Македонија
На Табановце и Богородица за излез од државата се чека околу еден час

Сообраќајот на државните патишта се одвива непречено по суви коловози.
Интензитетот на сообраќај на патните правци надвор од градските средини е умерен. На ГП Табановце и ГП Богородица за излез од државата времето на чекање е околу 1 час.
На другите гранични премини од македонска страна нема подолги задржувања за влез и излез од државата.
АМСМ препорачува приспособена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде што има можност од појава на одрони. Ова особено се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Од настанатите поплави на 14.6.2003 година во Делчево и околината оштетени се темелите на мостот на Црвенска Река на магистралниот пат А3 делница Македонска Каменица – Делчево. Сообраќајот на мостот се одвива наизменично по една коловозна лента.
Регионалниот пат од с. Извор кон Прилеп, поточно с. Степанци, општина Чашка, кон Прилеп е со наноси од земја и кал поради дождот и тој е непрооден.
Почнувајќи од 8.4.2023 година, патниот правец Охрид – Ресен, преку националниот парк Галичица, е отворен за сообраќај за возила со дозволена носивост до 3,5 тони.
Од 3.7.2023 ќе почнат градежни активности, со што ќе се изврши промена на режимот на сообраќај на регионалниот пат Р1201 Струга – Дебар (фаза 1 асфалтирање кај с. Глобочица и фаза 2 – асфалтирање кај с. Луково), каде што ќе има целосно затворање на сообраќајот од 10 до 14 часот. Градежните активности на регионалниот пат ќе се извршуваат до 8.7.2023 година.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Ангелов со апел до граѓаните: Пријавете на 112 ако видите сомнително однесување поврзано со пожарите

Директорот на Дирекцијата за заштита и спасување, Стојанче Ангелов, денеска упати силен апел до граѓаните да пријават какво било сомнително однесување на лица, поврзано со пожарите, откако биле откриени докази за намерно подметнати огнови на повеќе локации во земјава.
„Доколку забележите лице со сомнително однесување, веднаш пријавете на бројот 112 или во најблиската полициска станица“, изјави Ангелов на прес-конференција во Владата.
Во моментов, според податоците, во земјава има пет активни пожари, додека уште пет се ставени под контрола. Во изминатото деноноќие, биле изгаснати 66 пожари на отворен простор.
Ангелов информираше дека на терен се забележани дрвени палети полиени со бензин, гуми и шишиња со запаливи течности, што укажува на обиди за подметнување на пожари.
„Синоќа кај Смилковско Езеро беше пронајдена гума, а во друг случај лица со шишиња со бензин се обиделе да подметнат пожар“, рече Ангелов.
На локации со зголемен ризик се спроведуваат засилени полициски патроли, вклучувајќи и цивилни служби. Според Ангелов, благодарение на овие мерки, бројот на пожари денес е значително помал и покрај сличните временски услови како вчера.
Дополнително, објавен е јавниот оглас за ангажирање на 400 невработени лица, од кои 80 во Скопје, за активности поврзани со превенција и заштита од пожари. Најдобрите кандидати ќе добијат можност за вработување во противпожарните служби и во новиот специјален тим за заштита и спасување.
Македонија
Министерството ќе соработува со ФИНКИ за модернизација на јавната администрација

Министерството за јавна администрација и Факултетот за информатички науки и компјутерско инженерство (ФИНКИ) при Универзитетот „Св. Кирил и Методиј“ во Скопје, потпишаа Меморандум за соработка со кој се воспоставува стратешко партнерство насочено кон модернизација на јавната администрација преку научна и академска поддршка.
Овој меморандум претставува основа за зајакнување на соработката помеѓу јавниот сектор и академската заедница, со фокус на размена на знаења, искуства и заеднички развој на иновативни дигитални решенија.
Целта е преку ангажирање на студенти, експертска поддршка, научноистражувачка дејност и заеднички проекти, да се унапредат административните процеси и да се изгради поефикасна, транспарентна и современа јавна администрација.
Соработката предвидува организирање на обуки, работилници и практична настава, развој на апликации и прототипи, како и имплементација на заеднички истражувачки проекти. Посебен акцент ќе се стави и на иницијативи како што се Хакатони, Иновациска лабораторија на јавниот сектор и аплицирање на меѓународни програми.
Оваа иницијатива ја потврдува заложбата на Министерството за јавна администрација за градење на современа и компетентна администрација преку стратешка соработка и вложување во знаење и експертиза.
Македонија
Повторно падната фасада во Козле – Саракинов бара институционална истрага и системска контрола

Координаторот на Советничката група на ВМРО-ДПМНЕ во Карпош, Христо Саракинов, денеска реагираше на повторниот инцидент со падната фасада во населбата Козле, потенцирајќи ја потребата од системска контрола и одговорност.
„Станува збор за сериозен настан кој, за среќа, помина без повредени, но со јасна порака – безбедноста на граѓаните мора да биде приоритет“, истакна Саракинов, додавајќи дека ова не е прв ваков случај, потсетувајќи дека пред неколку години, на иста ваква кула и во истата населба Козле неколку стотини метри подоле, фасада се урнала под слични околности.
Според него, фасадите се дел од програмата за енергетска ефикасност, изведени во времето на поранешниот градоначалник Стевчо Јакимовски. Тој побара институционална постапка за утврдување на причините за несреќите.
Саракинов постави неколку клучни прашања: Дали изведбата била согласно техничките стандарди?; Кој вршел надзор?; Дали е потребна дополнителна ревизија на слични објекти?
Тој апелираше до градежната инспекција да ги разгледа двата случаи и побара Општина Карпош да спроведе контрола на сите згради со фасадни интервенции од последните години.
„Во име на граѓаните, бараме вистина, но и корективен пристап кон грешките од минатото“, заклучи Саракинов.