Македонија
(Видео) Нема случаи на западнонилска треска во Македонија, смируваат епидемиолозите

До овој момент нема регистриран случај на западнонилска треска, смирува доктор Илир Демири од инфективната клиника. Во изјава за медиумите тој посочи дека нема ниту еден хоспитализиран пациент чии симптоми асоцираат на вакво заболување, а такви пациенти нема забележано ниту во амбулантите.
Тој посочи дека за заболување од западнонилска треска треба да се поврзат три клучни критериуми.
„ За да настане вакво заболување треба да се исполни првиот критериум, тоа е да бидете каснат или убоден од комарец, вториот критериум е комарецот да биде заразен, не секој комарец е заразен и може да пренесе заболување и третиот критериум зависи од имуниот одговор на самиот домаќин дали ќе се развие болеста или не. Околу 80 отсто од луѓето кои доаѓаат во допир со овој вирус не манифестираат никаква клиничка слика, значи не развиваат болест. Мал дел од луѓето кои доаѓаат во контакт со овој вирус развиваат болест, западнонилска треска која се манифестира со покачена температура, кожен исип. Ваков облик на заболување е предмет на лекување во секоја здравствена институција на државно ниво. Многу ретко ова заболување знае да даде потешка, неуроинвазивна форма на заболувањето која се карактеризира со посебни клинички ентитети кои ние ги делиме како менингит, менингоенцефалит или енцефалит. Таквите болни се предмет на инвестигација и хоспитализација и понатамошен третман во Универзитетска клиника за инфективни болести и фебрилни состојби. До овој момент на клиниката нема ниеден пациент хоспитализиран со ваква клиничка слика “, објасни доктор Демири.
Тој нагласи дека секогаш е подобро заболувањата да се превенираат отколку да се лекуваат, а во овој случај превенцијата би била да се минимизира можноста од каснување од комарци.
Гордана Кузмановска, епидемиолог во Институтот за јавно здравје имат се што е потребно за дијагностика на западнонилска треска.
„Институтот за јавно здравје како врвна институција, национална, од областа на дијагностиката располага со сите потребни дијагностички процедури, значи експертиза, реагенси и се што е потребно за дијагностика и за конфирмација на ова заболување согласно стандардните дефиниции на случај. За секој случај одиме со испитување до крај и потврдуваме дали се работи за западнонилска треска или не“, рече епидемиологот Кузмановска.
И Демири и Кузмановска тврдат дека и покрај тоа што во сите соседни земји веќе има смртни случаи од западнонилска треска, кај нас нема заболени.
За двајца сомнителни пациенти во Македонија, возрасна жена и дете, лабораториските анализи направени во Институтот за јавно здравје покажале дека немаат западнонилска треска.
Девет луѓе починале досега во Србија од вирусот Западен Нил, а годинава се регистрирани 102 случаи на заболени лица, покажале податоци на српскиот Институт за јавно здравје „Др. Милан Јовановиќ – Батут“. Од почетокот на летото, две лица на возраст од над 80 години починале во Грција, додека 55 се заразени од вирусот Западен Нил, според објавите на грчкиот весник „Катимерини“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Бендевска: Да го продолжиме заветот од Илинден и пораката од АСНОМ

По повод 2 Август – Денот на Републиката, во име на претседателот на Собранието на Република Северна Македонија, Африм Гаши, потпретседателката на Собранието на Република Северна Македонија, Весна Бендевска, заедно со собраниска делегација во состав: Бране Петрушевски, Никола Коњановски, Даниела Николова и Даниел Стојчевски, одбележа 81 година од Првото заседание на АСНОМ, во Меморијалниот центар АСНОМ во Пелинце.
„На хероите на двата Илиндена кои се жртвуваа за денес да можеме да бидеме свои на своето, да им ветиме уште еднаш дека денешните генерации нема да го заборават заветот што ни го оставија. Да ги насочиме нашите погледи, стремежи и напори од заедничкото минато, кон заедничката сегашност и иднина. Да го продолжиме заветот од Илинден и пораката од АСНОМ“ – порача потпретседателката Бендевска.
Македонија
(Фото) Сиљановска-Давкова: Мора да го искорениме плевелот на корупцијата и криминалот, време е за нова пролет на нашата македонска република

