Македонија
Независниот академски синдикат на Пендаровски му ги посочи проблемите во високото образование

Независниот академски синдикат (НАкС) оствари средба со претседателот на државата, Стево Пендаровски. На средбата која се одржа во петокот, НАкС го претставувале Маја Стевановиќ, Мирјана Најчевска, Бранимир Јовановиќ, Виктор Стефов и Елена Џукеска.
„На средбата се разговараше за финансиските проблеми со кои се соочуваат универзитетите, како и за најавеното покачување на платите од 10%, за кое Собранието на РСМ сè уште нема донесено одлука. Претставниците на НАкС ја поздравија иницијативата за покачување на платите на вработените на јавните универзитети, но посочија дека, поради тоа што товарот за додатоците за стаж паѓа на универзитетите, ваквите ад-хок покачувања можат дополнително да го загрозат финансиското работење на единиците на универзитетите, при што вработените повторно нема да можат да се стекнат со ова покачување“, се наведува во соопштението на Независниот академски синдикат.
Покрај тоа, претставниците на синдикатот го пренеле и ставот за основањето нови синдикати на универзитетите „Св. Кирил и Методиј“ и „Св. Климент Охридски“ од страна на ректорите, за кое рекле дека претставува недозволиво мешање во синдикалното здружување.
На средбата, од страна на претставниците на НАкС било потенцирано дека е нужно во најкраток рок да се потпише сеопфатен гранков колективен договор, во кој на системски начин би се уредиле правата на вработените.
Во соопштението на синдикатот се нагласува дека претседателот изразил разбирање за проблемите со кои се соочува високото образование и ја потенцирал потребата да се преземат конкретни чекори за решавање на наталожените проблеми.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Улица во Кисела Вода денес без струја

Корисниците на улицата Кумановска во општина Кисела Вода денес ќе останат без електрична енергија во периодот од 12:00 до 15:00 часот, информираат од ЕВН Македонија АД.
Прекинот е најавен поради технички зафати на дистрибутивната мрежа.
Македонија
Денес сончево и топло, од четврток промена на времето

Утрото ќе биде ведро и посвежо, а преку денот се очекува претежно сончево и топло време, со слаб до умерен ветер од јужен правец. Минималните температури ќе се движат од 6 до 14 степени, додека максималните ќе достигнат од 27 до 33.
Во Скопје ќе преовладува сончево време, со утринска температура до 12 и дневна до 33 степени, информира УХМР.
До среда ќе се задржи стабилно и топло време. Од четврток попладне следува период на променливо облачно време со локални врнежи. Во петок се очекуваат и гремежи, како и умерен до засилен југоисточен ветер.
Температурите ќе бидат во постепено опаѓање, особено за време на викендот.
Македонија
Сиљановска-Давкова во Њујорк: Време е кормилото на ОН да му го довериме на жена

Во рамки на учеството на 80. Генерално собрание на Обединетите нации во Њујорк, претседателката Гордана Сиљановска-Давкова се обрати на состанок на високо ниво по повод 30-годишнината од Четвртата светска конференција за жените.
Во своето обраќање, Сиљановска-Давкова истакна дека иако Пекиншката декларација останува темел на борбата за родова еднаквост, напредокот е нееднаков, кревок и често реверзибилен.
„Насилството врз жените останува неказнето, фемицидот ја осквернува светоста на животот, а жените сè уште се соочуваат со бариери во пристапот до ресурси, лидерство и одлучување,“ рече таа.
Претседателката посочи и на кризата во Обединетите нации, институција основана за заштита на мирот, а денес исправена пред бројни конфликти низ светот. Таа апелираше на храбро лидерство од жени, велејќи:„Ако сме сериозни во врска со мирот, време е да го довериме кормилото на ОН на жена.“
Во нејзиниот говор таа подвлече дека родовата еднаквост не е феминистичка привилегија, туку хуманистички императив, потенцирајќи дека жените се носители на исцелување, сочувство и надеж.
Учесниците на состанокот ја потврдија потребата од посветеност, конкретни политики и ресурси за реализација на визијата од Пекинг и за создавање праведни и просперитетни општества.
Пекиншката декларација, како што потсети Сиљановска-Давкова, повикува на еднакви права и пристап за сите – жени и мажи, девојчиња и момчиња – и тој повик, рече таа, останува ургентен и денес.