Македонија
Најголем број од новозаболените и починатите од Ковид-19 се лица над 60 години
Најголем број од новозаболените и починатите од Ковид-19 во периодот од 27 јули до 2 август се лица над 60 години, покажува најновиот извештај на Институтот за јавно здравје.
Министерството за здравство (МЗ) соопшти дека продолжува трендот на намалување на бројот на новозаболени и починати лица, а се бележи и значително зголемување на бројот на оздравени лица во однос на претходната недела, според неделниот извештај на Институтот за јавно здравје, објавен денеска за периодот од 27 јули до 2 август.
МЗ исто така соопшти дека R0-факторот на преносливост на вирусот покажува позитивен тренд на намалување, кој изнесува 0,9, а во континуитет речиси еден месец е околу 1.
Институтот за јавно здравје известува дека од 27 јули до 2 август направени се вкупно 9.709 тестирања (146 повеќе од периодот 20-26 јули) и регистрирани се 912 позитивни случаи на Ковид-19, што е 4,6 % помалку од претходната недела.
Во истиот период благо намалување има и во проценотот на позитивни од тестирани случаи, кој изнесува 9,4 % (претходната недела 10 % од тестираните беа позитивни).
Новозаболени се регистрирани во 28 града, при што најголем процент на новозаболени има во Скопје (27,9 % – бележи благо намалување три недели по ред), во Штип (12,2 %) и во Гостивар (11,2 %).
Во 19 града во земјата за истиот период бројот на новопотврдени случаи е под 20.
Во однос на старосната структура на новозаболените, во овој период најголем процент се лица над 60 години – 22,9 %, а поголем број заболени се регистрира и кај лицата на возраст меѓу 30-39 години – 19,4 %. Во возрасната група 40-49 години се 17,9 % од новозаболените, а во групата 50-59 години – 17,8 %.
Најмал број е регистриран кај децата од 0 до 9 години – 3,1 % и од 10 до 19 години – 5,0 %.
Од случаите што епидемиолошки се истражени, хоспитализирани се 136 лица или 15,7 %, а кај 277 лица или кај 32,2 % регистрирано е присуство на коморбидитети.
Од вкупниот број епидемиолошки истражени новозаболени, 38,1 % имале контакт со потврден случај на Ковид-19, а 21 лице (исто како и претходната недела) имале историја за патување во странство во минатите 14 дена.
Во периодот 27 јули – 2 август регистрирани се 1.032 оздравени лица, кои биле хоспитализирани или на домашно лекување, што е за 378 лица или 36,6 % повеќе од претходната недела (20 – 26 јули).
Во периодот 27 јули до 2 август регистрирани се 29 смртни случаи, што е намалување од 14,7 % во однос на минатата недела. Повеќето од случаите се лица над 60 години – 75,9 %. Во болнички услови се починати 24 од случаите, а пет вонболнички.
Кај 23 од смртните случаи (79,3 %) се регистрирани претходни коморбидитети.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Филипче: ВМРО-ДПМНЕ сака да ја врати Македонија во времето на страв и уцени
ВМРО-ДПМНЕ сака повторно да ја врати Македонија во времето на страв, на уцени и притисоци, но граѓаните нема да потклекнат, рече претседателот на СДСМ, Венко Филипче, на вечерашниот собир во Конче во поддршка на кандидатот за градоначалник од СДСМ, Благој Илиев.
Тој остро ги осуди притисоците врз граѓаните во текот на кампањата, потенцирајќи дека власта на ВМРО-ДПМНЕ се обидува да ги заплаши луѓето преку институциите.
„Со полиција, финансиска полиција, шумска полиција, преку социјалните служби, прават притисок врз граѓаните. Сакаат да потсетат на времето кога сите живеевме во страв и уцени. Но тоа време заврши. Луѓето сакаат нормален живот, без притисоци, без закани, без поткуп,“ рече тој.
Филипче повика на масовна излезност во недела и поддршка за кандидатот на СДСМ, Благој Илиев.
„Да излеземе во огромен број во недела и да го заокружиме бројот 5 за Благој Илиев, човекот кој работи за вас, не за себе. За Конче да продолжи да се развива“, рече Филипче.
Тој кажа дека градоначалниците од СДСМ реализирале 90 до 100 проценти од ветеното.
„Нема општина во која СДСМ има градоначалник, а да ветената програма не е завршена 90 или 100 проценти“, рече Филипче.
Тој истакна дека граѓаните најдобро ја чувствуваат разликата кога општините ги водат луѓе кои работат чесно и посветено во интерес на сите.
„Многу добро знаете како Благојче работеше во минатиот мандат, како се однесуваше додека беше градоначалник, дека вратата му беше секогаш отворена и дека работеше за доброто на општината и на вас, граѓаните“, порача Филипче.
Претседателот на СДСМ во своето обраќање нагласи дека токму оваа разлика меѓу одговорно и неодговорно владеење се гледа насекаде низ државата.
„Нема општина во држава во која што има градоначалник од ВМРО-ДПМНЕ, а да програмата е завршена повеќе од 20 проценти. Како да се натпреваруваат кој помалку ќе работи за граѓаните“, рече Филипче.
Македонија
Претседателката на ЛДП, Моника Зајкова, со поддршка на Горан Герасимовски за втор градоначалнички мандат
Претседателката на ЛДП Моника Зајкова, денеска даде поддршка за втор градоначалнички мандат на Горан Герасимовски, којшто воедно е и актуелен градоначалник на Општина Центар.
Таа, потенцира дека сега е моментот да се изберат резултати, одговорност и отчетност, а не празни ветувања, токму затоа ја дава поддршката на Горан Герасимовски, кој, според Зајкова, ја препознава граѓанската визија, има искуство и е подготвен да работи посветено за доброто на заедницата.
„Одејќи накај Собрание (бидејќи работиме на новиот Предлог- закон за комунална полиција), наидов на предизборните активности на кандидатот за градоначалник на општината во која живеам. Водејќи се од визијата дека на граѓаните им се потребни искусни луѓе кои испорачуваат резултати, а не изговори, упатувам особен повик до сите граѓани кои во првиот круг гласаа за кандидати кои не влегоа во вториот круг: Поддржете кандидат кој ги разбира вашите потреби, кој со своето искуство и посветеност ќе испорача повеќе резултати и веднаш ќе започне со работа – со завршување на започнатите проекти и реализација на нови решенија во интерес на сите нас. Затоа давам поддршка за луѓе како Горан – кои ја препознаваат граѓанската визија, имаат искуство и се подготвени да работат посветено за доброто на заедницата. Сега е моментот да избереме резултати, одговорност и отчетност, а не празни ветувања“, напиша Зајкова, на својата објава на Фејсбук.
Македонија
Утре сончево време со температура до 21 степен
Времето утре наутро ќе биде постудено со услови за појава на магла по одделни котлини и речни долини. Преку денот времето ќе биде сончево со мала до умерена локална облачност. Ќе дува слаб ветер од јужен правец, информира УХМР.
Минималната температура ќе биде во интервал од -3 до 4, а максималната ќе достигне од 16 до 21 степен.
Во Скопје, утрото постудено, во делови од котлината магливо. Преку денот времето ќе биде сончево со мала до умерена облачност. Ќе дува слаб југоисточен ветер. Минималната температура ќе се спушти до 2, а максималната ќе достигне до 18 степени.
Под влијание на висок воздушен притисок следува период на стабилно и суво време со постудени утра, а дневната температура ќе биде во пораст, особено во деновите од викендот. Претпладне по одделни котлини и речни долини ќе има услови за појава на магла

