Македонија
Несторовска: Седум од десет жртви во трговијата со луѓе на глобално ниво се жени или девојчиња, една третина од нив се деца
Министерката за труд и социјална политика, Јованка Тренчевска, денеска учествуваше на конференцијата „Процена на ризиците и спречување трговија со луѓе во синџирите на снабдување“. Целта на конференцијата, што ја организира Националната комисија за борба против трговија со луѓе и илегална миграција, во соработка со Канцеларијата на специјалниот претставник и координатор за борба против трговија со луѓе на ОБСЕ и поддршка на Мисијата на ОБСЕ во Скопје, е споделување на искуствата во превенцијата и борбата против трговијата со луѓе. Тренчевска посочи дека Владата и Министерството развиваат политики и координиран пристап за превенција, интервенција и кривично гонење на сторителите, како и на национален и транснационален механизам за упатување и заштита на жртвите на трговија со луѓе.
„Наша стратешка определба е подобрување на националните политики за борба против организираниот криминал – трговијата со луѓе. За таа цел, работиме на превенција и подигање на јавната свест, на унапредување на законската регулатива и на зацврстување на почитувањето на основните човекови права на сите граѓани, особено на децата. Ги донесовме Националната стратегија за борба против трговија со луѓе и илегална миграција 2021-2025, Националниот акциски план за борба против трговија со луѓе и илегална миграција 2021-2025 (НАП) и Акцискиот план за борба против трговија со деца. Го донесовме и Законот за спречување и заштита од насилството врз жените и семејното насилство, во кој како облик на родово базирано насилство е дефинирана трговијата со жени и девојчиња“, рече Тренчевска.
Специјалниот претставник и координатор за борба против трговија со луѓе на ОБСЕ, Вилијант Ричи, посочи дека во изминатите години зајакнат е меѓународниот одговор против трговијата со луѓе и дека националните стратегии треба подетаљно да ги опфатат системските проблеми, кои се извор на трговијата со луѓе.
„Еден од начините да се спречи трговијата со луѓе е да се намали побарувањето на стоки и услуги, кои се резултат на присилен труд. Ако сакаме да ја спречиме трговијата со луѓе, треба да престане плаќањето за тргување со луѓе. При ваквите приоди овозможуваме да се заштитат човековите права на жртвите“, рече специјалниот претставник и координатор за борба против трговија со луѓе на ОБСЕ, Ричи.
Шефот на мисијата на ОБСЕ во Скопје, Клеменс Која, потенцира дека поддршката на Република Северна Македонија во спречувањето на модерното ропство – трговијата со луѓе, ќе продолжи.
„Канцеларијата на ОН за дрога и криминал проценува дека седум од десет жртви кои ќе се откријат на глобално ниво се жени или девојчиња, една третина од нив се деца“, рече амбасадорот на ОБСЕ, Клеменс Која.
Според национална координаторка за борба против трговијата со луѓе и илегалната миграција, Магдалена Несторовска, зголемувањето на процентот на жртвите е затоа што сторителите на кривичното дело – трговија со луѓе покажуваат исклучително висока подготвеност на приспособување.
„Жените и девојчињата се особено погодени од модерното ропство, што претставува 29 милиони или 71 % од вкупниот број, од кои на четири лица – едно е дете. Од овие причини треба да се бориме против ова зло. Треба да го истакнеме големиот профит што го стекнуваат трговците на сметка на жртвите, но и да ги потсетиме корисниците на услугите – што ги очекува, со цел да се спречи трговијата со луѓе. Последниве две години научивме дека ниту падемијата не ја запре трговијата со луѓе, туку придонесе да прерасне во идеална средина за зголемување на бројот на жртвите“, рече Несторовска.
