Месно нови закони за амнестија за намаување на пренатрупаноста во затворите, судијката Билјана Коцевска од Основниот кривичен суд Скопје охрабрува да се пишуваат условни казни, но со надзор. Таа смета дека оваа мерка, која постои како законско решение, треба почесто да биде применувана.

„Со овој настан, кој е само почеток на идни вакви работилници, имаме цел да се охрабрат судиите да изрекуваат поголеми условни отпусти со заштитен надзор. Токму на овој начин јас сум убедена и верувам дека ќе можеме во догледно време да ја намалиме пренатрупаноста во затворите, да се намали рецидивизмот, а со тоа и ресоцијализација на осудените лица. Токму заради тоа сметам дека нема потреба од носење закони за амнестија само со една и единствена цел да се намали пренатрупаноста во затворите од причина што неколкуте закони за амнестија кои беа досега донесени, не ја постигнаа целта во насока на тоа дека можеби само моментално се намалува пренатрупаноста во затворите, но за многу кратко време повторно имаме пренатрупаност. Токму од тие причини сметам дека треба да се охрабриме да даваме поголеми условни отпусти во насока на постигнување на целта не само на намалување на пренатрупаноста туку и на постигнувањето на целта на казнувањето, намалувањето на рецидивизмот, а со тоа автоматски ќе се намали и затворската популација односно пренатрупаноста“, рече судијката Коцевска пред почетокот на работилницата „Предизвици за надминување на затворската пренатрупаност“ организирана од Македонското здружение на млади правници.

Условните казни без надзор, Коцевска смета дека јавноста со право ги доживува како ослободителни.

„Со изрекување само на условни осуди навистина е оправдан впечатокот во јавноста дека условно осудените останале неказнети. Со изрекувањето на заштитниот надзор, односно со обврските од заштитен надзор имаме начин и можност да вршиме надзор над однесувањето на осудените лица во времето на проверка така да доколку не ги исполнуваат обврските во тој случај се отповикува условната осуда. Верувам дека на тој начин сите ние ќе придонесеме да го смениме општиот впечаток во јавноста дека условно осудените останале неказнети. Ако имаме запретена казна од најмалку четири години, можеме најмногу да ја ублажиме до две години и во таков случај можеме да изречеме условна осуда со заштитен надзор“, рече судијката Коцевска.

Неизоставен дел од овој процес на давање поголеми отпусни осуди со заштитен надзор, Коцевска смета дека е и промоција на институтот пробација. За себе вели дека го применува и од 2019 година скоро и да нема условна казна без надзор.

„Имаме, навистина на многу високо ниво, добра соработка со пробациската служба во рамките на Кривичниот суд. Во секојдневна комуникација сме со нив. Верувајте дека се огромни придобивките од примената на овој институт. Јас пред да го закажам судењето барам проценка на ризикот од пробациската канцеларија. Ми даваат детален извештај и јас добивам комплетен извештај за структурата на личноста на обвинетиот со предлог – обврски кои би можеле да бидат изречени, иако секако не сум врзана со тоа. Можат да бидат тие, можат да бидат и тие и некој друга и така натаму. По правосилноста на пресудите добиваме редовни извештаи од страна на пробациската канцеларија“, објасни судијката Коцевска.

Директорот на Управата за санкции, Александар Пандов, денес пред почетокот на работилницата за предизвиците со пренатрупаноста во затворите рече дека еден затвореник годишно државата ја чини над 10.000 евра и порача дека ако стотина затвореници дневно можат да го напуштаат затворот поради работни обврски и попладне да се враќаат, тогаш нема зошто таквите луѓе казната да не можат да си ја одлежат во домашни услови.