Македонија
Николовски во новите простории на Антикорупциската комисија: Лично се заложив да го добијат најдобриот простор

Вицепремиерот задолжен за борба против корупцијата, Љупчо Николовски, денеска ги посети новите простории каде што ќе бидат сместени вработените од Државната комисија за спречување на корупција (ДКСК).
Просториите се наоѓаат во зградата на Службата за општи и заеднички работи (СОЗР), на три ката со вкупна површина од 2429,5 квадратни метри.
Новите простории и беа доделени на ДКСК, со одлука на Владата, а со цел непречено извршување на нивната работа.
„Изминатиов период лично се заложив за Комисијата да добие нови простории, и со одлука на Владата, ДКСК во оваа зграда доби три ката. Тоа се најдобрите простории со кои моментно располага државата, преку Службата за општи и зеднички работи“, изјави вицепремиерот Николовски.
Директорот на СОЗР, Пеце Мирчевски, посочи дека Службата за општи и заеднички работи во најкраток можен рок ќе го спроведе задолжението добиено од Владата.
„Ние сме горди што можеме да придонесеме кон Акцискиот план за борба против корупцијата и со тоа да помогнеме кон спроведување на можеби и најважната определба на оваа Влада во наредиот период“, изјави Мирчевски.
Директорката на ДКСК, Билјана Ивановска изјави дека од голема важност тоа што се нашло соодвето решение за нови простории за Комисијата.
„Добро е што се најде конечно решение, а со тоа решение да одговориме на обврските пред меѓународната заедница којашто ни испорача помош во вид на опрема, сервери за коишто во овие простории најдовме соодветни услови. Во однос на другите предвизвици како што е обезбедување на софтвер, Владата донесе одлука за повеќегодишна набавка на тоа апликативно решение, за кое веќе распишавме тендер и во тек е постапката“, изјави Ивановска.
Во однос на Планот за борба против корупцијата, вицепремиерот Николовски посочи дека со ДКСК ќе се соработува во делот на мерката што предвидува измени на Законот за спречување на корупција и судир на интереси, со коишто измени е предвидено допрецизирање на судирот на интереси во делот кој се однесува на вршење на две или повеќе јавни функции, наведување на сите лица кои треба да достават анкетен лист до ДКСК, проширување на надлежностите на ДКСК во делот на носење и спроведување на Планот за интегритет и друго.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Гаши имал интестинална опструкција на тенкото црево, неговата состојба е стабилна, соопшти МЗ

Министерството за здравство информира дека претседателот на Собранието, Африм Гаши е во стабилна здравствена состојба.
Тој околу полноќ бил хоспитализиран на Клиниката за дигестивна хирургија со болки во стомакот.
„Веднаш му се направени потребните радиолошки и лабораториски испитувања, утврдена е интестинална опструкција на тенко црево.
Задржан е на болничко лекување и е под постојан лекарски надзор. Во моментот е на конзервативен, медикаментозен третман, без поставена индикација за оперативно лекување“, соопштија од ресорното министерство.
Македонија
Лефков: И Жерновски се појави како бугарска интернет страна хостирана на Бихачка, менаџирана од Софија

