Македонија
Николоски: Во Ѓорче Петров со поддршка од Светска банка целосно ќе се реконструираат улици

Александар Николоски, потпретседателот на ВМРО-ДПМНЕ, денес се обрати заедно со кандидатот за градоначалник на општина Ѓорче Петров од ВМРО-ДПМНЕ, Александар Стојкоски. Николоски се осврна на проект, кој е дел од поширока програма за изградба и реконструкција на локални патишта, со поддршка од Светска банка, а ја нагласи и идејата за развој на индустриска зона околу обиколницата, со цел да се отворат нови работни места во близина на местото на живеење на жителите.
,,Навистина е задоволство да се присуства на почеток на овој проект, особено што до води до една преубава црква стара повеќе од 100 години. Мислам дека со завршувањето на проектот, целиот овој дел од општината ќе добие свој нов лик којшто ќе е во корист на жителите кои што тука живеат, а секако отвори можности и други да доаѓаат и тука да живеат, затоа што се работи за едно навистина прекрасно место“, вели Николоски.
Николоски истакна дека улицата на која се работи во моментов е дел од договорот со Светска банка за финансирање и изградба на локални патишта. Како што вели тој, во општина Ѓорче Петров има многу проекти од двата повици на Владата предводена од ВМРО-ДПМНЕ, за поддршка на локалните самоуправи. Тој додаде дека во подготовка е буџет за општини кои се, како што вели тој, шампиони во она што го работат.
,,Ќе продолжиме да ја поддржуваме општина Ѓорче Петров, тука имавме доста проекти и во првиот повик и во вториот повик. Александар е одличен градоначалник, и еден од најдобрите градоначалници кои што ги има државата и треба такви градоначалници да се поддржуваат, дека веднаш после завршувањето на локалните избори, а тука работата ќе биде завршена уште во недела, во првиот круг. Очекуваме да достави нови проекти кои што ќе бидат надвор од овие буџети, односно спремаме еден специјален буџет за поддршка за неколку општини кои што се навистина шампиони во она што го работат, а Ѓорче Петров тука предничи, и Александар како градоначалник, така што дополнително на овие проекти ќе имаме и нови проекти кои што градоначалникот ќе ги достави“, кажа Николоски.
Николоски нагласи дека идејата е да се развие индустриска зона околу обиколницата, и на тој начин граѓаните би можеле да имаат работа блиску до нивното место на живеење.
,,Продолжуваме во оваа насока да работиме секаде онаму каде што можеме. Знаете дека се работи тука во близина и обиколницата, вчера имаше увид од страна а градоначалникот и на директорот на ЈП Државни патишта, таа многу значи за комуникацијата на жителите од овој крај на општината и ќе продолжиме да ја развиваме, идејата е да се развие една индустриска зона околу обиколницата како луѓето би можеле и својата работа да ја најдат блиску до местото на живеење“, заклучи Николоски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Лабудовиќ: Во секое училиште и градинка ќе обезбедиме здрав, топол и квалитетен оброк за секое дете

Кандидатот за градоначалник на Општина Центар, Мирослав Лабудовиќ, најави една од, како што рече, најважните мерки во својата програма – воведување на здрав, топол и нутритивно избалансиран оброк за секое дете во сите градинки и училишта во Центар.
„Имаме јасна цел – секој оброк што ќе го добијат децата да биде свеж, квалитетен и приготвен со љубов и внимание. Менито ќе го подготвуваат професионални нутриционисти, кои ќе внимаваат да има баланс меѓу хранливите вредности и вкусот што децата го сакаат,“ изјави Лабудовиќ.
Целта на оваа мерка е здравата исхрана да биде темел на растот и развојот на децата. „Здравата храна не е луксуз, туку право на секое дете. Затоа оваа мерка не е само оброк – тоа е инвестиција во здравјето и иднината на најмладите,“ потенцираше Лабудовиќ.
Оброците ќе бидат подготвени од домашни и внимателно избрани намирници, со проверен квалитет. „Оброкот ќе биде навистина топол – подготвен со грижа, внимание и љубов. Сакам родителите да бидат спокојни дека нивните деца секој ден во училиштето и градинката го добиваат најдоброто,“ додаде тој.
Освен здравствената компонента, мерката има и економска и општествена димензија. Со неа ќе се поддржат локалните производители и ќе се подигне свеста за важноста на правилната исхрана уште од најмала возраст.
„Центар мора да биде пример – општина што се грижи и што покажува дека секое дете е подеднакво важно. Здравото дете е среќно дете, а среќното дете е иднината на Центар. Верувам дека токму со вакви мерки ја градиме основата за подобро утре – за општина во која нејзините најмлади жители ќе растат здрави и радосни,“ порача на крајот Мирослав Лабудовиќ.
Македонија
ВМРО-ДПМНЕ: ДУИ да престане да го брани Дехари, жртвите да добијат заштита

