Македонија
Нема експлоатација на работниците, ќе имаат дневен одмор од најмалку 12 часа, уверува заменик-министерот Хусеин

Заменик-министерот за труд и социјала, Енвер Хусеин, претставувајќи ги измените на Законот за работните односи, со кои се олеснува и се забрзува работата на коридорите 8 и 10 д ,уверува дека работниците нема да бидат експлоатирани. Појасни дека не се работи за работна недела од 60 часа, туку за прекувремена работа, и се пофали дека на секој работник ќе му биде гарантиран дневен одмор од најмалку 12 часа.
„Она што е важно да се напомене е дека изградбата на коридорите 8 и 10 д во ниеден случај нема да претставува експлоатација на работниците и нарушување на нивните права загарантирани со законот. Нема да дозволиме ниеден работник да биде експлоатиран, на ниеден работник нема да му биде нарушено работничкото право. Сакам да потенцирам дека станува збор за прекувремена работа, а прекувремената работа секогаш постоела во градежништвото. Прекувремената работа не значи 60 часа неделно и не значи дека во текот на целата година ќе има прекувремена работа. Тоа ќе зависи од временските услови за работата на терен, односно поинтензивно ќе се работи во месеците во пролет, лето и во средината на есента. Ќе има и денови кога нема да има потреба од прекувремена работа. Секој прекувремен час ќе им биде исплатен 35 % во согласност со законот и колективниот договор. Секој работник ќе потпише изјава дали сака да работи прекувремено и доколку не сака, нема да биде принуден со сила да работи прекувремено“, објасни денес заменик-министерот Хусеин.
Министерството за труд бара измена на одредбата од законот, која се однесува на прекувремена работа. Замени-министерот Хусеин вели дека тоа го бараат поради потребата од континуитет во работењето. Барањето е прекувремената работа да трае повеќе од осум часа неделно и 190 часа годишно.
„Работата над 40 часа неделно ќе се смета и ќе се плаќа како прекувремена работа со задолжително почитување на одредбите на дневен и неделен одмор во согласност со овој закон. Тоа значи дека работникот ќе има право на дневен одмор од најмалку 12 часа непрекинато меѓу два последователни дена во текот на 24 часа. Исто така, работникот има право на неделен одмор во траење од најмалку 24 часа непрекинато плус 12 часа дневен одмор. Дополнително, поради природата на работите и задачите во работите што се вршат од национален интерес, се јави потреба тие да може да се спроведуваат и во недела“, рече заменик-министерот за труд, Хусеин.
Владата денес предложи пет предлог-закони за олеснување на изградбата на коридорите, кои ќе бидат со европско знаме по очигледната блокада од опозицијата на предложите измени, кои веќе се во собраниска процедура.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Ослободена од стапица мечка во Ресенско

Регионалниот ЦУК Битола, известува дека преку Единствениот број за итни случаи 112 во ЦУК била добиена пријава за заробено диво животно како последица од поставена криволовна замка во атарот на помеѓу селата Љубојно и Брајчино (Општина Ресен).
Пријавителот претпоставил во пријавата дека најверојатно се работи за мечка поради гласното рикање што се слушало во непосредна близина на мостот на Брајчинска Река.
„За оваа ситуација, од страна на ЦУК веднаш е известена Гранична полиција Маркова Нога, Полициска станица Ресен, Концесионерот – ловното друштво и други субјекти за понатамошно постапување. По интервенцијата на надлежните служби од Концесионерот -Ловното друштво, со присутен ветринар, од НП „Пелистер“ и од полицајци од МВР мечката е успиена и безбедно ослободена“, соопшти ЦУК.
Македонија
Средба Тошковски – Ходулин: Интензивна поддршка од ЕУ преку ИПА проектите за креирање полиција со европски стандарди

Министерот за внатрешни работи Панче Тошковски денеска оствари работна средба со претставници на Делегацијата на Европската унија, предводени од Стефан Ходулин, раководител на Одделот за соработка и Даница Стошевска, програм менаџер во канцеларијата.
На состанокот беше разгледана досегашната соработка помеѓу Министерството за внатрешни работи и Делегацијата на Европската унија во делот на спроведувањето на проектите финансирани преку Инструментот за претпристапна помош (ИПА).
Од страна на господинот Ходулин беше изразено задоволство од постигнатото во рамките на веќе спроведените проекти кои се имплементираат во министерството и изрази надеж дека посветеноста ќе продолжи со ист интензитет.
Министерот Тошковски во име на Министерството за внатрешни работи и се заблагодари на Делегацијата на ЕУ за досегашната поддршка и потенцираше дека истата е од исклучителна важност за министерството, и дека од наша страна ќе бидат обезбедени сите ресурси со цел максимално и рационално искористување на финансиската поддршка која е наменета за постигнување на европските стандарди во полициското работење.
За време на состанокот исто така се разговараше и за идните проекти кои се дел од Националната ИПА програма за 2025 година и следниот период, по што заеднички беше донесен заклучок дека ќе се продолжи со интензивни активности во наредниот период со цел финализирање плановите и проектите како основа за идното програмирање и обезбедување на сите неопходни предуслови од страна на министерството за внатрешни работи и целосна посветеност во нивната подготовка.
Двајцата соговорници изразија уверување и подготвеност за продолжување на одличната соработка и во иднина.
Македонија
Сиљановска-Давкова на средба со Радев: во фокусот трагедијата во Кочани и евроинтегративниот пат

Претседателката Гордана Силјановска-Давкова која е во Бугарија за да учествува во „Процесот Акаба“, пред медиумите соопшти дека ги посетила повредените пациенти кои настрадаа во трагедијата во Кочани и сега се на лекување во болницата „Пирогов“.
Рече дека се чувствуваат многу подобро. Таа оствари средба и со бугарскиот претседател Румен Радев.
Фокусот бил на трагедијата во Кочани, но се разговарало и за одблокирање на нашиот евроинтегративен пат, при што двајцата заклучиле дека се неопходни позачестени средби. Претседателката нагласила дека се можни компромиси и очекува исчекор на тој план.
Оддавајќи му признание на Радев таа кажа дека тој бил првиот претседател којшто утрото по трагедијата во Кочани и се јавил и и понудил секаков вид на помош.
„Прв ми се јави претседателот Радев. Благодарам. За жал или за добро, понекогаш трагедијата го вади доброто во сите нас, не политичкото, туку човечкото. Ова нема да може да го заборави ниту еден политичар од двете страни“, ја пренесуваат изјавата на Силјановска-Давкова бугарските медиуми.