Македонија
Наумовски: Парите за повисока плата се планирани во случај да се промени законот

Градоначалникот на општина Ѓорче Петров, Александар Наумовски, тврди дека засега нема да зема повисока плата и ќе чека законски измени за да добие зголемување во текот на годината. Тој вели дека средствата само се испланирани, ама не значи дека ќе има реализација. Оваа реакција следува кога „Макфакс“ објави дека во буџетот за годинава предвидена е повисока плата за градоначалникот, а голем број ветени проекти на Општината се нереализирани, односно за нив не се предвидени пари.
„Платата на градоначалникот не е зголемена. Таа останува иста, непроменета. На градоначалникот Александар Наумоски му се исплаќа плата во согласност со Законот за изменувањето на Законот за плата и други надоместоци на избраните и именуваните лица во Република Македонија. Законот предвидува посебен коефициент за утврдување плата за градоначалниците, а тој коефициент зависи од бројот на жители во општината. Коефициентот на Наумоски е 3,2. Со ребалансот на буџетот предвидените, а нереализирани средства, во делот на платата на градоначалникот се пренаменуваат“, велат од пиар-секторот во Општината.
Но, тезата дека Наумовски нема да зема поголема плата, а парите се само превидени за таа намена, е дискутабилна и отвора други прашања. На пример, зошто нема повеќе пари за осветление, проектирање, капитални инвестиции, изградба на објекти, кои би биле проектирани со буџетот, па доколку не се искористат, тие да бидат пренаменети.
„Макфакс“ објави дека Наумовски нема предвидено средства во буџетот за изградба на нова градинка во Волково, а градоначалникот вели дека за почеток на градба на градинка во Волково средства се очекуваат од МТСП преку инвестициската програма ТАВ. Ова практично значи дека изградбата ќе почека сè додека ресорното министерство не издвои средства, иако Наумовски вели дека пуштањето на градинката ќе биде во 2020 година.
Во текот на изборната кампања градоначалникот на Ѓорче Петров беше дециден дека во општината ќе биде изграден базен, а сега вели дека е во тек анализа за да се утврди дали проектот е исплатлив. Но, наместо изградба на отворен и затворен базен, жителите ќе добијат мал спортски базен во склоп на основно училиште.
Наумовски ветува дека ќе се доврши изградбата на фекалната канализација во Волково, Стопански Двор и Кисела Јабука, па така, според него, покриеноста со фекална мрежа ќе била 100 отсто. Нејасно е како е дојдено до овој процент имајќи предвид дека населените места Никиштане и Орман не влегуваат во проектот за изградба на одвод и сè уште користат септички јами. Доколку покриеноста со фекална канализација е 100 отсто, тогаш треба цела општина да има одвод.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Лимани: Владата останува посветена на елиминирање на сите форми на насилство врз жените

Министерот за социјална политика, демографија и млади, Фатмир Лимани воедно и претседавач на Националното координативно тело за имплементација на Конвенцијата на Совет на Европа за спречување и борба против насилство врз жените и семејното насилство, денеска ја отвори конститутивната седница на ова тело.
Тој се заблагодари на присуството на присутните, нагласувајќи го значењето на ова тело чии заложби се насочени кон унапредување на заштитата на жените жртви на насилство и семејното насилство.
Лимани се осврна на досегашните преземени акции на државата со цел подобра подготвеност за превенција, заштита и спречување на насилството врз жените и семејното насилство. Од ратификацијата на Истанбулската конвенција, потоа подготовката на Акциски план за спроведување на Конвенцијата за спречување и борба против насилството врз жените и домашното насилство 2018-2023, 2024 год, евалуација на истиот. Потоа, носењето на Законот за спречување и заштита од насилство врз жените и семејното насилство, каде се нагласува улогата на Националното координативно тело со конкретни надлежности, подготвување на осумгодишна Национална стратегија, со четири годишни акциски планови и годишни планови.
„Во изминатиот период како Министерство, преземаме низа мерки и активности за подобрување на системот за превенција и заштита на жените жртви на насилство и семејно насилство преку унапредување на националната легислатива, подзаконски акти, документи, јакнење на капацитетите на стручните лица преку реализирање на обуки, проширување на мрежата на специјализирани услуги за жртвите и организирање на кампањи. Ве уверувам дека Владата на Република Северна Македонија, ги потврдува своите заложби за преземање на сите неопходни мерки за елиминирање на сите форми на насилство,“ рече Лимани.
На седницата беа подетално претставени сите документи и активности кои се донесени и реализирани, како и соработката со меѓународните и граѓанските чинители.
Македонија
Царината заплени дрога, цигари, суплементи, парфеми и алкохол на граничните премини и во внатрешноста на државата

