Потпретседателот на ВМРО-ДПМНЕ, Александар Николоски, заедно со прeтседателот на Комисијата за надворешна политика во Собранието, Антонио Милошоски, наредниве денови ќе бидат во работна посета на Вашингтон.

Kако што информираат од опозициската партија, двајцата во рамките на посетата ќе присуствуваат на молитвениот појадок во организација на претседателот на САД, Доналд Трамп. Молитвениот појадок претставува најпрестижен политички настан во САД на кој доаѓаат врвни политичари од САД и целиот свет.

Покрај присуството на молитвениот појадок, Николоски и Милошоски ќе имаат и голем број билатерални средби со конгресмени, сенатори и претставници на тинк тенкови и институти, како и средби со македонската дијаспора, која е од огромно значење за државата.

Николоски и Милошоски ќе се сретнат со сенаторот Мајк Ли и конгресмените Мајк Дојл и Роберт Адерхолт.

„На средбите во Сенатот и Конгресот на САД, Николоски и Милошоски ќе информираат за политичката состојба во Македонија, за криминалот и корупцијата, како и за економското фијаско и уназадувањето на државата, но исто така ќе ги информираат соговорниците за плановите на ВМРО-ДПМНЕ и обновата што следува по победата на парламентарните избори во април“, велат од ВМРО-ДПМНЕ.

За време на посетата се очекува и средба со Паул Мекарти, директорот за Европа на Меѓународниот републикански институт (ИРИ), а се планира и средба со потпретседателката на Националниот демократски институт (НДИ), Шери Брајан. Покрај средби со двата института, Николоски и Милошоски ќе остварат средба и со директорот за надворешна политика на реномираната фондација „Херитиџ“. За време на престојот во Вашингтон се очекуваат и средби со македонската дијаспора во Америка.

Делегацијата ќе ја потврди уште еднаш заложбата на ВМРО-ДПМНЕ за членство во ЕУ и НАТО.