Македонија
Најтешките случаи со Ковид-19 ќе се лекуваат со озонирање на крвта
Во Градската општа болница „8 Септември“ денеска е донесен апарат за озонска терапија на најтешко болните заразени со коронавирус, извести министерот за здравство, Венко Филипче. Домашните анестезиолози направиле детални анализи на искуствата од другите земји каде пациентите веќе се лекуваат на ваков начин.
„Озонирање на крвта е една метода што се користи за третманот на овие пациенти, пред сè за најтешките случаи. Има публикации и искуства од други земји и врз основа на тие искуства тимот на анестезиолози од болницата ’8 Септември’ направи една детална анализа на навистина обемна литература. Заклучија дека вреди да се направи обид оваа терапевтска мерка да се аплицира кај овие пациенти. Деновиве почнува и оваа апликација, практично станува збор за метода со која се озонира одредена количина на крвта која се вади од пациентот и потоа истата се враќа во неговата циркулација“, рече министерот Филипче.
Докторка од анестезиолошката служба во болницата „8 Септември“, по детална анализа, му укажала на министерот дека оваа терапија може да ја примаат одредена група пациенти. Засега министерот вели дека немаат доказ дека помага, но во исто време немаат ниту доказ дека одмага. Одлуката кај кој пациент да се примени терапијата ќе биде на анестезиолозите.
„Ќе оставиме на проценка на анестезиолозите , тие кои секојдневно се со пациентите ќе кажат за кој пациент може да се примени и врз основа на која индикација. Сакам да потенцирам една работа, нема ограничување за оваа терапија. Значи кој пациент и да даде индикација, ќе може да ја прими терапијата“,рече министерот Филипче.
Тој објасни дека причина за тешката слика кај заболените од коронавирусот е недоволната оксигенација на крвта, а со озонирањето се подобрува способноста да однесе кислород до ткивата.
„Се вадат 15 милилитри, се озонираат и се враќаат во циркулацијата. Тоа може да се повтори неколку пати во денот. Тој е механизмот на делување. Терапијата се индицира врз основа на проценка на степенот на оксигенација на крвта. Тоа е параметар кој што може да се мери и се мери кај сите пациенти што се во интензивна нега. Кај оние пациенти кои имаат тешкотии со дишењето кај кои според оние претпоставени механизми самата крв е компромитирана па еритроцитите не можат да го врзат кислородот за да го однесат до ткивата, ова може да помогне. Значи на кратко, подобра можност крвта да оксигенира ткива во повеќе органи во организмот“, објасни министерот Филипче.
За утре на Институтот за трансфузиона медицина е закажана и првата екстракција на плазма која исто така ќе се користи за третман на пациенти заболени од Ковид-19. Оваа метода превидува најтешко болните да се лекуваат со крвта од веќе излекувани пациенти. Министерот нагласи дека овој начин на лекување со крвна плазма може да се примени само кај пациенти кај кои има индикации за такво лекување.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Одлуки за учество на припадници на Армијата на вежби во Германија, Бугарија, Косово
Владата на денешната седница донесе и повеќе одлуки на предлог на Министерството за одбрана, меѓу кои и за испраќање на припадници на Армијата на Република Северна Македонија за учество на вежбата „BEYOND HORIZON 24“, во Република Бугарија, за испраќање на припадници на Армијата на Република Северна Македонија за учество во НАТО операцијата „КФОР“ во Република Косово и за испраќање на припадници на Армијата на Република Северна Македонија за учество на вежбата „Combined Resolve 24-2“ во Сојузна Република Германија.
Македонија
Личните документи ќе можат да се подигнат и в среда, извести МВР
Во пресрет на претстојните Претседателски и Парламентарни избори што ќе се одржат утре, Министерството за внатрешни работи ги известува граѓаните дека Одделот за граѓански работи, односно сите отсеци за управни работи на оваа организациона единица при МВР на 08.05.2024 ќе работат за издавање на лични документи со работно време од 08.00 до 19.00 часот.
„Исто така ги известуваме граѓаните дека сите барања за лични карти кои се поднесени до 03.05.2024 година, се веќе изготвени и граѓаните можат да ги подигнат“, соопшти МВР.
Македонија
Пронајдени три полуавтоматски пиштоли и 139 куршуми, ОЈО Велес отвори истрага за недозволено држење оружје
Основното јавно обвинителство Велес донесе Наредба за спроведување истражна постапка против едно лице за кривично дело – Неовластено изработување, држење, посредување и тргување со оружје или експлозивни материи од член 396 став 5 во врска со став 3 на Кривичниот законик.
„При претрес во домот на осомничениот во селото Мелница, општина Чашка, полицијата пронашла поголемо количество оружје и муниција – три полуавтоматски пиштоли и 139 куршуми со различен калибар. За осомничениот поднесен е предлог за определување мерка притвор“, соопшти Обвинителството.
ОЈО Велес продолжува да постапува и да презема дејствија за проверка на сомненијата за изборен поткуп во однос на овој осомничен и на уште едно лице во велешко кај кое во текот на вчерашниот ден беа извршени претреси, се додава во соопштението.