Македонија
„Не користи мобилен телефон додека возиш“ – превентивна активност на СВР Охрид

Вчера, полициски службеници од Отсекот за превенција при СВР Охрид во соработка со Полициската станица за безбедност на сообраќајот при СВР Охрид спроведоа превентивно – едукативна кампања „Не користи мобилен телефон додека возиш“.
На повеќе пунктови во Охрид, полициските службеници остварија непосредна комуникација со возачите на моторни возила и им укажуваа дека користењето мобилен телефон при управување со возило може да биде опасно како за нивната, тка и за безбедноста на другите учесници во сообрачајот, извести СВР Охрид.
Полициските службеници посочија дека користењето мобилни телефони во текот на возењето го одвлекува вниманието, се намалува внимателноста кон состојбите на патиштата и се зголемува ризикот од сообраќајни незгоди. Целта на кампањата е јакнење на сообраќајната култура, свеста и совеста кај возачите за активен придонес во зголемувањето на безбедност во сообраќајот на патиштата. На возачите им беа поделени летоци со едукативни совети и насоки, соопшти СВР Охрид.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Движењето ЗНАМ до СДСМ: Крадецот вели – држете го крадецот, ние сме дома и градиме за нашите граѓани, а не во Дубаи

Ја разбираме очајната состојба во која се наоѓа СДСМ, во својата безидејност, во својот слободен пад како партија на македонската политичка сцена, отвораат стари теми кои се отворени и затворени за јавноста пред повеќе од 9 месеци, реагираат од движењето ЗНАМ на прес-конференцијата на СДСМ.
За ЗНАМ, како што велат, денешниот прес организиран од новата и веќе етаблирана коалиција помеѓу СДСМ и Левица, а во интерпретација на сомнително лице со документирани здравствени проблеми од психолошка природа, за кое не сме сигурни дека ја консумирала потребната дневна доза лекови е дежаву на настаните од пред 4 години, односно за време на Локалните избори во 2021 година.
„И тогаш, и сега токму пред локалните избори кои треба да се одржат во октомври, на маса е истото неуспешно сценарио организирано од СДСМ. Би сакале да ја потсетиме јавноста дека од страна на поранешната Влада, еден од најголемите инвестициски проекти во Македонија, кој вреди стотина милиони евра беше опструиран и закочен. Компанијата ЛИДЛ и нивната инвестиција во индустриската зона Нивини и Речица во Куманово е една од стратешките развојни активности како за Куманово, така и за Македонија, која треба да обезбеди нови работни места и економски раст во регионот.
На крајот од мандатот на поранешната Влада, сакајќи да обезбеди политички поени пред Парламентарните избори минатата година ја промовираше оваа капитална инвестиција и беа првите лопатари на чело со поранешниот Премиер Димитар Ковачевски (Слики). Не ни е јасно зошто тогаш ЛИДЛ беше одлична, а сега е непосакувана инвестиција“.
Според движењето ЗНАМ, СДСМ, заробени во своите навики дека од секоја приватна инвестиција треба да извлечат личен бенефит и профит или народски кажано да рекетираат, обвинуваат дека тоа го прават другите.
„Во континуитет, СДСМ се води од народната поговорка: „ Крадецот вели, држете го крадецот“.
Ние сме дома, во Македонија, а не во Дубаи на журките на Харис Џиновиќ, не градиме облакодери во Дубаи, ние градиме за граѓаните на Македонија. Ние ниту сме Зоран Заев кој направи милиони евра од ископите во РЕК Битола (за кои сега има постапки), ниту сме Венко Филипче кој земаше провизии за набавка на вакцини, реагенси и респиратори во Ковид кризата“.
Во пораката која му ја упатуваат на СДСМ велат дека во врска со една од најголемите капитални инвестиции во Македонија, нема ништо скриено.
„Сè е јавно. Сè е може да се провери. Сè е законски. Ова не е политика – ова е дефокус од вашите корупциски афери. СДСМ е партија во паника. Додека институциите ги отвораат вистинските скандали од вашето време – тендери, проневери, договори во четири очи и партиски вработувања – вие се обидувате да го одвлечете вниманието на јавноста со напади врз градоначалникот на Куманово. Денес, по децении на запоставеност, Куманово е препознаен како пример за локален развој.
ЗНАМ ќе продолжи. Без страв. Без компромис. Нема да се повлечеме“, велат од ова движење.
Македонија
МОН: Ниту еден студент нема да го изгуби правото на субвенциониран студентски оброк заради користење семејна пензија

