Македонија
НВО Инфо: Локалните власти да ја зајакнат транспарентноста при трошење на државните пари

Набљудувањето на транспарентноста и вклучувањето на граѓаните во општините Велес, Крива Паланка и Неготино, во време на пандемијата Ковид-19, покажа дека локалните власти треба да ја зајакнат транспарентноста и отчетноста на својата работа особено во спроведувањето на постапките и трошењето на буџетските средства, заклучува НВО Инфоцентарот по мониторингот во овие општини, а во врска со нивното работење за време на ковид-кризата.
Од НВО Инфоцентарот укажуваат на неопходноста општините интензивно да работат на целосна дигитализација на општинските услуги и нивна стандардизација. Исто така, треба да ја подобрат и дигиталната писменост на општинската администрација. Општинските интернет-страници мора да бидат сервисно ориентирани, а не да служат главно како промотивна алатка на локалната власт. Тие треба редовно да се унапредуваат и редизајнираат, за да им обезбедат квалитетни информации и услуги на граѓаните, како и да бидат лесни за користење и пребарување.
Општините мора да воведат и применуваат механизми и практики за интензивна дигитална комуникација и вклучување на граѓаните. Форумите, јавните расправи и консултациите со граѓаните не само што треба да продолжат, туку треба да се надградат со нови форми и платформи. Не смеат да замрат како што се случи годинава, порачуваат од НВО Инфоцентарот.
Понатаму во препораките се наведува дека соработката и поддршката за локалните граѓански организации треба да се зголеми. Пандемијата треба да претставува поттик за продлабочување на соработката со локалниот граѓански сектор, а не да биде изговор за запирање на поддршката како што беше случај оваа година. Општините мора да креираат или да ги унапредат програмите, политиките и критериумите за доделување финансиска поддршка на граѓанските организации. Тие политики и процедури мора да бидат транспарентни, отчетни и јавно достапни.
Општините треба да ја подобрат и поттикнат работата на месните заедници и соработката со нив. Бидејќи месните заедници се основна алатка за директно вклучување на граѓаните, општините треба да се залагаат за законски измени со кои ќе се унапреди нивниот статусот. Општините во кои нема месни заедници (како на пример, во општина Неготино) треба да го започнат процесот на нивно формирање.
Мониторингот на општините Велес, Крива Паланка и Неготино, во текот на 2020 година, го реализираше НВО Инфоцентарот во соработка со граѓанските oрганизации Спектар од Крива Паланка, Активо од Велес и СПО КУЛ од Неготино, во рамки на проектот „Активни граѓани и партиципативна демократија на локално ниво“, поддржан од меѓународниот центар „Улоф Палме“ од Шведска.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Вреди: Корупциските досиеја на ДУИ им експлодираат едно по едно

Човекот кој со години го меркаше тронот на Али Ахмети, денес се однесува како да е „паднат од Марс“, а не како да бил дел од сите Влади и да раководел со многу ресори, зад себе оставајќи низа скандали, порача Коалицијата Вреди во најновото соопштение.
Од Коалицијата обвинуваат дека Бујар Османи и ДУИ, и по две децении апсолутна власт, сè уште не ја научиле ниту вештината на достоинствено владеење, ниту културата на политичко однесување во опозиција.
„Ги гледаме заробени во патетична паника, молејќи за власт како да им е последен политички здив“, велат од Вреди.
Во отсуство на идеи и визија, според нив, ДУИ продолжува да ги лаже гласачите со празни ветувања и повици за предвремени избори, со единствена цел – да го спасат сопственото богатство и криминалното минато кое, како што велат, секојдневно излегува на виделина.
Во соопштението се посочува дека граѓаните многу добро знаат со кого имаат работа:
Со Бујар Османи, кој делел тендери за рента-кар како „бакшиш“ за пријатели и политички кругови;
Со Блерим Беџети, кого го нарекуваат „мајстор на башибозук-политиката“, кој заедно со Данела Арсовска го претворил Скопје во џунгла;
Со Артан Груби, кого го нарекуваат „бегалец“ кој завршил на црна листа поради спасувањето на Сашо Мијалков од затвор.
„И сега мислат дека Албанците ќе им веруваат? Каде се вашите ISO-стандардите? Дали добивте одговор од европските институции за вашите писма без одговор?“, прашуваат од Коалицијата Вреди.
Во продолжение, тие обвинија дека ДУИ, во собраниската Соба 16, ја понижила Албанската заедница нудејќи четири министерства и претседател на Собранието за да влезе во влада со ВМРО-ДПМНЕ, наместо со Коалицијата Вреди.
„Не е чудо што денес, кога ДУИ нема ни реална власт ни влијание, се служат со потпалувачка реторика и лажни приказни за понижување на Албанците“, велат од Вреди, додавајќи дека за ДУИ власта отсекогаш била извор на моќ и личен бенефит, а не обврска за иднината на народот.
„Без програмска и кадровска реформа, ДУИ нема да ја помириса власта многу долго време“, се заклучува во соопштението на Коалицијата Вреди.
Македонија
Андоновски: Уверенија од судовите сега со неколку клика, без редици и чекање

