Владиниот контакт-центар наменет за поддршка на бизнисот и граѓаните за економските мерки против Ковид-19 го прошири тимот на агенти во повеќе надлежни министерства и институции. Сега, на телефонскиот број 02/324-8040, освен примарното јавување од стручен тим од Владата, на прашањата одговараат и лица од министерствата за труд и социјална политика, за економија, финансии, информатичко општество и администрација, Управата за јавни приходи и Агенцијата за вработување.

Целта на проширувањето на тимот на агенти е да се обезбедат навремени и прецизини информации во врска со специфичните прашања што се во надлежност на дадена институција и навреме да им се помогне на граѓаните и компаниите да ги оставарат своите права или да ја искористат финансиската и друга помош за справување со последиците од Ковид-19.

Според досегашните јавувања, кои за еден месец се 2.674, постои голем интерес за користење на владините економски мерки кај компаниите и граѓаните. Притоа, најчесто поставувани прашања (96 отсто) од вкупниот број се следните:

– можноста за користење финансиска поддршка за исплата на плата за работниците;
– можности за граѓаните во случај на невработеност и отпуштање од работа;
– кредитирањето преку Развојната банка на Република Северна Македонија;
– постапка за издавање дозволи за движење вработени за време на полициски час.

Контакт-центарот работи од 8 до 16 часот секој работен ден. На прашањата што пристигнуваат во контакт-центарот според потребите се одговара на македонски и на албански јазик. Контакт-центарот е обезбеден во соработка со МАСИТ како донација од компанијата „Асеко СЕЕ Македонија“.