40 штеки цигари, 5 грама марихуана, 2.700 ќесички суплементи, 17 парфеми, 7.500 евра, 600 пакувања со вештачки трепки, 35 литри алкохолни пијалоци и разна друга стока е запленета во текот на изминатите денови, во случаи на откриени прекршочни дела, при што против сторителите е спроведена соодветна постапка, соопшти Царинската управа.
Најголем дел од случаите биле откриени од мобилните тимови кои при контроли извршени на граничните премини и во внатрешноста на државата откриле и спречиле повеќе прекршочни дела.
Според надлежните,40 штеки цигари и 17 парфеми, се откриени на Меѓуградската автобуска станица при контрола на автобус со турски регистарски таблички кој сообраќал на редовната линија Истанбул-Гостивар, извршена на Меѓуградската автобуска станица Скопје. Непријавените производи биле пронајдени на повеќе места во внатрешноста на автобусот – фиоката над возачот, позади возачкото седиште, во фиоката над предните скали, под и на претпоследните седишта и во просторот за одмор на возачите.
Пет грама опојна дрога марихуана е откриена при контрола на патнички кампер со швајцарски регистарски таблички со кој француски државјанин се пријавил за влез во државата на граничниот премин Блаце.
При претрес на возач на автобус на граничниот премин Табановце, откриени се непријавени 9.500 евра. На лицето, македонски државјанин, согласно законските прописи му се вратени две илјади евра, а останатите 7.500 евра се запленети.
Во друг случај на граничниот премин Табановце, мобилен тим при контрола на камион со скенер, откри разна стока која не била пријавена меѓу која и опрема за уредување на домот.
При контрола на минибус на влез во државата на граничниот премин Блаце се откриени дури 2.700 ќесички со суплементи Arabesca Genitals и Arabesca Slim Mix, кои биле скриени на различни места во возилото. Возачот на минибусот, изјавил дека пронајдената стока е пратка која требало да ја достави на лице во Скопје.
Вкупно 600 пакувања со вештачки трепки, се пронајдени при контрола на патните торби на италијанска државјанка кој допатувала на Меѓународниот аеродром Скопје со лет од Рим.
При контрола на стока со потекло од Турција наменета за фирма од Гостивар, пријавена за увозно царинење во царинската испостава Скопје 4 се запленети 120 пара чорапи со ознаки на заштитена трговска марка поради основано сомневање дека повредуваат права од интелектуална сопственост.
Во други случаи царински службеници на граничните премини Дојран и Табановце, открија прекршочни дела при што запленети се употребувана пумпа, 35 литри алкохолни пијалоци, 117 парчиња облека, како и разна друга стока.
Македонија
Утре наутро протест и блокада на мостот „Близнаци“ против депонијата „Вардариште“

Иницијативата „Стоп за Вардариште“ најави дека в петок, 26 септември, освен закажаниот протест во 18 часот, ќе се одржи и утрински протест со почеток во 7.30 часот. Протестот ќе биде со блокада на мостот „Близнаци“, кој ги поврзува општините Аеродром и Гази Баба.
Од иницијативата ги повикаа работодавците да покажат разбирање и толеранција кон вработените, кои евентуално ќе задоцнат на работа, а возачите – на трпение.
Организаторите објаснија дека на овој чекор се одлучиле поради истекување на рокот од пет дена што го дадоа за да се почне со исполнување на итните барања, меѓу кои се: воспоставување 24-часовен видеонадзор и физичко обезбедување на „Вардариште“, итно иселување и згрижување на лицата што живеат таму, поставување ограда околу депонијата, почнување процес за конечно затворање, откривање и казнување на потпалувачите и организаторите на пожарите, како и ригорозни мерки против сите што ќе продолжат да фрлаат отпад.
Барањата беа доставени до државниот врв, Владата, надлежните министерства, Град Скопје и до општините Аеродром и Гази Баба, но од иницијативата велат дека досега не добиле никаков одговор.
„Ги повикуваме сите граѓани да ни се приклучат бидејќи чистиот воздух е приоритет за сите нас“, порачаа од иницијативата.