Македонија
(Видео) Не почна судењето на Жан Митрев, одбраната побара одлагање за да го доекипира правниот тим

Не почна судењето на Жан Митрев и неговата клиника, кои се товарат за измама оти ги држеле во заблуда пациентите со прикривање факти во однос на лекувањето од Ковид-19 со хемофилтрации. Одбраната побара одлагање за да го доекипира правниот тим.
„Верувам во институциите на државата и ќе ја докажам вистината“, изјави Митрев, кој денес се појави во судот.
Кардиохирургот Митрев вчера направил измени во правниот тим што ќе го брани откога адвокатот Стевица Јосифовски на 20 февруари го известил судот дека не може да присуствува на првото рочиште бидејќи е на патување. Митрев вчера го заменил адвокатот Јосифовски со адвокатите Никола Додевски и Никола Лазаров, кои ги ангажирал да ја подготват одбраната, а за што добија рок до 5 април за кога судијката Лидија Пертовска го закажа судењето на кое обвинителката Искра Хаџивасилева треба да го образложи обвинението.
Од Клиниката „Жан Митрев“ утрово соопштија дека Кривичниот суд вчера донел решение за блокирање на сметките што тие го толкуваат како обид за затворање на болницата.
„Сакаме да ја информираме јавноста дека ќе направиме сè што е во нашите можности и лекувањето на ниеден пациент нема да биде доведено во прашање иако постапките на Кривичниот суд, а на барање на Обвинителството, одат во поинаква насока, односно бараат наше затворање“, соопшти болницата.
Истрагата за Жан Митрев и неговата болница беше отворена по допрен глас по објавите на ИРЛ, а скопското Јавно обвинителство во јануари годинава поднесе обвинение.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Сообраќајот низ државата се одвивa непречено, по наместа влажни коловози

Сообраќајот на државните патишта се одвивa непречено, по наместа влажни коловози, извести АМСМ.
Интензитетот на сообраќај на патните правци надвор од градските средини е умерен. На граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Без струја Шуто Оризари и Зелениково

Од ЕВН Македонија АД известуваат дека денеска без електрична енергија ќе останат:
– во периодот од 08.30 до 12.00 часот, дел од корисниците од ул. Гарсија Лорка (општина Шуто Оризари)
– во периодот од 09.00 до 16.00 часот, корисниците од Градовци, Тисовица, Гумалево, Пакошево, Спектар Комерц, Добрино, Дејковец, Ново Село и Пакошево (општина Зелениково)
Македонија
Прекинато водоснабдување во делови од Карпош

Од ЈП Водовод и Канализација известуваат дека денеска (четврток) поради уличен дефект на ф 1000 мм на ул Копенхагенска, на раскрсница со Стокхолмска,бб, прекинато водоснабдување ќе имаат корисниците на улиците Копенхагенска, Стокхломска, Софиска, Његошева, Гаврил Лесновски и Петар Драганов од 09:00 часот до завршување со работните обврски. ( општина Карпош ).