Министерот за дигитална трансформација, Стефан Андоновски, на денешната прес-конференција пред претставниците на медиумите, ги соопшти новите услуги од Основните судови, кои од сега за граѓаните се достапни на националниот портал за електронски услуги – uslugi.gov.mk.
„Денеска имам чест да означам заокружување на еден значаен чекор кон дигитализирањето на најважните услуги за граѓаните. На Националниот портал за електронски услуги – uslugi.gov.mk – од денес се достапни две нови, долго очекувани услуги од Основните судови, тоа се, Уверение од кривична евиденција за физички лица и Уверение од кривична евиденција за правни лица“, изјави Андоновски
Министерот дополни дека станува збор за најкористените тековни услуги од основните судови, кои заедно со комплетирањето на пакетот на судски потврди што секојдневно им се потребни на граѓаните и компаниите го сочинуваат пакетот за неосудуваност.
Во овој пакет, веќе дигитализирани се и Потврдата од казнена евиденција и Потврдата за изречена забрана на вршење професија, дејност или должност, станува збор за документи кои се често потребни во секојдневниот живот – за вработување, аплицирање за јавни повици, образовни постапки и многу други правни и административни процедури.
Андоновски истакна дека намерата е граѓаните повеќе да не чекаат со часови пред судските шалтери и архиви. Во таа насока истакна дека целта на Министерството е едноставна, но ефикасна: „Граѓаните да поминуваат повеќе време со своите семејства, со своите пријатели, и да придонесуваат кон економијата, а помалку пред административни шалтери.“
Македонија
СДСМ бара оставка од Тошковски, ВМРО-ДПМНЕ им враќа со скандалозни факти

По вооружената пресметка кај Бит Пазар во која животот го загуби 31-годишен маж, СДСМ обвини за распад на безбедносниот систем и побара оставка од министерот за внатрешни работи Панче Тошковски. Од друга страна, владејачката ВМРО-ДПМНЕ возврати дека токму во времето на СДСМ безбедносниот систем бил најмногу нарушен, а дека денес институциите конечно функционираат и се расчистува со криминалот.
Опозициската СДСМ вели дека безбедноста е сериозно нарушена и побара Панче Тошковски да си поднесе оставка.
„Хаос владее на улиците, безбедноста на граѓаните е сериозно нарушена“, обвинија денеска од СДСМ, реагирајќи на вчерашната престрелка кај Бит Пазар.
„Додека Панче Тошковски се изживува врз граѓаните и поднесува кривични пријави за објави на Фејсбук, криминалните банди му праќаат порака дека тој не ја контролира безбедноста и не му се плашат. МВР, под негово водство, е паднато на колена. Вчера сред бел ден, пред полициска станица, се случи мафијашка престрелка со загинати и повредени. Тоа е тотален распад на безбедносниот апарат“, наведуваат од партијата.
Од СДСМ бараат оставка од министерот Тошковски како прв чекор за, како што велат, враќање на безбедноста на улиците.
„Доста беше Тошковски. Време е за оставка, време е за одговорност. Потребни се промени и итни реформи во безбедносниот систем, за да им се врати мирот и сигурноста на граѓаните“, истакнаа од СДСМ.
Од ВМРО-ДПМНЕ остро возвратија дека токму за време на владеењето на СДСМ државата била претворена во „оаза за белосветски криминалци и наркобосови“.
„Во мандатот на нивниот долгогодишен министер за внатрешни работи, Оливер Спасовски, се доделуваа македонски пасоши на светски криминалци, наркобосови, па дури и на припадници на ИСИС. За време на нивното владеење пробивани беа акции за меѓународен шверц на дрога, а мафијата си доби своја држава“, реагираа од ВМРО-ДПМНЕ.
Партијата обвини дека нападите на СДСМ се затоа што денес конечно се расчистува со криминалците.
„Системот почнува да функционира, криминалците се апсат, а секој што се огрешил пред законот ќе одговара. СДС се плаши токму затоа што законот сега важи за сите, без исклучоци“, велат од владејачката партија.