Македонија
Николовски: ВМРО-ДПМНЕ ја закочи државата, ја замени европската перспектива со националистичка хистерија

Слободата, еднаквоста и прогресивноста се основни вредности на СДСМ, порача пратеникот Љупчо Николовски од Крива Паланка, на почетокот на караванот „Мугри на слободата“.
„Од Крива Паланка пак ќе тргне победата. Како што во 2010 освоивме десетпати подобар резултат, така и денеска ќе се исправи грешката од 8 мај. И на локалните и на парламентарните избори“, порача Николовски.
Оваа Влада, додаде тој, ја замени европската перспектива со националистичка хистерија.
„Наместо визија – ширење на омраза. Наместо отворени кластери и ЕУ грантови – нови долгови. Наместо неповратни средства од ИПА фондовите – кредити со камати.
Наместо да сме како Албанија, која отвора кластери со ЕУ, нашата власт ги задолжи идните генерации со кредити од држави, а не од меѓународни институции. Ние бевме лидери во ИПАРД, тие сега ни ја укинуваат целата перспектива“, рече Николовски.
Тој додаде дека дека борбата за слобода не почнала вчера и дека продолжува.
„Се боревме со протести, со бомби, со маршеви. И ќе продолжиме да се бориме. Без систем и без ЕУ, ништо нема да се смени. А тие што велат дека ќе градат систем, не направија ништо освен што го оставија Кочани без државна поддршка“, истакна Николовски.
Тој остро ја нападна владата и за маргинализирањето на Крива Паланка: „Го бришат градот од сите капитални програми, не постои министер што ја посетил општината. Тие не само што немаат план, туку немаат ни доблест да се појават меѓу луѓето“, рече Николовски.
Николовски заклучи дека СДСМ останува единствената државотворна партија, со визија и искуство да ја врати Македонија на вистинскиот пат. „Сега е моментот да се исправат неправдите“, кажа тој.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Адвокатот на Ѓорчевски: Нема одговор зошто беше киднапирана и убиена Вања, и зошто се инсистираше татко и’ да е дел од постапката

Владимир Туфегџиќ – адвокатот на таткото на убиената Вања Ѓорчевска, Александар Ѓорчевски ја коментираше денешната ослободителна пресуда за неговиот клиент, велејќи дека нема простор за победничка еуфорија, а судот донел законска одлука, но празна по својата суштина и без одговорите на клучните прашања. Во процесот, според зборовите на Туфегџиќ, не е даден одговорот на прашањето зошто е киднапирана и убиена Вања, како и зошто се инсистирало нејзинниот татко да биде дел од постапката и покрај тоа што против него немало докази.
Адвокатот побара одговор од институциите зошто не го спречиле ниту криминалниот план за киднапирање на луѓе којшто, според исказот на осудениот Манев, обвинетите го скроиле уште од 2022 година. Туферџиќ праша дали дали вмешувањето на Ѓорчевски во овој случај било обид за дефокусирање од она што би требало да биде предмет на истрагата. Побара одговор од надлежните зошто четворицата обвинети со план за киднапирање луѓе кои копале дупки низ државата за таа цел, не биле детектирани навремено.
Александар Ѓорчевски во моментот не размислува за поднесување кривични пријави. Туферџиќ рече и дека судија на претходна постапка има доставено барање за обезбедување на медицинска документација за констатирани повреди од вршењето тортура кон Александар, на 16 февруари 2024 година. По ниту едно од тие барања не било постапено, ниту пак, јавниот обвинител го проследил ова известување до надлежното Јавно Обвинителсто кое треба да постапува за сторени кривични дела на полициските службеници.
Обвинителството од друга страна соопшти дека ќе се жали на ослободителната пресуда за Ѓорчевски. Обвинителката Ана Стојковиќ Димитриевска по изрекувањето на пресудата дека иако немале докази какви што сакаат да имало, неспорен факт е дека само родителите знаеле дека детето ќе оди само во училиште, а двајца од обвинетите кажале дека дознале од таткото, преку Палевски, пред потоа да ја сменат изјавата. Обвинителката вели дека кога го смениле исказот, двајцата обвинети не понудиле ниту еден разумен факт и околност зошто го сториле тоа, а за тврдењето дека се вршела тортура над нив, обвинителката рече дека тоа не е реално, ниту се докажало.
Кривичниот суд пресуди доживотен затвор за Љупчо Палевски, Боре Видевски, Велибор Манев, Влатко Кешишов за грабнувањето и за убиството на 14-годишната Вања Ѓорчевска и 74-годишниот Панче Жежовски. Таткото на Вања, Александар Ѓорчевски е ослободен од обвинение.
Македонија
ВМРО-ДПМНЕ почнува со трибини низ целата држава, денеска се во Прилеп