Претседателката Гордана Сиљановска-Давкова, денеска се обрати на чествувањето на 2 Август – Илинден, Денот на Републиката на Мечкин Камен во Крушево.
Во својот говор, Сиљановска-Давкова рече дека е „време за нова пролет на нашата македонска република, за навраќање на републиканските корени“.
„Што значи тоа? Македонските граѓани од својата република очекуваат барем две нешта ̶ слобода и правда. Кога зборувам за слобода, не мислам само на политичката, туку и на економската, на академската, на културната, на социјалната… Кога зборувам за правда, не мислам само на правосудството, туку и на социјалната, еколошката и на генерациската правда. Не смееме да изумиме дека предуслови за слободата и за правдата се владеењето на правото и еднаквоста пред законот“, истакна претседателката.
Таа додаде дека „мора да го искорениме плевелот на корупцијата и на криминалот“.
„Никој не смее да биде недопирлив, независно дали е поранешен или актуелен политичар или функционер, судија или влијателен бизнисмен. За правдата да биде неселективна и навремена, потребни се забрзани и длабоки реформи во правосудството, а тие почнуваат со европска правна рамка, но и со европски критериуми на регрутирање, како и со европски стандарди на функционирање и одговорност“, вели Сиљановска-Давкова.
Според неа, потребен ни е здравствен систем по мерка на здравјето на пациентите и на нацијата. За креативните умови, потребни се инвестиции во образованието и науката, во истражувањето, во развојот и дигитализацијата.
Претседателката се осврна и на пожарите.
„Деновиве, републиката ни е во пламен. За помалку шумски пожари, потребен е не само правен, туку и ефикасен институционален систем, вистински луѓе на важни позиции, вградена превентивна и волонтерска димензија, стимулативни мерки за пожарникарите, пожарникарството и за волонтерите. И овие активности се во ек. За да се заштити здравјето на луѓето и на природата, мора да ставиме крај на дивите депонии и на нивното палење, но и да имаме контрола врз палењето“, вели претседателката.
Сиљановска-Давкова истакна дека имаме потреба од длабоки и суштински реформи во секоја област по европска мерка: со заштитени слободи и права, со владеење на правото и бескомпромисна борба со корупцијата; со стратегиски партнерства со државите со заеднички вредности и интереси; со независни и функционални институции; со компетитивна економија и со капитални инвестиции; со партиципативна политичка култура.
„Ние не сме стебло без корен. Нашата слобода и нашата република се вкоренети во европската пролет на народите, во демократските и хумани визии на „Млада Европа“. И затоа, на оној што ќе ни рече „вие сте млад народ со млада држава“, ќе му одговориме дека сме чеда на Гоцевата визија за „Млада Европа“ обединета Европа, и за светот како поле за културен натпревар на народите!
Колку и да ни е тешко, не треба да се обесхрабруваме од пречките и препреките. Сме опстоиле и сме надминале и потешки проблеми. Не сме сами. Имаме пријатели – демократи кои го почитуваат нашето право на национален и културен идентитет, на граѓански дигнитет и интегритет зашто и самите го сакаат и уживаат. Верувам во нивната поддршка и помош. Тие не се плашат да укажат и да се спротивстават на двојните стандарди и на анахроните обиди за ревизија на историјата.
Ние не се откажуваме од природниот пат кон членството во ЕУ, оти отсекогаш сме дел на Европа: географски, историски и културно, зошто да не и политички. Едноставно, ние балканските народи и нации сме биле, сме и ќе останеме Европејци.
Цврсто сме решени како што беше европски зацртано да стигнеме до целта до 2030 година, европеизирани по словото на Копенхагенските критериуми!“, рече претседателката Сиљановска-Давкова.
Македонија
Филков од Пелинце: АСНОМ нека ни биде потсетник – патот на правдата бара храброст, истрајност и одговорност

Министерот за правда, Игор Филков, беше дел од владината делегација која оддаде почит по повод 81 година од Првото заседание на АСНОМ, во Меморијалниот центар АСНОМ во Пелинце.
„Денес сме овде, во Меморијалниот центар АСНОМ во Пелинце, за да оддадеме почит на државничката визија и храброста на генерациите кои пред 81 година го поставија темелот на нашата државност.
Првото заседание на АСНОМ не е само историски момент, туку жив доказ дека борбата за правда, слобода и достоинство е темел на нашето постоење како народ и држава.
Како министер за правда, должност ми е да го чувам тој завет – да се грижам за правна држава, за независни институции и за заштита на човековите права.
Нека ни биде потсетник – патот на правдата бара храброст, истрајност и одговорност. АСНОМ ни остави обврска, а ние имаме должност таа обврска да ја преточиме во дела“, истакна министерот Филков.