Македонија
Нема пронајдени починати средношколци во Градски парк, тврди МВР по вестите на социјалните мрежи

МВР ги лажните вести во врска со наводно пронајдени починати средношколци во Градскиот парк во Скопје, поради употреба на дрога, кои се шират по социјалните медиуми.
„ Имено, овие лажни вести започнаа оркестрирано да се шират на социјалните медиуми во изминативе неколку дена, при што заедничката шпекулација за сите е дека група средношколци наводно починале од употреба на дрога во скопскиот Градски парк, а низ објавите се разликува само бројката на лица кои биле во групата, која варира од 3 па сѐ до 9, како и периодот на наводно случување на наводниот настан – од викендов, па сѐ до денеска (15.03.2023)“ се вели во реакцијата од Министерството за внатрешни работи.
Од МВР додаваат дека се работи за лаги, бидејќи, како што појаснуваат, пријава за таков настан не постои.
„ Очигледна е целта на овие пласирани лажни вести – да предизвикаат паника, вознемиреност, постојано чувство на страв и несигурност кај граѓаните, во случајов кај младите и нивните родители, да нанесат штета на институциите и недоверба кон нив. Воедно, им благодариме на медиумите кои не подлегнуваат на ваквите лажни вести и информациите ги проверуваат во надлежните институции“ се додава во реакцијата.
Инаку хистеријата на социјалните мрежи трае веќе трет ден. Случајот со починатото 18-годишно момче, кое беше пронајдено мртво на плочник пред зграда во Центар, предизвика паника во јавноста.
Момчето било ученик во скопската гимназија „Георги Димитров“, а меѓу соучениците, пак, кружи стравотна приказна дека бил отруен во кафуле, каде што му била ставена дрога во пијалак. Случајот во јавност го објави пензионираната професорка од Филозофскиот факултет, Виолета Ачкоска.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Меџити: Таравари треба да расчисти со дилемите, неприродно е и „Влен“ и соработка со ДУИ

Арбен Таравари треба да расчисти со дилемите, смета неговиот коалициски партнер, Изет Меџити.
За односите меѓу нив, во рамки на коалицијата „Влен“, оценката на Меџити е дека тие се добри, а и двајцата комуницираат. Сепак, тројца од четворицата лидери на политичките партии кои ја сочинуваат „Влен“ се согласни дека треба да настапат заедно на локалните избори, но Таравари размислува поинаку.
„Разговараме деновиве сите политички субјекти во коалицијата да се претопат во ‘Влен’, како политичка партија која ќе ги претставува Албанците на локалните избори. Единствениот кој има дилеми и гледа како можна опција и соработка со ДУИ е Таравари, за тоа него ќе го прашате. Таравари треба да расчисти со дилемите, неприродно е и „Влен“ и соработка со ДУИ“, рече Меџити.
Планот е коалицијата да настапи на изборите со заеднички кандидати, листи, штаб, програма и платформа. Меџити се осврна на листите, коментирајќи дека градоначалниците се избираат по мнозински модел, додека самите листи ги фаворизираат големите. Нема смисла, вели тој, ние сме кај големите и сега да одиме кај малите оти тоа ќе значи да се изберат гласови во прилог на ДУИ. Тогаш се поставува прашањето и за кого работиме, додаде Меџити.
Прашан дали се планира владина реконструкција пред изборите, Меџити одговори: Ќе видиме тоа, ќе процениме кои се аргументите.
Македонија
(Видео) Филипче: Какви лицемери седат во Владата, ги убедуваат работниците дека може да живеат со 400 евра

Какви лицемери седат во Владата, ги убедуваат работниците дека можат да живеат со 400 евра месечно, рече претседателот на СДСМ, Венко Филипче на прес конференцијата по неговата победа на внатрепартиските избори.
„Оваа Влада на ВМРО-ДПМНЕ, ЗНАМ и ВЛЕН, за 10 месеци само покажа дека не знае, не умее, и што е најстрашно – не сака да се справи со реалните проблеми на луѓето. Понеспособна Влада државата немала никогаш досега. Нема ниту една област и сфера во којшто нешто добро се случува. Гледајте што се случува со платите на работниците, ги убедуваат дека можат да живеат со 400 евра месечно. Видете што се случува во земјоделството, сите субвенции се намалени. Видете какви катастрофални политики се воведуваат во образованието. Видете што се случува во здравството. Здравството е на колена“, рече Филипче
Тој најави силна и консолидирана СДСМ подготвена за борба на сите нивоа: „Ќе бидеме гласни, ќе бидеме искрени и ќе покажеме дека постои алтернатива. Да ја вратиме државата на вистинскиот пат, за доброто на Македонија, за доброто на сите граѓани.
Филипче, кој освои двојно повеќе гласови од претходниот пат, потенцираше дека ова не е негова лична победа, туку заедничка победа на сите членови на СДСМ кои веруваат во правичноста, еднаквоста и напредокот – вредности кои, како што рече, денешната Влада целосно ги погазила.
Македонија
„Влен“: Од ИСО-стандарди ДУИ има само „и што има за нас“ – рекет стандард

„Наместо да се извинат за 20 години кражба, корупција и лаги, ДУИ се обидува да ги измие гревовите со еден бел лист хартија што го нарекува ‘меѓународен стандард’. Но, кој ќе го спроведува тој стандард во ДУИ“, прашуваат од ВЛЕН.
„Рамиз Мерко, со над 20 кривични пријави и со владеење што ја претвори Струга во приватна сопственост. Артан Груби и Прпарим Бајрами, кои го инсталираа „коцкарството“ во секој агол на државата. Бујар Османи, кој делеше тендери за рента-кар како да се бакшиши за неговите блиски. Или можеби Блерим Беџети, мајсторот на политиката „башибузук“, кој заедно со Данела Арсовска го претворија Скопје во џунгла. Или можеби ќе го повикаат милионерот Дрин Ахмети од „Соравија“ како „експерт“ да им дава совети. А Исмаил Јахоски од „Пуцко петрол“, познат по криминалните милионски зделки, го чуваат за моментот кога ќе треба некој да го финансира новиот бизнис-проект на ДУИ – „перење образ со народни пари“.
Ова не е борба против корупцијата, туку обид за нејзина сертификација и бришење со гума на сè што народот го чувствува во коски веќе две децении. Албанскиот народ нема потреба од купени сертификати во луксузни канцеларии на приватни компании, туку има потреба од вистинска правда, реална одговорност и казна за оние што 20 години крадеа и лажеа.
Хартијата не ги брише огромните богатства, вилите, тендерите што се подаруваа и уништените надежи. Албанците ги знаат имињата на тие што им ја стиснаа душата и им ја украдоа иднината. И нема стандард во светот што може да го избрише срамот на една партија што ја претвори корупцијата во систем“, соопшти ВЛЕН.