Во врска со сериозниот еколошки инцидент на 14 март во Крива Река, СДСМ изразува длабока загриженост и ја повикува јавноста, институциите и правосудните органи да не дозволат овој случај да биде заташкан.

„Се работи за сериозно загадување на реката и животната средина, кое може да има долгорочни последици по здравјето на граѓаните, водите, почвата, земјоделството и целиот екосистем во регионот. Најалармантно е што постојат сериозни сомнежи дека државните институции, пред сè Инспекторатот за животна средина, свесно прикривале информации и намерно ја дезинформирале јавноста. Иако биле обврзани по закон веднаш да земат примероци и да утврдат присуство на опасни хемикалии во водата, тоа не било направено. Наместо анализа, било објавено дека се излеала „само вода“, што е тешка лага со можни кривични последици“, посочуваат од партијата и додаваат:

„Дополнително загрижува тоа што има индиции дека инспекторите кои излегле на терен имаат директни или индиректни врски со фирмата Булмак 2016. Ова е очигледен судир на интереси кој фрла сомнеж врз целиот надзорен процес и отвора прашања дали државата свесно ја штити компанијата Тораница на штета на здравјето на граѓаните“

СДСМ бара од Јавното обвинителство итно да отвори предмет за овој случај.

„Очекуваме Министерството за животна средина и Државниот инспекторат за животна средина да ја информираат јавноста дали Булмак 2016 работи догласно А интегрираната еколошка дозвола, со оглед на тоа дека ова не е прво прекршување. Бараме и објава на сите релевантни инспекциски извештаи, како што налага законот, и утврдување на индивидуална одговорност за сите службени лица кои не постапиле согласно прописите. Граѓаните имаат право да знаат што се случува со нивната животна средина. Никој нема право да си игра со нивното здравје. Потребна е транспарентност, одговорност и решителност. Овој случај нема да помине незабележано“, завршуваат од СДСМ.

Борче Јованчевски успеал да се спаси од пожарот во Кочани, но се вратил за да помогне во извлекувањето на заглавените млади луѓе кога настанало стампедо по пожарот во дискотеката „Пулс“.

Тој за платформата supportkocani.com раскажа што се случувало кобната ноќ.

„Пејачите рекоа ‘сите надвор, сите надвор, ќе се вратиме’. Тргнавме полека да излегуваме надвор, но наеднаш настана стампедо и хаос. Јас ја држев сопругата за рака, но од јаглеродниот моноксид се онесвестив. Бог ми даде некоја сила, не знам како да опишам, се разбудив и видов дека не ја држам веќе за рака.“, го почнува Јованчевски сведочењето.

„Пробав да излезам, но никако, бевме заглавени. Бог ми даде сила, се искачив, почнав да гребам и паднав долу пред скалите. Првото нешто што го направив, истурив вода на лицето и почнавме одма да ги извлекуваме луѓето. Многу од нив беа заглавени, сите пружаа рака, некој можеше да се извлече, а некој не“, раскажува.

Тој рече и дека до него бил Лазе од обезбедувањето, бил многу силен и можел да извлече повеќе луѓе, па ги подавале сите нанадвор. Дошол и дедо му, и со него заедно почнале да ги вадaт луѓето од дискотеката.

„Имаше запалено од едната страна бела даска која гореше, заедно ја кренавме даската и ја фрливме и дедо ми почна на левата страна да влече луѓе, а јас видов рака и некој кој ми го извикува името. Тоа беше мојата сопруга. За среќа беше жива…“, вели тој.

Борче Јованчевски бил еден од првите кој алармирал за пожарот во дискотеката во Кочани и објавил апел за помош на социјалните мрежи, помагајќи кочанчани да излезат и да спасуваат луѓе.

Во пожарот во „Пулс“ загинаа 59 лица, а околу 200 беа повредени и пренесени на болниците во државата и во странство. По пожарот загина и возачот на Брзата помош, Иле Гоцевски, кој цела вечер и утредента пренесувал повредени лица од Кочани до Скопје. Дошол дома заспал и повеќе не се разбудил.

СВР Скопје известува дека утре (29.03.2025) со почеток од 11.00 часот поради одржување на протест пред Собрание на РСМ, Единицата за безбедност на патниот сообраќај ќе преземе мерки за посебен режим на сообраќајот во централното градско подрачје на град Скопје.

СВР Скопје апелира до сите граѓани учесници во сообраќајот да се почитуваат наредбите кои ќе ги даваат полициските службеници.