Министерството за образование и наука информира дека на ниту еден студент кој користи субвенциониран студентски оброк, нема да му биде прекинато правото доколку истовремено е корисник и на семејна пензија по основ на починат родител.
Студентите корисници на субвенциониран студентски оброк, кои истовремено користат и семејна пензија, нема да го изгубат правото остварено преку Министерството за образование и наука. Предизвикот настанат на почетокот на овој месец, кој засегна 181 студент, ќе биде надминат во текот на денешниот ден и студентите ќе ги добијат средствата кои им следуваат согласно закон, нагласуваат од ова министерство.
Потсетуваат дека Министерството за образование и наука на барање на Националното студентско тело од месец април го прошири опсегот на оваа мерка, така што, според нив, повеќе работниот статус не е ограничувачки критериум за остварување на правото на субвенциониран студентски оброк, а истото можат да го користат и студенти од втор циклус на студии.
Македонија
Сиљановска-Давкова со Милановиќ: Ветото ќе предизвикува проблеми, ние инсистираме и си го бараме местото во ЕУ, да речам дека се надевам утре да наидеме на разбирање – ќе згрешам

Во рамки на официјалната посета на хрватскиот претседател на нашата земја беше одржана заедничка прес-конференција на претседателката Гордана Сиљановска-Давкова и претседателот Зоран Милановиќ.
Претседателката изрази благодарност до претседателот Милановиќ за посетата.
„Благодарност за разбирањето и за пријателскиот однос на Хрватска. Благодарност за советите, мислам дека се многу корисни. А што да кажам за односите меѓу двете држави? – традиционално пријателски. Да повторам дека никогаш нема да заборавиме дека во 2020 година за времето на хрватското претседателство со ЕУ го направивме чекорот заедно со Албанија. Тоа е знак на разбирање, знак на поддршка. Јас и претседателот, како и претходно, рековме дека односите во сите сфери одат напред. Се разбира дека може да се развиваат“, кажа Сиљановска-Давкова.
Според неа, Хрватска и покрај тоа што е членка на Европската Унија, има разбирање за регионалните потреби, има разбирање за Западен Балкан и потсети дека многу пати, хрватскиот претседател повторува дека сме географски, културно и историски дел од Европа.
„Што да кажам за нашето чекање за Европската Унија? – Копенхагенските критериуми се тие што од нас ќе направат стандардна, европска, досадна држава, дека ветото не е пријателски инструмент и дека очекувам разбирање. Се разбира, ние мораме да ја тераме државната агенда, бидејќи легитимитетот ни извира од граѓаните. Кога го велам ова, мислам економски, културно, образовно и научно, да се развиваме. Скринингот покажува дека ние сме многу напред во хармонизирањето со акито (Acquis communautaire). Нашите проблеми се од друга природа, тие се врзани за историјата, за перцепцијата на културата, па дури и за јазикот, нешта за коишто не се разговара и преговара. Но, да повторам: ветото ќе предизвикува проблеми и нема да бидеме осамен случај. Ние инсистираме и си го бараме местото во ЕУ според копенхагенските критериуми. Да речам дека се надевам утре да наидеме на разбирање – ќе згрешам. Да, разбирање од Хрватска, да, разбирање од Словенија, но мислам дека се важни и односите со другите соседи. Очекувам да исчекориме и во тој поглед“, нагласи претседателката.