Македонија
Николовски: Имаме јасно решение на проблемот со продолжувањето на договорите, со земјоделците праќаме порака веднаш да се донесе Законот за земјоделското земјиште

Во Свети Николе министерот за земјоделство, шумарство и водостопанство, Љупчо Николовски одржа средба со земјоделците од здружението Овчеполски фармер.
На средбата земјоделците со министерот Николовски разговараа околу продолжувањето на договорите за закуп на земјоделското државно земјиште, презентирајќи ги решенијата што министерството ги подготви за решавање на овој проблем.
„Најпрво, лага е дека овие договори можат да бидат продолжени со потпишување анекс на договорот, бидејќи за тоа не постои законска можност. Срамна лага, со која се манипулираат земјоделците, е дека договорите на земјоделците се раскинати и им е одземено правото на владение. Напротив, ниту еден договор не е раскинат, ниту пак има донесено некое решение за раскинување, ниту пак е одземено нечие право на владение.Секогаш имаме решение за сите предизвици кои ги имаат земјоделците. Ние како министерство сме на страната на земјоделецот и постојано директно од терен разговарајќи со земјоделците, ги слушаме проблемите и заедно ги решаваме, добиваме нови идеи и заедно креираме нови мерки“, истакна министерот Николовски.
Како што посочи, предложени се измени на Законот за земјоделското земјиште, каде се предвидува можност земјоделците кои што имаат истечен договор, во перидоот на изборниот процес, да не бидат избришани од ЕРЗС системот.
„Ваквите предложени измени на законот се веќе доставени до Собранието, но истите се блокирани од страна на претседателот на собраниската комисија за земјоделство, кој предложените измени не ги става на дневен ред за разгледување на комисијата. Дополнително, извршена е веќе измена на Уредбата за директни плаќања овозможувајќи непречено право на субвенции кон сите земјоделци врз основа на старите договори за закуп, а нивното продолжување би следувало веднаш по изборите. Продолжувањето на договорите на овие земјоделци би се извршило не на 5, туку на 15 години по иста цена на закуп како досегашниот договор. Токму овие две работи како можност за земјоделците доаѓаат преку претходните измени во Законот за земјоделското земјиште, токму предложени од страна на земјоделците од светиниколско. Решението е подготвено и чека усвојување од Собранието. Ве повикувам заедно со мене, рамо до рамо, да се избориме и овој проблем да го решиме. Да направиме заедно притисок до сите оние кои го блокираат ова решение, што е во ваш интерес. Да успееме заедно да ги задржите земјоделските земјишта и да ги добиете заслужените субвениции“, истакна министерот Николовски.
Министерот Николовски и земјоделците, на средбата, заеднички одлучија да потпишат заедничка петиција, преку која се бара собраниската комисија за земјоделство, веднаш да ги разгледа и усвои до 3 април измените во Законот за земјоделското земјиште.
Пред земјоделците министерот Николовски даде збор дека во следните два и пол месеци договорите ќе бидат продолжени, нагласувајќи дека на ова прашање секторите во министерството овие денови посветно работат со целиот капацитет.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Хуманитарен пикник за вработените во „Алкалоид“: Донирани околу 1,8 милиони денари за лицата во третата доба

Поттикнати од вредностите кои ја обликуваат корпоративната култура на „Алкалоид“, преточени во хуманост, солидарност и во грижа за заедницата, над 4.000 вработени, членови на нивните семејства и пријатели на компанијата ја продолжија хуманата мисија, која единаесетти пат се спроведува под закрила на Фондацијата „Трајче Мукаетов“.
Хуманоста е силата што ги подигнува луѓето, оваа година визуализирана преку симболиката на балон со топол воздух, илустриран на специјално дизајнираните маички за овој повод, преку кои вработените на „Алкалоид“, членовите на нивните семејства и/или нивните пријатели собраа околу 1,8 милиони денари, кои ќе му бидат донирани на Црвен крст на Град Скопје, а ќе се наменат за поддршка на социјалните сервиси за стари лица.
„Постарите лица, чија мудрост и животно искуство заслужуваат почит, внимание и поддршка, се вреден дел од општеството. Со нашата помош на активностите и иницијативите на Црвен крст на Град Скопје насочени кон социјалните сервиси за лицата во третата доба, веруваме дека заедно можеме да создадеме услови староста да биде период исполнет со достоинство, сигурност и човечка топлина. Хуманоста е силата што ги подигнува луѓето, а токму затоа преку оваа поддршка сакаме да им помогнеме на постарите лица да се издигнат над предизвиците и да имаат поисполнет и поквалитетен живот“, истакна Живко Мукаетов, Генерален директор/Претседател на УО на „Алкалоид“ и Претседател на Фондацијата „Трајче Мукаетов“.
Секретарот на Црвен крст на Град Скопје (ЦКГС) Сузана Тунева-Пауновска истакна: „Една од мисиите на ЦКГС е да им помогне на лицата во третата доба да имаат достоинствена и безбедна старост. Нивните предизвици се големи – осаменост, намалена мобилност или финансиски тешкотии – но затоа сме тука ние. Преку домашните посети, уредот Итно копче, санитетскиот транспорт и преку дневните центри за активно стареење им овозможуваме поддршка, сигурност и соодветна грижа. Но, оваа наша мисија не би можела да се реализира без силни и посветени партнери. Со ’Алкалоид’ знаеме дека не сме сами – нивната поддршка ни овозможува да продолжиме со поголема храброст и енергија и да реализираме повеќе активности, акции и
иницијативи. Заедно можеме повеќе!“.
Во насока на вредностите кои ја обликуваат корпоративната култура на „Алкалоид“, преточени во
хуманост, солидарност и грижа за заедницата, компанијата има воспоставено долгогодишно
хуманитарно партнерство со Црвен крст, поддржувајќи ја оваа хуманитарна организација како во
делот на социјално-хуманитарната дејност и справувањето со кризи и катастрофи така и на полето на крводарителството.
Првиот хуманитарен пикник на „Алкалоид“ под закрила на Фондацијата „Трајче Мукаетов“ е
одржан на 3 септември 2011 година.
Македонија
Алиу вели дека во здравството се реализирани над 1.250 вработувања во рекордно време

