, уште во прв круг, да стави крај на оваа криминална банда на СДС и со гласање за број 9, да го направи вистинскиот избор, со твојот човек, за твоето место, за твојата иднина“, соопшти ВМРО-ДПМНЕ.
Македонија
Делови од Карпош и Сарај денеска без струја

Од ЕВН Македонија АД известуваат дека денеска без електрична енергија ќе останат:
– во периодот од 09.00 до 13.00 часот, корисниците од ул. Пелистерска 4-1/8. (општина Карпош)
– во периодот од 09.00 до 14.00 часот, корисниците од улиците бр. 3 и бр. 5 како и околните објекти во нивна близина во Сарај.(општина Сарај)