Вербалните закани, говорот на омраза и антиалбанската реторика поттикнати и од владини политички експоненти и националистички групи, почнаа на дело да се реализираат со напади врз Албанците и нивниот имот, како што беше случајот синоќа во Куманово каде беа запалеми канцеларија и три возила сопственост на Албанците, истакнуваат од Алијанса за Албанците.

„За жал, како и во минатото така и сега, Куманова повторно е избрана за арена за опасни сценарија и следен удар врз Албанците.
По последователни настани, изјави започнати во текот на кампањата, владини одлуки, инциденти за време на празникот 28 ноември и сега со палењето на имотот на албанци во Куманово, јавно прашуваме кој стои зад целата оваа кампања и кој си игра со оган? Можеби таканаречениот „српски свет“, заедно со нивните слуги во Северна Македонија, сакаат слична дестабилизација како што се обидоа пред неколку денови во Косово“, нагласуваат од оваа партија.

Загрижени од состојбите и последните случувања, ги повикуваат граѓаните да бидат внимателни и да не станат, како што велат, плен на вакви провокации и сценарија, а Владата и надлежните институции итно да дејствуваат да ги спречат.

„Ги повикуваме албанските партии во Владата да стават крај на нивната авантура за која од почеток ги предупредувавме и да не станат марионети на нивните партнери кои отворено ги искажаа своите планови против Албанците, туку да се вратат кај народот заедно да ја запреме оваа опасна кампања.
Алијансата за Албанците ја повикува меѓународната заедница директно да интервенира за да се спречат ваквите настани и оваа кампања која ја загрозува не само земјата, туку и целиот регион“, потенцираат во реакцијата.

Оставката на претседателката на Судскиот совет, Весна Дамева, претставува уште еден драматичен момент кој ја одразува алармантната состојба на заробената држава и урнисувањето на независноста на институциите. Личните напади, политичките притисоци и јавните манипулации што ги опиша госпоѓа Дамева се јасен одраз на нелегитимната и неодговорна власт, која не запира во обидите да го прошири своето влијание врз секој сегмент од државата, оценуваат во ДУИ.

„Оваа влада не само што не успеа да обезбеди праведен и независен судски систем, туку ги користи сите средства за да ги уценува и дискредитира оние кои не се подготвени да се покорат пред политичките притисоци. Кога високи функционери на правосудството, задолжени за заштита на правото и правдата, јавно се уценуваат, пораката е јасна: во оваа држава, независноста на институциите стана непријател на власта“, се нагласува во нивната реакција.

Демократската унија за интеграција најостро ги осудува политичките напади врз госпоѓа Дамева и како што велат, бруталните интервенции врз интегритетот на Судскиот совет. Ваквите напади, според нив, не се само личен напад врз еден поединец, туку и обид за парализирање на целиот судски систем, со што се поткопуваат сите напори за реални реформи и независна правда.

Апелираат до меѓународните институции внимателно да ја следат оваа состојба и да реагираат на континуираното лизгање на Северна Македонија кон авторитаризам и целосна заробеност на државата.

„Јасно е дека граѓаните не можат да очекуваат правда од влада која ги напаѓа правосудните институции за политички добивки.

Ова е повик за рефлектирање и делување. Независноста на судството е столб на секоја демократија, а неговото заробување е чин што ја загрозува стабилноста и иднината на државата. Ние, како Демократска унија за интеграција, секогаш ќе застанеме во одбрана на независните институции и на правдата, бидејќи веруваме дека слободната и непристрасна правда е единствената гаранција за праведно и еднакво општество“, велат од партијата на Ахмети.

„Љупчо Коцевски како шеф на ЈО повеќе од 6 месеци имаше можност да почне да си ја работи работата за која е платен од граѓаните. А тој не мрдна со прст. 6 месеци Љупчо Коцевски не отвори ниту еден случај, а обвинителите бирани во Струмица и Зајас кои чудно се разболуваат кога треба да постапуваат наместо да ги суспендира, тој ги брани“, рече Бране Петрушевски, пратеник од ВМРО-ДПМНЕ.

„6 месеци ЈО ја опструира правдата. Обвинителите наместо да соработуваат со институциите бараат начин како да ескивираат.

Обвинителите бирани во Струмица и Зајас, на кои им се влошува здравјето кога ќе треба да гонат криминал, се причина зошто довербата на граѓаните во правосудството е 2%.

Љупчо Коцевски, како шеф на ЈО е директно одговорен за неработата на ЈО и очигледниот заштитнички однос на одредени обвинители кон криминалците дел од поранешната власт.

Го повикуваме Републичкиот јавен обвинител во најбрз можен рок да почне со постапување по закон.

Граѓаните очекуваат правда, и владеење на правото, а не изговори“, изјави Петрушевски.