Македонија
Нема да има лидерска средба за уставните измени

Нема да има лидерска средба за уставните измени, а Бугарија нема истакнато ново барање во текот на скринингот со кое ќе го блокира процесот за пристапување на Македонија кон Европската Унија. Ова на прес-конференција го истакнаа премиерот Димитар Ковачевски и вицепремиерот за европски прашања Бојан Маричиќ. Според двајцата, процесот за уставни измени е почнат.
„Во моментот не е предвидена лидерска средба. Ако има потреба, ќе биде закажана“, рече Ковачевски.
Се прават консултации, ќе има дијалог и во јавноста за уставните измени. Според Маричиќ, најважно е процесот успешно да почне и заврши.
„Прашањето за уставните измени е отворено. Правиме консултации на експертско ниво за кои сум сигурен, а имавме и лидерска средба во Собранието, што го иницира тој дијалог. Она што можеме да го кажеме е дека уставните измени во наредните неколку недели и месеци ќе бидат актуализирани и на дебати со граѓански организации и експерти како во однос на нивната содржина така и во однос на политичкото значење. Политичкото значење е многу повеќе од само уставни промени на дел од преамбулата и еден амандман за комитетот за односи меѓу заедниците. Овие уставни амандмани имаат значење на зелено светло од нашето Собрание за продолжување на преговорите со ЕУ. Верувам дека таа дебата, која ќе се одвива со јавноста за важноста, ќе бидат вовед во институционалната дискусија и продолжувањето на процедурата во Собранието. Треба да се подготвени и секој да даде свој придонес за да почне и успешно да заврши“, додаде тој посочувајќи: „Во текот на скринингот Бугарија нема истакнато никакво прашање, а ние во текот на креирањето на акцискиот план за малцинства ќе мора да го консултираме со државите членки“.
За скринингот во делот на правосудството се очекува позитивен извештај, но со серија задачи.
„Големи се прашањата за реформи во правосудството. Јас очекувам кога ќе го добиеме извештајот, да биде позитивен, но со серија задачи што треба да ги вметнеме во патоказите што ги спомнав“, додаде Маричиќ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
РЕК „Битола“ работи на надминување на предизвиците со одлагањето на пепелта и ги уверува граѓаните дека квалитетот на воздухот не е нарушен

Во врска со неодамнешните реакции во јавноста за наводите за несоодветно одлагање на пепелта во РЕК „Битола“, АД ЕСМ, подружница РЕК „Битола“, ја информира јавноста за преземените мерки и за континуираните напори за еколошки одговорно работење.
Од таму додаваат дека иако присуството на прашина при поинтензивен ветер е позната појава во изминатите децении поради специфичниот процес на производство, транспортот и одлагањето на пепелта преку 3,7-километарска лента, РЕК „Битола“ активно работи на нејзино минимизирање.
Појаснуваат дека пепелта, како нуспроизвод од производството на електрична енергија, се третира со континуирано навлажнување, проследено со одлагање и засипување со земја.
„Сепак, високите температури и ветерот може да доведат до сушење на површинскиот слој и евентуално подигнување прашина при нејзиното спуштање во касетата.
На 26 март 2025 година Државниот инспекторат за животна средина изврши надзор на одлагалиштето за пепел во РЕК „Битола“. При увидот беше констатирано присуство на поголеми количини пепел, кои отстапуваат од пропишаните во главниот рударски проект за што беше издадено задолжение во рок од 30 дена количините да бидат соодветно одложени и посипани со земја. Инспекторатот не изрече санкции, што укажува на препознавање на напорите на комбинатот за решавање на ова прашање.
Со задоволство информираме дека денес на одлагалиштето што беше предмет на инспекцискиот надзор нема ниеден грам пепел. Целата количина е одложена, а теренот е целосно посипан со земја.
Во насока на долгорочно решение веќе е извршено планирање и поместување на транспортната лента, со што од 25 април одлагањето на пепелта ќе продолжи директно во касета. Водните топови за дополнително навлажнување ќе бидат ставени во функција веднаш по поместувањето на лентата. Дотогаш попрскувањето на одложената пепел се врши континуирано со специјални средства и цистерна“.
Дополнително, како што велат, ги споделуваат и резултатите од мерењата на амбиенталниот воздух спроведени од страна на акредитираната лабораторија „Технолаб“ од Скопје.
„Во согласност со добиените податоци, констатирано е дека во испитуваниот период не е надмината 24-часовната гранична вредност за заштита на човековото здравје за концентрацијата на суспендирани цврсти честички PM 10 во согласност со уредбата за граничните вредности за нивоата и видовите загадувачки супстанции во амбиенталниот воздух (‘Сл. весник на РМ’ бр. 50/2005 и 183/2017).
Актуелното раководство на РЕК ‘Битола’ е целосно посветено на справување со долгогодишните проблеми и обезбедување одржливо работење на комбинатот според највисоките еколошки стандарди. Ќе продолжиме транспарентно да ја информираме јавноста за сите наши активности во оваа насока“, нагласуваат во соопштението.
Македонија
Одвоени средби на Муцунски со Ал Тани и Буршаков: нагласена потребата од продлабочување на економските и трговските односи

