На расправата за законот за абортус за поголемиот дел од невладините организации за женски и родови права беа прифатливи измените на законот со кој се либерализира правото на абортус. Со него се дава можност жената да може да ја прекине бременоста од 12. до 22. недела, а по 22. недела со мислење на комисија.

Уранија Пировска од Хелсиншкиот комитет рече дека конечно со ова се укинал еден драконски закон и потсети на, како што кажа, штетните последици од кампањата за антиабортус што ја водела претходната власт. Таа го поддржа и спречувањето на верските заедници да се мешаат во работите на законодавниот дом, откако нивни претставници и попови беа спречени да влезат на расправата за законот за абортус.

„Жени кои се одлучуваа на абортус беа нарекувани чедоморки. За кампањата и оние страшни спотови кои се вртеа на МТВ беа потрешени 36 милиони денари. Жените го гледаа лекарот кој по абортус кажуваше – штотуку убивте еден живот, а можеше да израсне во прекрасно момче. Ова беше дискриминирачки, се кршеа сите права на жената. Драго ми е што не дозволивте да се вмешаат верски заедници во носењето на законот. Ова е секуларна држава, тука се носат закони, црквите нека си носат нивни закони. Ако сакаат нека ме тужат, но ќе речам – Господ секогаш бил најголем непријател на жената“, рече Пировска.

Законското решение е прифатливо и за пратеничката од ВМРО-ДПМНЕ, Даниела Рангелова. Таа ги повика пратениците од опозицијата да дадат поддршка на законот.

„Не сум била пратеник кога се носел законот во 2013 година. Но, сега имам можност да поддржам едно решение со кое не им се одзема правото на жените да станат мајки, но и да ја прекинат бременоста доколку не се во можност да го родат тоа дете или од друга причина. Немам точни бројки, но слушнав дека е голем бројот на жени кои токму поради законски пречки абортирале во странство или пиеле непроверени таблети од странство“, посочи Рангелова.

Но, има и такви кои не се согласуваат со законот, меѓу кои и Светлана Јованова од организацијата „Срце што бие“. Таа бурно реагираше и кажа дека со законот се поддржува зло, се убива живот и се труматизира жената.

„Им го одземате животот на неродените деца. Ова ли е животот што го ветувавте? Наместо да се борите тоа дете да се роди и да се даде на посвојување, вие ја упатувате жената веднаш на абортус. Како ќе ја советувате жената што треба да абортира во 20. недела, ќе кажувате дека ќе вадите орган по орган на бебето. Жално е што правите ова“, реагираше Јованова.

„Имам 16-годишен син и го родив на 25 години додека другарките излегуваа по дискотеки, но тоа е мој избор. Немам ќерка, но другите кои имаат треба добро да размислат и да го поддржат законот“, реплицираше на ова Рангелова.

Со новиот предлог-закон, на жената ќе ѝ бидат овозможени комплетни, објективни и точни информации за начинот на изведување на интервенцијата, а одлуката за прекин на бременоста, пациентката ќе има можност да ја донесе свесно, без принуда и врз основа на објективни информации, стои во предлог законското решение. Според него, веќе нема да има потреба да чека три дена за да биде спроведена интервенцијата и нема да биде принудена да објаснува зошто сака да ја прекине бременоста.