Македонија
(Видео) Најтежок облик на дискриминација утврден во две основни училишта: родители испишуваат деца за да не учат со Роми

Народниот правобранител констатирал зголемување од 20 проценти на покренати претставки за повреда на човековите права и слободи во споредба со минатата година. Најголемо повредување на правата имало кај детските права.
Од покренатите постапки во 683 постапки, народниот правобранител констатирал повреда на човековите права. Како и претходната, така и во 2022 година, трендот на прво место според бројот на поднесени претставки е во областа на правосудството.
„И тоа 534 претставки или 16,64 % од вкупниот број претставки. Потоа се потрошувачките права со над 10 %, па работните односи, детските права, имотно-правните односи…“, изјави тој и додаде дека според констатираните повреди најголем број имало во детските права.
Издвои два примера, каде што е утврден најтежок облик на дискриминација, односно сегрегација во две основни училишта. Едно во Битола и едно во Штип. Се работи за ОУ „Ѓорги Сугаре“ во Битола и ООУ „Гоце Делчев“ во Штип, каде што има паралелки составени претежно од ромски деца.
„Овие училишта зачестено издаваат согласности за запишување на ученици, најчесто од македонска етничка заедница, во други општински училишта, иако според местото на живеење го опфаќаат реонот на горенаведеното основно училиште. На тоа инсистираат родителите кои не сакаат нивните деца да учат со Роми. Апелирам до овие две општини и училиштата да престанат со праксата на издавање на исписници од училиштата зошто процесот на инклузивност е еден од најзначајните процеси за елиминирањето на дискриминацијата“ порача народниот правобранител.
Меѓу другото, го нагласи проблемот со немањето доволно образовните асистенти за учениците со попреченост.
„Дел од нив останаа без поддршка. Се додека за овој проблем не се најде системско и трајно решение, родителите ќе треба сами да се грижат за своите деца или да платат асистенти што е спротивно на конвенцијата за правата на децата“ рече тој.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Со запален факел се обидел да подметне пожар во Струмица: под истрага едно лице за загрозување на општата сигурност

Јавен обвинител од Основното јавно обвинителство Струмица донесе Наредба за спроведување истражна постапка против едно лице за обид да изврши – Тешки дела против општата сигурност од член 292 став 1 во врска со член 288 став 1 од Кривичниот законик.
Осомничениот вчера попладне, преку една социјална мрежа, се заканил на лице од Струмица дека ќе му ја запали викендицата, а потоа се обидел заканите да ги реализира.
На локацијата брана Водоча се обидел да подметне пожар и да предизвика поголема имотна штета. Со запален факел од хартија и текстил ги запалил гредите на натстрешницата, кои започнале да чадат и да горат. Со тоа предизвикал ризик од пожар не само на објектот, туку и на повеќе други викенд-куќи и на нискостеблеста и високостеблеста вегетација во непосредна близина.
Поради опасност од бегство и можност да го повтори односно да го доврши делото, јавниот обвинител до судијата на претходна постапка достави предлог за определување мерка притвор.
Македонија
Мицевски: Денес паднаа маските, ДУИ и СДС го штитат Коцевски за да им го штити криминалот

Што значи пораката која што СДСМ денес ја упати кон јавниот обвинител Коцевски: „ Од тебе зависи дали ќе бидеш со штитот или на него“. Денес, пратеникот на СДСМ, Јован Митрески, јавно му порача на јавниот обвинител Коцевски дека „од него зависи дали ќе биде со штитот или на него“! Ова не е обична и наивна политичка изјава, ова е опасна и директна порака до Коцевски да остане таму каде што е и да продолжи да ја брани позицијата на СДСМ и ДУИ, наместо да преземе одговорност и да постапува професионално и независно, објави на социјалните мрежи координаторот на пратеничката група на ВМРО-ДПМНЕ, Никола Мицевски.
Ова, како што вели, е порака со која што СДСМ му става на знаење на Љупчо Коцевски дека не смее да помисли да се повлече, не смее да излезе од улогата на „заштитник“ и дека мора да продолжи да ги штити нивните криминали со непостапување, молчење и блокирање на секоја правна акција што би ја погодила нивната мрежа.
„Љупчо Коцевски, со оваа политичка „поддршка“ која што ја добива од двоецот СДСМ-ДУИ, се става во позиција да биде симбол на одбраната на криминалните структури и коруптивните шеми кои ја уништија Македонија и ја урнисаа довербата на граѓаните во правосудниот систем.
Од друга страна, се поставува прашањето:
Дали оваа „лозинка“ на СДСМ е порака на поддршка или порака на закана кон Коцевски?
Едно е јасно и кристално чисто.
Денес маските паднаа, а граѓаните ја дознаа вистината!
СДСМ и ДУИ се во очаен и последен обид да го спасат Коцевски, бидејќи само така можат да го заштитат својот криминал“.
СДСМ изминатиов период, додава Мицевски, глумеше и манипулираше, но затоа денес не гласше „За“ интерпелацијата на Коцевски.
„И токму тука лежи одговорот, зошто ниту еден функционер на СДСМ не е гонет од обвинителството со кое што раководи Коцевски, дури и по една година откако тие во се опозиција.
Но веќе нема “како до сега”!
Нема да дозволиме јавниот обвинител како институција да биде нечија алатка за спас од одговорност, ниту на СДСМ, ниту на ДУИ, ниту на било кој друг политички центар на моќ“.
Мицевски нагласува дека правдата и правичноста ќе победат, а криминалците ќе го добијат заслуженото.
Македонија
Сиљановска-Давкова-Саид Ал-Хајарин: Единството на малите и средни држави може да биде важен фактор во обликувањето на глобалната политика

Претседателката Гордана Сиљановска-Давкова денеска го прими Рашид бин Саид Ал-Хајарин, вршител на должност во aмбасадата на државата Катар во Скопје.
На средбата беа разменети мислења за севкупниот развој на билатералните односи, при што Сиљановска-Давкова изрази подготвеност и отвореност за нивно зајакнување и унапредување. Според неа, единството на малите и средни држави може да биде важен фактор во обликувањето на глобалната политика.
Одбележувањето на три децении дипломатски односи следната година, според претседателката, е добра можност за интензивирање на контактите на највисоко политичко ниво, со очекувано позитивно влијание врз развојот на односите во енергетиката, градежништвото, земјоделството, образованието, културата, науката и туризмот.
Сиљановска-Давкова го истакна интересот за унапредување на економската и трговската соработка и ја посочи отвореноста за директни инвестиции од Катар. Таа изрази очекување за наше вклучување во проектот за извоз на природен гас од Катар, како и за повторно воспоставување на директна авионска линија Скопје-Доха.
Соговорниците разменија мислења и за состојбите на Блискиот Исток, при што се истакна важната улога којашто Катар ја има во напорите за обезбедување мир и стабилност во регионот.
На претседателката Сиљановска-Давкова и беше врачена покана од неговото височество шеик Тамим Бин Хамад Ал-Тани, емир на Државата Катар, за учество на Вториот светски самит за социјален развој што ќе се одржи во Доха во ноември, клучна платформа за глобален дијалог и соработка за општествен напредок во време на растечки нееднаквости, демографски промени и брза технолошка трансформација.