Македонија
На 27 ноември обвинител од СЈО првпат ќе го застапува „Маѓар телеком“
Пред судијката Ленка Давиткова на 27 ноември во кривичниот суд во 9.30 часот првпат ќе се појави обвинител од специјалното јавно обвинителство кој ќе го застапува предметот од 2011 година „Маѓар телеком“, потврдија од СЈО за „Макфакс“. Шефицата на ова обвинителство во интервју изјави дека воспоставиле надлежност врз предметот и дека од сега па натаму, наместо редовното Обвинителство, предметот ќе го застапуваат тие.
СЈО водеше и предистражна постапка за случајот, која, најверојатно, ќе биде дел од тезата што ќе се обидат да ја докажат. Скопското Обвинителство долго време не му го даваше на СЈО предметот „Маѓар телеком“ со образложение дека не се поврзани ниту, пак, произлегуваат од содржината на незаконското следење на комуникациите.
Претходното судско рочиште беше одложено поради службено отсуство на надлежниот обвинител oд скопското Јавно обвинителство, Ермон Незири. Во предметот обвинети се тројца ексдиректори во „Телеком“, Атила Сендреи, Ролф Плат и Золтан Кишјакус, за злоупотреба на службената положба. Тие седум години се недостапни за органите на прогонот. Обвинетите воделе тајни договори со македонски премиер и со други лица од Македонија за да ја спречат конкуренцијата на телекомуникацискиот пазар.
Oбвинетите признаа вина. Се спогодија со окружниот суд во Њујорк и платија глоба од 250 илјади долари, односно 150 илјади долари. Претходно, во првиот процес што се водеше во Окружниот суд во Њујорк во декември 2011 компанијата „Маѓар телеком“ плати глоба од 95 милиони долари.
За овој предмет во скопска ‘единица’ првин постапуваше судијата Седат Реџепагиќ. Првото рочиште се одржа на 26 октомври 2011 година. Со текот на годините се менувале судиите за предметот. Предметот потоа го наследи судијата Александар Милошевски и биле закажани 3 рочишта во текот на 2015 година, кои биле одложени поради истата причина. Биле закажувани по 2 до 3 рочишта во текот на годината со оглед на тоа што судот барал со замолница преку Министерството за правда по дипломатски пат на обвинетите да им се достават обвинителен акт и покана за расправа, преведени на нивниот јазик, во матичната земја на адресите што се дел од списите на предметот. Во 2017 година биле закажани 7 рочишта, од кои 5 биле одржани, а три се одложени по барање на странките.
Предметот го наследи и сега го води судијката Ленка Давиткова. Во 2016 година таа закажала 9 рочишта, од кои 5 биле одржани, а 4 биле одложени по барање на одбраната, отсуство на бранител или барање за увид во предметот. Во 2017 година биле закажани 7 рочишта, од кои 5 биле одржани, а две се одложиле по барање на странките вклучувајќи го и последното од 20 април.
Предметот е во фаза на доказна постапка, односно сослушување сведоци. Досега се сослушани сведоци предложени од Обвинителството и сведок предложен од одбраната.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Јаневска се обрати на свечена академија по повод 105 години од основањето на Филозофскиот факултет во Скопје
105 години Филозофски факултет значат повеќе од еден век умствен и духовен раст, традиција, научна извонредност и општествено созревање. Тоа е наследство што мора да го чуваме и да го негуваме. Верувам дека оваа институција и понатаму ќе биде водилка на општествената и на хуманистичката мисла, бранител на критичноста и чувар на академската слобода, рече министерката за образование и наука проф. д-р Весна Јаневска на свечената академија со која високообразовната установа го одбележа големиот јубилеј.
„Факултетот не придонесува во развојот на државата само преку образованието и науката, туку и преку својата силна стратешка улога во креирањето на националните политики. Тука се раѓале концепти и научни согледувања што го обликувале образовниот систем, културните политики, социјалните институции и многу од современите професионални практики во државата. И во овој период, Филозофскиот факултет е активно вклучен во изработката на клучни национални стратегии“, рече Јаневска изразувајќи благодарност до сите поранешни и активни професори, истражувачи и вработени на факултетот за нивната посветеност, научен придонес и визија за општеството.

Министерката потенцираше дека иако по однос на неколку теми за време на нејзиниот мандат, ставовите на МОН и факултетот се разликувале, токму таквите јавни дискусии доведуваат до креирање на најдобрите решенија за обезбедување на поквалитетно национално образование. Очекува, како што рече, Филозофскиот факултет да остане меѓу најсилните партнери на државата кои отвораат пат кон нови образовни подвизи.
Јаневска изрази уверување дека буџетот за образование ќе продолжи да се зголемува, а со тоа ќе се зголемува и поддршката за развој на високото образование и науката.
„Држава која вложува во високото образование вложува во сопствената иднина – ја јакне својата конкурентност, го унапредува демократскиот капацитет и го поттикнува општествениот развој. Продолжуваме да креираме политики што обезбедуваат автономија, дигитализирани процеси, подобра научна инфраструктура и поддршка за младите истражувачи“, рече министерката.

Освен Јаневска, на свечената академија се обратија и ректорката на Универзитетот „Св. Кирил и Методиј“, проф. д-р Биљана Ангелова и деканот на Филозофскиот факултет, проф. д-р Оливер Бакрески кои се согласија дека академскиот простор мора да остане место каде знаењето се претвора во визија, а визијата во општествена вредност.
Македонија
Делови од Илинден, Аеродром, Чучер Сандево и Карпош денеска без струја
Од ЕВН Македонија АД известуваат дека денеска без електрична енергија ќе останат:
– во периодот од 08.30 до 15.00 часот, корисниците од ул. 27 во село Белимбегово, општина Илинден;
– во периодот од 09.00 до 13.00 часот, корисниците од бул. Видое Смилевски Бато бр. 8А, општина Аеродром;
– во периодот од 09.00 до 15.00 часот, корисниците кои се напојуваат од изводот кој започнува од Рибилимус и продолжува во правец на Горно и Долно Оризари, општина Чучер Сандево;
– во периодот од 11.00 до 15.00 часот, корисниците од село Бардовци лоцирани кај Машинац зградите, општина Карпош.
Македонија
Магла во утринските часови, сончево со умерена облачност преку ден
Во утринските часови наместа ќе има појава на магла, а во текот на денот сончево со умерена облачност и претежно тивко. Во северозападните делови повремено ќе има зголемена облачност со услови за слаб дожд.
Минималната температура ќе биде во интервал од -4 до 1, а максималната ќе достигне од 8 до 13 степени.
Во Скопје, претпладне во делови од котлината ќе има појава на магла. Во текот на денот времето ќе биде умерено до значително облачно и претежно тивко.
Минималната температура ќе се спушти до -4, а максималната ќе достигне до 8 степени.
Времето во наредниот период
Продолжува периодот стабилно и претежно тивко време. Во утринските и ноќните часови по одделни котлини ќе има појава на магла