По една година од преземањето на одговорноста за водење на владата, ВМРО-ДПМНЕ и Владата предводена од премиерот Христијан Мицкоски започнуваат голема акција на јавна отчетност и отворена комуникација со граѓаните – трибини низ цела Македонија под слоганот:„Ги градиме темелите на промените – доаѓа времето на Македонија“, изјави Валентин Манасиевски од ВМРО-ДПМНЕ.
Според него, оваа иницијатива е израз на нивната определба за транспарентно, одговорно и отчетно работење.
„Граѓаните имаат право не само да слушнат, туку и да прашаат, да кажат, да предложат свои сугестии, идеи и критики со кои ние ќе станеме подобри и пофункционални. Затоа овие трибини ќе бидат можност да секој еден да учествува, да дискутира и да придонесе. Министрите, премиерот и владиниот тим ќе бидат присутни на трибините. Ќе презентираме што сработивме, што започнавме, со што се соочивме и што следува. Ќе зборуваме за проектите, за реформите, за чекорите напред. Но и ќе слушаме. Ќе слушаме од народот, затоа што нашата политика се темели на гласот и интересот на граѓаните“, рече Манасиевски.
Првата трибина ќе се одржи денес во Прилеп на градскиот плоштад во 19:30ч, насловена како „Економски раст и дигитална трансформација’’, а потоа следуваат трибини низ сите краишта на Македонија – во градови и села.
На првата трибина ќе се обрати претседателот на ВМРО ДПМНЕ, Христијан Мицкоски, како и Гордана Димитриеска Кочоска – министерка за финансии, Елена Петрова – директорка на Управата за јавни приходи, Стефан Андоновски – министер за дигитална трансформација и Бојан Стојаноски – пратеник во македонското Собрание.
Македонија
Муцунски на НАТО самитот во Хаг: Мора да инвестираме не само во силна одбрана, туку и во отпорност

На покана на Генералниот секретар на НАТО, Марк Руте, министерот за надворешни работи и надворешна трговија, Тимчо Муцунски, вчера и денес учествува на самитот на НАТО во Хаг, како дел од државната делегација предводена од претседателката Гордана Сиљановска-Давкова.
Во рамки на првиот ден од самитот, министерот Муцунски присуствуваше на работната вечера на земјите членки на НАТО, во формат Совет НАТО–Украина, на која учествуваа и украинскиот министер за надворешни работи, Андреј Сибиха, како и високата претставничка на Европската Унија, Каја Калас. За време на вечерата беа разменети мислења за тековната безбедносна ситуација, потребата од одржлива и координирана поддршка за Украина, како и за зголемените капацитети за одбрана и отпорност на сојузниците.
Во оваа прилика, министерот Муцунски истакна дека кохерентноста и единството се нашата најсилна алатка за справување со заедничките закани и предизвици. Тој нагласи дека потребата да се направи и инвестира повеќе во сопствените одбранбени капацитети мора да остане приоритет број еден за сите земји членки, при што континуираната координација е единствениот начин за постигнување заеднички успех. Муцунски ја подвлече и важноста од постигнување праведно и долгорочно решение за Украина, поздравувајќи ги иницијативите за одржување директни средби меѓу претставниците на Украина и Русија, со поддршка од САД и европските сојузници. Тој ја реафирмираше подготвеноста на Северна Македонија за натамошна поддршка за Украина, согласно националните капацитети и можности.
На маргините на самитот, во текот на двата дена се одржа и висок дипломатски настан – НАТО јавен форум, на кој учествуваа високи државни претставници и експерти кои дискутираа на теми поврзани со стратешките безбедносни предизвици.
Министерот Муцунски денеска зеде учество на сесија посветена на лидерството и идната улога на младите во справувањето со современите безбедносни ризици, како и на заложбата за инклузивна и одржлива безбедносна политика. Во своето излагање тој подвлече: „Вистинската мерка за нашиот успех ќе биде дали сме во состојба да изградиме вистинско партнерство меѓу генерациите – каде што искуството и иновацијата не се во судир, туку се надополнуваат.“ Муцунски им порача на младите лидери дека само заеднички може да се изгради мост меѓу наследството и новото лидерство, со цел обезбедување побезбеден и потпорен свет за сите.
„Во суштина, сите се согласуваме без сомнение: без одвраќање, одбрана и безбедност, нема услови за добар образовен, здравствен, социјален или кој било јавен систем. Погледнете што се случува во Украина – кога има војна, општеството е фокусирано на неа, а не на реформите што го подобруваат животот. Ова е повик за будење за сите нас“, истакна министерот Муцунски.
Тој говореше и за улогата на НАТО во обединување на младите и за фрустрациите кај младите генерации, особено поради застојот во процесот на европска интеграција на Северна Македонија. „Покрај безбедносните предизвици, денес се соочуваме и со наративи на конфликт кои се создаваат и во нашите општества, со цел да ги поделат младите. Ја гледам мојата земја како членка на НАТО, но сè уште не сме членка на Европската Унија. За жал, најголемата пречка сега доаѓа од Бугарија – наш сојузник. Тешко е да се објасни како сојузник може да предизвика дестабилизација. Најголемата фрустрација се гледа токму кај младите.“
„Ги повикувам сите нас, како сојузници, да се обединиме, да работиме заедно, да ги зближиме младите генерации и да создадеме простор на меѓусебна доверба. Дури и да инвестираме 5% од БДП и да донесеме правилни воени одлуки – ако постои недостаток на доверба, непријателот ќе го искористи тоа и ќе нè манипулира однатре. Затоа мора да инвестираме не само во силна одбрана, туку и во отпорност, во сајбер и инфраструктурна безбедност, во одбранбена индустрија, како и во борба против штетните наративи, дезинформации и лажни вести кои ја поткопуваат Алијансата“, заклучи министерот Муцунски.