Министерот за здравство Азир Алиу ги поздрави учесниците на синдикалната школа организирана од Самостојниот синдикат на вработените во универзитетските клиники, клинички болници и други јавни здравствени установи во Република Македонија.
Како што информираат од Министерството за здравство, Алиу истакнал дека ја реафирмира заложбата за синдикатите како искрен партнер во градењето на подобар здравствен систем.
– Особено инспиративна е темата „Синдикализам во здравството: правата не се даваат – се освојуваат“, па оттука сакам да ја реафирмирам нашата заложба дека синдикатите се наш искрен партнер за подобар здравствен систем. Сакам да ве охрабрам за уште позајакната соработка, мојот кабинет е секогаш отворен за сугестии, идеи, забалешки, бидејќи заедно сме уште подобри, вели Алиу.
Во соопштението се наведува дека се реализирани над 1.250 вработувања во рекордно време и дека е спроведен процесот за вработување приватни специјализанти, со што е решен, велат, деценискиот егзистенцијален проблем на оваа категорија здравствени работници.
– Министерството за здравство покажува дека го почитува достоинството на сите медицински лица. Воедно, останува отворено за натамошна соработка со синдикатот. Заеднички продолжуваме да ги решаваме сите отворени прашања и предизвици, со цел да излеземе во пресрет на здравствените работници, и секако на пациентите, стои во соопштението.
Македонија
Претседателката се среќава со најниско рангираниот дипломат во САД, обвини Филипче

Претседателот на СДСМ Венко Филипче, на денешната регионална конференција „Еден регион. Една визија. Една иднина“, во организација на Институтот Прогрес, истакна дека под водство на актуелната власт, се случува досега невиден дипломатски дебакл.
-Тотална дипломатска изолација на состанокот во ОН, претседателката се среќава со најниско рангираниот дипломат од Соединетите Американски држави. Ваков дебакл дипломатијата до сега нема доживеано, рече тој.
Филипче го опиша ова како симболична, но многу сериозна потврда за тоа каде се наоѓа денеска државата на меѓународната сцена. Според него, Македонија од земја што беше призната и поддржана од клучните стратешки партнери, денес е држава што единствено добива внимание на маргините, без реално политичко влијание, без сериозни разговори и без почит.
-Се сѐ сведува на правење селфија со некои дипломати по ходниците на големите светски институции, рече Филипче, додавајќи дека патот кон НАТО и ЕУ не бил лесен и не бил без политичка цена, но дека тој пат вредел и бил правилен.
Во продолжение од обраќањето, Филипче истакна дека разликата меѓу поранешната и сегашната власт е токму во тоа што СДСМ секогаш го ставала интересот на државата пред партиските калкулации.
-И сега тоа е само еден дополнителен поттик да се бориме и да им кажеме на граѓаните дека нашите политики беа добри, беа во интерес на државата, на граѓаните, не водевме сметка, не ставаме на кантар дали ќе изгубиме дел од својот политички рејтинг, затоа што вредеше државата да оди напред, да се реши деценискиот проблем со името, да станеме земја членка на НАТО, рече лидерот на СДСМ.
Филипче посочи дека со оваа актуелна власт европскиот пат е запрен, институционално и суштински, потенцирајќи дека оваа влада не сака да го продолжи европскиот пат.
Како што нагласи, недостасуваат лидерство, храброст и визија за иднината на државата, а власта бега од тешките одлуки и ги сведува сите надворешни ангажмани на површна слика за јавноста без реална содржина.