Не е етничко, туку морално и кривично прашање , ДУИ да престане да го брани Дехари, жртвите да добијат заштита, велат од ВМРО-ДПМНЕ за скандалот со Фатмир Дехари.
Според оваа партија, ДУИ се обидува скандалот со Фатмир Дехари да го претвори во етничка приказна.
„Тоа е евтин маневар. Ова не е Албанци против Македонци. Ова е злоупотребувач против жртви. Ова е прашање на достоинство, закон и одговорност, независно од етничката и верската припадност.
Јавноста слушна содржини кои будат сериозен сомнеж за сексуално вознемирување и притисоци во Општина Кичево. Наместо закрила на жртвите и отворање пат за истрага, ДУИ зборува за „подземје“ и „фабрикувани факти“. Тоа е класичен рецепт за одвлекување внимание од суштината и за заплашување на сведоци.
Нашите ставови се јасни:
1. Итна суспензија на Фатмир Дехари од сите јавни функции до завршување на постапките.
2. Независна форензичка проверка на аудио материјалите од вештаци што немаат допир со политиката. Се што е автентично – во обвинителство.
3. Заштита на пријавувачите и потенцијалните жртви согласно законот; отворање дискретни канали за пријава.
4. Внатрешна ревизија во Општина Кичево за работната средина и можни злоупотреби на службена положба.
5. Јавна осуда на секој обид за етничка манипулација. Достоинството на жените не е партиски штит“.
Кичево, според ВМРО-ДПМНЕ, не заслужува тишина и релативизација. Граѓаните, како што велат, се зрели и точно знаат дека клевета се крие зад оние што се плашат од вистината.
„Ќе инсистираме институциите да постапат професионално и непристрасно.
Во оваа држава правдата не смее да зависи од партиска книшка, етничка припадност или функција“.
Македонија
Сиљановска-Давкова по повод Меѓународниот ден на белиот стап: Вистинското слепило не е во очите, туку во нечувствителноста на срцата

Претседателката Гордана Сиљановска-Давкова по повод Меѓународниот ден на белиот стап, се обрати на настан организиран од Државното средно училиште со ресурсен центар „Димитар Влахов“ – Скопје, посветен на подигањето на јавната свест за правата, можностите и придонесот на лицата со оштетен вид.
Сиљановска-Давкова истакна дека денешниот ден не е само симболично одбележување, туку е и потсетник дека вистинското слепило не е во очите, туку во нечувствителноста на срцата. За неа, тоа е повик до сите нас да ги отвориме очите и душата и да го видиме светот низ призмата на разбирање, почит и емпатија.
Таа укажа дека не треба да заборавиме дека белиот стап е симбол на достоинствен живот, но и на општествената обврска да создадеме градови и институции коишто ќе бидат пристапни, безбедни и пред сѐ, човечни.
Претседателката потсети дека во Советот за млади именувала лице со оштетен вид, што, според неа, испраќа порака дека секој млад човек, независно од животните околности, има право не само да биде слушнат, туку и активно да учествува во обликувањето на политиката и општеството во кое живее.
На настанот беа изведени музички и едукативни точки од ученици на ДСУРЦ „Димитар Влахов“- Скопје, одржана панел-дискусија посветена на значењето на белиот стап, презентирани лични искуства за ориентација и мобилност на сегашни и поранешни ученици и техники за користење на белиот стап.
Училиштето „Димитар Влахов“, како единствена институција од ваков вид во државата, повеќе од седум децении нуди едукација, рехабилитација и поддршка на ученици со оштетен вид.