Министерот за надворешни работи и надворешна трговија, Тимчо Муцунски, денеска на одвоени средби ги прими вршителот на должност во катарската амбасада во Скопје, Шеик Јасим бин Хамад Ал Тани, и амбасадорот на Република Казахстан во Скопје, Сатибалди Буршаков.
На средбата со вршителот на должност во амбасадата на Катар во Скопје, Шеик Јасим бин Хамад Ал Тани, беа потврдени традиционално добрите и пријателски односи меѓу двете земји, при што беше нагласена заедничката заложба за динамизирање на политичкиот дијалог и размена на посети на високо ниво. Во делот на билатералната соработка, соговорниците ја истакнаа потребата од продлабочување на економските и трговските односи, како и од зголемување на обемот на катарски гринфилд и браунфилд директни инвестиции во нашата земја.
На средбата со амбасадорот на Република Казахстан во Скопје, Сатибалди Буршаков, соговорниците констатираа дека билатералните односи помеѓу двете земји се добри, при што ја нагласија потребата од нивно понатамошно продлабочување, особено во економската сфера, како и зајакнување на севкупната билатерална соработка во иднина. Беше изразено и заедничко задоволство од досегашната одлична соработка на мултилатерален план и меѓусебната поддршка на кандидатури во рамки на меѓународните организации. Министерот Муцунски и амбасадорот Буршаков разменија мислења и за други актуелни прашања од заемен интерес, изразувајќи уверување дека добрата соработка меѓу двете земји ќе продолжи со засилен интензитет.
Македонија
(Видео) Манасиевски: Владата на СДС тврдеше дека нема да има нови блокади кон ЕУ за билатерални прашања, сега се демантирани и од ЕУ

Димитар Ковачевски како премиер и претседател на СДС тврдеше дека уставните измени се последна пречка за влез на Македонија во ЕУ. СДС водеше кампања со која не убедуваше дека само што не сме влегле во ЕУ, а пречка за тоа се уставните измени, после кои се ќе се смени, вели Валентин Манасиевски, член на ЦК на ВМРО-ДПМНЕ.
ВМРО-ДПМНЕ, додава тој, уште тогаш кажа дека СДС, Ковачевски, Маричиќ, Зечевиќ и Османи лажат. И дека уставните измени се само почеток на бугарските барања.
„Тоа што ВМРО-ДПМНЕ го зборуваше, сега го кажаа и од ЕУ, односно еврокомесарката Марта Кос, потврди дека нема гаранции дека ова се последните бугарски барања.
Еврокомесарката Кос кажа дека не може да потврди дека нема да има нови блокади заради билатерални прашања.
Каде се СДС сега? Каде се сокрија?“, праша Манасиевски. Според него, откако ја доведоа државата во безизлезна ситуација тие се кријат и молчат.