Податоците објавени од меѓународната организација на трудот покажуваат дека повеќе од 40 милиони луѓе се жртви на модерното ропство. Процените се дека 25 милиони луѓе се идентификувани како жртви, кои биле трудово експлоатирани, од кои 16 милиони луѓе биле експлоатирани во приватниот сектор, како што се градежништвото, земјоделството, а околу 5 милиони лица се сексуално злоупотребени.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Скопје
Без вода дел од Центар
ЈП Водовод и Канализација известуваат дека денеска поради санирање на дефект од страна на странка – фирма на улицата Франклин Рузвелт бр.60 во населба Центар без вода ќе останат корисниците на улицата Франклин Рузвелт лоцирани на потегот од улица Орце Николов до булеварот Партизански Одреди.
Водоснабдувањето ќе биде прекикнато во периодот од 09.00 часот па се до отстранување на дефектот.
Регионалниот центар за управување со кризи на Град Скопје, по добиеното известување од ЈП Водовод и канализација – Скопје, ги известува граѓаните дека денеска поради водоводен приклучок Ф100мм. на улица Крагуевска 9. со прекинато водоснабдување ќе бидат корисниците од улицата Крагуевса, Беджих Сметана и Драган Ѓаковски-Шпато во општина Центар.
Водоснабдувањето ќе биде прекинато од 09:00 часот до завршување со работните активности.
Македонија
Земјотрес со јачина од 3,4 степени почувствуван во Скопје
Телеметриската сеизмолошка мрежа на Република Северна Македонија, на сеизмолошките станици инсталирани ширум нашата територија, одржувани од Сеизмолошката опсерваторија при Природно-математичкиот факултет во Скопје, ноќва, 23.09.2024 година, во 02 часот и 02 минути, регистрираше земјотрес чиј епицентар припаѓа на скопското епицентрално подрачје, со Рихтерова локална магнитуда ML3.4.
Според досегашните податоци со кои располага опсерваторијата, земјотресот е почувствуван од населението на градот Скопје и околината, со интензитет од III-IV степени според Европската макросеизмичка скала.
Македонија
Првиот вицепремиер Изет Меџити учествуваше на Самитот на иднината во Обединетите нации
Првиот вицепремиер и Министер за животна средина и просторно планирање Изет Меџити, денеска учествуваше на Самитот на иднината во Обединетите нации. Овој самит собра повеќе од 150 лидери на држави и влади од целиот свет за да разговараат за предизвиците и можностите поврзани со иднината на човештвото.
„Како прв потпретседател на Владата на Република Северна Македонија, учествував на Самитот на Иднината во Обединетите нации, каде заедно со високата државна делегација, вклучително и претседателката Гордана Силјановска Давкова и министерот за надворешни работи Тимчо Муцунски, ја претставувавме нашата земја во овој голем глобален настан. Овој самит собра повеќе од 150 лидери на држави и влади од целиот свет за да разговараат за предизвиците и можностите поврзани со иднината на човештвото“, рече Меџити.
Меџити понатаму додаде дека на отворањето на самитот, каде што бил присутен, главниот фокус бил ставен на Пактот за иднината, амбициозен документ кој има за цел да изгради нова рамка за меѓународна соработка и одржлив развој.
„Во овој контекст, ги слушнавме инспиративните говори на генералниот секретар на ОН, Антонио Гутереш и на германскиот канцелар, Олаф Шолц, кои ја истакнаа важноста на глобалната соработка за соочување со најголемите предизвици на нашето време“, додаде Првиот вицепремиер.
Пактот за иднината е сеопфатен документ кој се однесува на широк опсег на критични прашања. Вклучува поглавја за човекови права, родова еднаквост, одржлив развој, наука, технологија и иновации, како и дигиталната соработка. Меѓу другото, се истакнува важноста од ангажирање на младите и зачувување на интересите на идните генерации кои се во центарот на трансформацијата на глобалното владеење.
Покрај учеството на овој форум на високо ниво, агендата на Меџити во Њујорк вклучува и серија состаноци со американски сенатори и други политички и економски лидери. „Овие средби ќе се фокусираат на продлабочување на соработката меѓу Северна Македонија и САД во клучните области како зелената енергија, технологијата и одржливиот развој, како и да се разговара за перспективите на нашата земја во меѓународните процеси“, појасни Меџити.