„За Mushroom медиуми сме чуле и виделе, ама Жерновски покажа дека постојат и mushroom политичари – без светло, без корен, и со многу влага од минатото. Пропаднатиот градоначалник, амбасадорот на диво се јави со писание за да не запознае дека не се во игра само mushroom страници туку постојат и mushroom политичари, објави на социјалните мрежи пратеникот на ВМРО-ДПМНЕ, Миле Лефков како реакција на претходната објава на Андреј Жерновски.
„МНР на Бугарија најави дека ќе ги ангажира сите ресурси и достапни канали за заштита на бугарските интереси и оп се појави Жерновски како бугарска интернет страничка хостирана на Бихачка, менаџирана од Софија!
Со тоа што се јави Жерновски, сам се пријави. Само уште не ни кажа дали е ресурс, канал или mushroom пропаднат амбасадор!
Жерновски, човек без акредитив, без политичка тежина и без капка авторитет, се појави на сцена како интернет-трол во обид да ме дискредитира – не заради некаква вистина, туку затоа што моите ставови го погодија токму онаму каде што боли: во вистинската насока.
Додека јас предупредував за хибридна закана од Бугарија, неговите партиски другари релативизираа со “параноја” и навреди, ама ден подоцна бугарски медиуми стартуваа уште еден координиран напад. И како по команда – уште еднаш, пак Жерновски, истрошен глумец од маргините на политиката, mushroom политичар, за да ја продолжи прљавата работа дома, со досетка “сум паднал во јамата”, во ред, ајде малку да зборуваме и за јами:
Јама е кога си пропаднат градоначалник кој општината ја претвори во партиски расадник – со роднини и активисти од СДСМ вработени со договори во 4 очи.
Јама е кога одиш во Букурешт како “амбасадор на диво”, без акредитив, без процедура, без достоинство.
Јама е кога цела кариера ја минуваш на грбот на државата, а потоа глумиш досетко-mishroom полотичар со туѓи агенди.
Јама е кога после сè – од пропаднат градоначалник, преку дипломатија на диво, завршиш како обичен интернет трол кој се фаќа за роднини и браќа, оти со аргументи не можеш да се справиш“.
Јас сум пратеник и зборувам во свое име, пишува Лефков во објавата и додава дека не бега од вистината.
„Јас не бегам од вистината – ја кажувам, колку и да не им одговара на некои. А моите роднини не се предмет на јавна расправа. Тоа што некој друг цел живот се криел зад туѓи имиња и привилегии – не му дава право да ги влече моите роднини во калта, затоа што така правел кариера!
Јас зборувам, и ќе продолжам да зборувам за Македонија, без разлика кого тоа нервира – во Софија или во Централен одбор на СДСМ.
А ти, ако баш сакаш да бидеш корисен за некого – прво реши се дали си ангажиран “ресурс” или “канал” за бугарските интереси“.
Упатува како што вели, јавно прашање до Андреј Жерновски:
„Дали со месеци се криеше од МНР бидејќи Романија не ти дозволуваше да ги предадеш акредитивните писма?
„Дали МНР за тој сериозен пропуст дозна директно од романските власти наместо од тебе?
Ако на било кое од овие прашања одговорот е не, јавно и лично ќе му се извинам.
Но ако е да, тогаш ред е тој да им се извини и на институциите, и на граѓаните што на диво ги трошел нивните пари на туризам во Букурешт“, нагласува Лефков.
Македонија
Вработен во болницата во Прилеп си присвоил 2.110.640 денари, пари наплатени од пациенти

Основниот суд во Прилеп донесе правосилна пресуда против службено лице од ЈЗУ Општа болница со проширена надлежност „Борка Талески“ – Прилеп, за сторено кривично дело Проневера во службата, согласно член 354 став 2 во врска со став 1 и во врска со член 45 од Кривичниот законик, соопштија од Управа за финансиска полиција.
Станува збор за случај во кој, како што појаснуваат, во периодот од август 2024 до април 2025 година, вработен во болницата противправно присвоил средства наплатени од пациенти во вкупен износ од 2.110.640 денари.
„Обвинетиот иако ги врати средствата, судот ја утврди вината и му изрече условна затворска казна во траење од две години, која нема да се изврши ако во наредните четири години не стори ново кривично дело.
Овој случај е дел од пошироката истрага на Управата за финансиска полиција, која со месеци го анализираше финансиското работење на прилепската болница и истовремено ја потврдува нашата заложба за борба против корупцијата и злоупотребата на јавни средства“.
Додаваат дека враќањето на парите не ослободува од одговорност, правдата мора да биде еднаква за сите.
„Оштетувањето на јавниот буџет, особено во здравствениот сектор е недозволиво и секој обид за прикривање или игнорирање на вакви постапки претставува закана за довербата на граѓаните во институциите“.